1 Yefita Mgileadi kakala galu, nayo kelekigwa na mwanamke malaya. Gileadi kamweleka Yefita. 2 Muke wa Gileadi keleka wana wa chilume, wana wawo viwakulile wamsegeza Yefita. Wamulongela, "Hwizahazi chinhu chochose kulawa kwa tati yetu, kwaviya weye ni mwana wa muke imwenga." 3 Yefita kawakimbila ndugu zake na kahita kukala kuna iisi ya Tobu. Uko wanhu chaka waiduganya kuilumba nayo, wamsondelela muna imiyanza yake ya kuhoka vinhu. 4 Hamwande Waamoni waitowa na Isilaili, 5 walala wa Gileadi wahita kumsola Yefita kulawa muna iisi ya Tobu. 6 Walonga, "Izo uwe mkulu wetu wa watowang'hondo, muladi chidahe kuwatowa Waamoni." 7 Yefita kawalongela walala wa Gileadi, "Vino siyo mweye munilemile na kuniwinga muna ikaye ya tati yangu? Lelo habali muhagaya mokwiza kumwangu?"

8 Walala wa Gileadi wamulongela Yefita, "Sambi chikubwelela muladi uhite hamwe na cheye chikaitowe na Waamoni, weye kwizakuwa mulangulizi wa wanhu wose wa Gileadi."

9 Yefita kawalongela walala wa Gileadi, "One muhanibweleza ukaye kuitowa na Waamoli na Mndewa Mulungu yahanitenda nihume, nizakuwa mulangulizi wenu."

10 Walala wa Gileadi wamulongela Yefita, "Mndewa Mulungu kezakuwa mkalangama hagati yetu, chizatenda fana viulongile." 11 Ivo Yefita kahita na walala wa Gileadi na wanhu wamtenda kuwa mkulu wa watowang'hondo na mulangulizi wawo. Yefita kalonga mbuli zake uko Misipa haulongozi ha Mndewa Mulungu.

12 Maabaho Yefita kawatuma wasenga kwa mfalume wa Waamoni, wamulongele, "Weye kuna choni na cheye? Habali mwiza kuitowa isi yetu?"

13 Mfalume wa Waamoni kawedika wasenga wa Yefita, "Waisilaili viwalawile Misili, wasola isi yangu kulawa lwanda lwa Alinoni kuhita lwanda lwa Yaboki na lwanda lwa Yoludani. Lelo zisi izo zibwelezeni kwa tindiwalo."

14 Yefita kawatuma kaidi wasenga wahite kwa mfalume wa Waamoni, 15 wamulongele, "Yefita kolonga, ‘Isilaili hasolile isi ya Moabu hebu isi ya Waamoni. 16 Mbali Waisilaili viwasegele Misili, wahita bahali ya Shamu mbaka Kadeshi kufosela muna dibwilingu. 17 Maabaho Waisilaili wawatuma wasenga kwa mfalume wa Edomu kumulamba yawatogolele wafosele muna iisi yake. Mbali mfalume wa Edomu hawatogolele bule. Iviya wampula mfalume wa Moabu, mbali nayo iviya hawatogolele bule. Ivo Waisilaili wasigala Kadeshi. 18 Maabaho wasegela kwa kufosela kuna dibwilingu kuzunguluka isi ya Edomu na Moabu mbaka viwafikile ubanzi wa ulawilo wa zuwa wa Moabu, weka lago kuumwambu wa lwanda lwa Alinoni, mbali hawengile Moabu. Lwanda lwa Alinoni niiyo mhaka ya Moabu. 19 Baho Waisilaili watuma wasenga kwa mfalume Sihoni wa Waamoli uko Heshiboni wakampule yawatogolele kufosa muna iisi yake wahite kuna isi yawo. 20 Mbali mfalume Sihoni hawatogolele bule. Kawaduganya watowang'hondo wake wose, weka lago uko Yahazi, kawatowa Waisilaili. 21 Maabaho Mndewa Mulungu, Mulungu wa Isilaili, kawatenda Waisilaili wamuhume Sihoni na wanhu wake. Ivo Waisilaili wasola isi yose ya Waamoli wowakalile muna iisi ija. 22 Wasola isi yose ya Waamoli kwandusila lwanda lwa Alinoni ubanzi wa ulawilo wa zuwa mbaka lwanda lwa Yaboki ubanzi wa kasikazi na kulawa kuna dibwilingu ubanzi wa ulawilo wa zuwa mbaka lwanda lwa Yoludani ubanzi wa uswelo wa zuwa. 23 Ivo Mndewa Mulungu, Mulungu wa Isilaili, kawawinga Waamoli haulongozi wa wanhu wake Waisilaili. Weye kodahaze kuchihoka isi yetu? 24 Vino hwizasola chiya chiyokwing'ha mulungu wako Kemoshi? Chinhu chochose chiyaching'hile Mndewa Mulungu, Mulungu wetu, chizachisola. 25 Kogesa kuwa weye kunoga kufosa Balaki mwana wa Sipoli, mfalume wa Moabu? Vino haihumile na Waisilaili hebu kuitowa nawo? 26 Lusita Waisilaili viwakalile Heshiboni na vibululu vake, na bululu da Aloeli na mabululu yose yeli mumgwazogwazo wa lwanda lwa Alinoni na vibululu vake vose kwa lusita lwa miyaka magana matatu, habali lusita ulo huhakombole hanhu baho? 27 Niye sikubanange, mbali weye konibananga viutenda ng'hondo na niye. Diyelo Mndewa Mulungu yeli msemi kezahumiza hagati ya Waisilaili na Waamoni.’ " 28 Mbali mfalume wa Amoni hategeleze usenga uno kulawa kwa Yefita.

