1 Ehudi viyadanganike, Waisilaili watenda wihi kaidi haulongozi wa Mndewa Mulungu. 2 Ivo Mndewa Mulungu kawaguma muna yamakono ya Yabini, mfalume wa Kanaani, yoyatawale uko Hazoli. Mkulu wa wakalizi wake kakala Sisela, ija yakalile kokala Haloshesi Hagoimu. 3 Maabaho Waisilaili wamulilila Mndewa Mulungu, kwaviya kakala na mituka ya ng'hondo magana kenda yoitendigwe kwa zuma, kawagaza Waisilaili kwa miyaka malongo maidi.

4 Lelo Debola yeli mulotezi wa chike, muke wa Lapidosi, niiyo yakalile msemi wa Isilaili chipindi icho. 5 Kakala hasi ya mtende wa Debola woukalile hagati ya Lama na Beseli kuna iisi ya vilima va Efulaimu. Waisilaili wamwizila muladi yahumize mbuli yawo. 6 Siku dimwe Debola kamtanga Balaka mwana wa chilume wa Abinoamu kulawa bululu da Kedeshi dili uko Nafutali, kamulongela, "Mndewa Mulungu, Mulungu wa Isilaili, kokulagiliza, ‘Hita ukasole wanhu wako kuna umulima wa Taboli, sagula walume 10,000 kulawa wanhu wa Nafutali na wanhu wa Zabuloni. 7 Niye nizamsongeza Sisela, mkulu wa wakalizi wa Yabini, yeze na wakalizi na mituka yake kuitowa na weye kuna ulwanda lwa Kishoni, mbali nizakutenda umuhume.’ "

8 Balaka kamulongela Debola, "One uhahita hamwe na niye, nizahita, mbali one huhitile hamwe na niye, sizahita." 9 Debola kamwidika, "Ona, nizahita hamwe na weye, mbali hwizapata hishima yoyose ya uhumi, kwaviya Mndewa Mulungu kezamguma Sisela muna yamakono ya mwanamke." Ivo Debola kaisondelela na Balaka kuhita Kedeshi. 10 Balaka kayatanga makabila ya Nafutali na Zabuloni uko Kedeshi, wanhu 10,000 wamsondelela. Debola kahita hamwe nayo.

11 Chipindi icho, Hebeli yeli Mkeni, kakala kaibagula na Wakeni wayage weli welekwa wa Hobabu, mkoi wa chilume wa Musa, keka hema jake habehi ya mwaloni wa Zaananimu uli habehi na Kedeshi.

12 Viwamulongele Sisela kuwa Balaka mwana wa chilume wa Abinoamu kakwela kuna umulima wa Taboli, 13 Sisela kaiduganya hamwe mituka yake yose magana kenda na walume wose hamwe nayo, kulawa Haloshesi Hagoimu mbaka lwanda lwa Kishoni. 14 Maabaho Debola kamulongela Balaka, "Hita! Diyelo Mndewa Mulungu kezamguma Sisela muna yamakono yako. Mndewa Mulungu kokulongolela." Ivo Balaka kahulumuka kuna umulima wa Taboli kawalanguliza wanhu 10,000. 15 Balaka kaitowa, nayo Mndewa Mulungu kawatenda Sisela na wakalizi wake wose wakimbile haulongozi wa Balaka kwa panga. Sisela kalawa muna ditololi jake kakimbila kwa migulu. 16 Mbali Balaka kawasondelela wakalizi na mituka mbaka Haloshesi Hagoimu na kuwakoma wakalizi wose wa Sisela kwa panga. Hasigale hata munhu imwe. 17 Mbali Sisela kakimbila kwa migulu mbaka kuna dihema da Yaeli, muke wa Hebeli, Mkeni. Katenda ivo kwaviya kukala na tindiwalo hagati ya mfalume Yabini wa Hazoli na ndugu wa Hebeli. 18 Yaeli kalawa kumuhokela Sisela, kamulongela, "Mwenevale wangu, kalibu kumwangu hebu sekeudumbe." Ivo kengila muna dihema jake, nayo kamgubika na golole dizamile ng'hani.

19 Sisela kamulongela Yaeli, "Ning'he mazi ning'we kwaviya ng'hilu yoluma." Kagubula mfuko wa mbende wa maziwa na kamwing'ha yang'we, maabaho kamgubika kaidi.

20 Sisela kamulongela, "Ima hana ulwivi lwa hema. Munhu yoyose yahakuuza, ‘Hano hana munhu yoyose?’ Longa ‘Habule.’ " 21 Sisela kakala yagonile ng'hani kwa ulegevu. Ivo Yaeli yeli muke wa Hebeli, kasola chigingi cha hema na nyundo, kamuhitila ugaluga na kachigongoma ichigingi chiya muna iditwi jake, chingila mbaka muna iisi. Ivo Sisela kadanganika bahobaho. 22 Nayo Balaka viyakalile komsondelela Sisela, Yaeli kalawa kunze kumuhokela, kamulongela, "Izo! Nizakulagusa munhu ija youmzahila." Balaka kengila muna dihema da Yaeli na umo kamfika Sisela kadanganika, na chigingi cha hema muna iditwi jake.

23 Siku iyo Mndewa Mulungu kawatenda Waisilaili wamuhume Yabini mfalume wa Kanaani. 24 Waisilaili waiyoha ng'hani kumtowa Yabini mfalume wa Kanaani mbaka viwamnangile.