29 Maabaho Muhe wa Mndewa Mulungu umwizila Yefita, kasegela na kafosela Gileadi na Manase na kubwelela Misipa ili uko Gileadi na kahita mbaka Amoni. 30 Yefita kamulahila Mndewa Mulungu, kalonga, "One uhawaguma Waamoni muna yamakono yangu, 31 yoyose yondayalawe kunze kulawa muna ikaye yangu kunihokela vondanibwele nihakomeleza kuwahuma Waamoni, kezakuwa wako, weye Mndewa Mulungu. Munhu iyo nizakulavila nhambiko ya kutimbula."

32 Yefita kaloka ulwanda, kaitowa na Waamoni, na Mndewa Mulungu kaweka Waamoli muna yamakono yake. 33 Kaipatila uhumi mkulu, kasola mabululu malongo maidi yakalile hagati ya Aloeli hanhu hazunguluke Minisi na Abeli Kelamimu. Ivo Waamoni wahumigwa na Waisilaili. 34 Yefita viyakalile kobwela ukaye yake uko Misipa, mndele wake kalawa kumuhokela, kavina na katowa mhalati. Mwanage Yefita kakala iyo muhala. Yefita hakalile na mwana wa chilume hebu wa chike ila yeye muhala. 35 Yefita viyamuwonile, kasaula viwalo vake kwa usungu na kalonga, "Mndele wangu! Kunibena umoyo. Weye kuwa chandusilo chikulu cha uzidilwa kumwangu. Nimulahila Mndewa Mulungu, ivo sidaha kubena chilaho changu."

36 Mndele wake kamwidika, "Tata fana kumulahila chinhu Mndewa Mulungu, basi nitendele fana viwikile chilagano, kwaviya sambi kakudahiza kuwalihiliza wehi wako Waamoni." 37 Maabaho kamulongela tati yake, "Nokupula mbuli ino imwe, ning'he miyezi midi, nihite na mambwiya zangu kuna imilima, nikaillilile ifa yangu ning'hali sinasoligwa." 38 Tati yake kamtogolela yahite uko kwa miyezi midi. Nayo kahita hamwe na mambwiya zake, muladi yalilile ifa yake yang'hali hanasoligwa mulume. 39 Viifosile miyezi midi kabwela ukaye, maabaho tati yake kamtendela fana viyailajile. Mndele iyo kakala hanaibandama na mulume yoyose.

Lekamana kulawa baho kukala na chihendo chino muna isi ya Isilaili. 40 Chila mwaka wanaake wa Isilaili wahita kumulila siku nne ifa ya mndele wa Yefita Mgileadi.