1 Walume wa kabila da Efulaimu waiting'hana, waloka lwanda lwa Yoludani wafika Zafoni. Maabaho wamulongela Yefita, "Habali huchitangile muladi chihite hamwe na weye kwiitowa na Waamoni? Lelo chizaisoma kaye yako na weye uhawa mgati yake."

2 Mbali Yefita kawalongela, "Niye na wanhu wangu chikala choiswela na Waamoni, vinimulambileni munitaze hamwizile kunikombola. 3 Viniwonile kuwa hamwizile kunikombola, niloka nihita moyo mumkono kuitowa na Waamoni, Mndewa Mulungu kanitendeza niwahume. Lelo habali mokwiza kuitowa na niye?"

4 Maabaho Yefita kawaduganya wanhu wose wa Gileadi, kaitowa na wanhu wa Efulaimu. Wanhu wa Gileadi wawahuma wanhu wa Efulaimu. Wanhu wano wa Efulaimu wawo walongile, "Mweye wanhu wa Gileadi ni wagendanzila kulawa kabila da Efulaimu, mokala hagati ya dikabila da Efulaimu na Manase." 5 Maabaho wanhu wavamha viloko va lwanda lwa Yoludani muladi kuziba nzila ya wanhu wa Efulaimu. Chila siku kuyalawile mgendaji kalamba kufosa uko, wanhu wa Gileadi wamuuza, "Vino weye Muefulaimu?" Viyedike, "Bule," 6 wamulongela, "Haya lelo longa mbuli, ‘Shibolesi.’ " Mbali yeye kalonga, "Sibolesi," kwaviya hadahile kutambula voilondeka, ivo wamgwila na wamkoma uko kuna iviloko va lwanda lwa Yoludani. Wanhu wa Efulaimu wopata 42,000 wakomigwa chipindi icho.

7 Yefita kawalanguliza Waisilaili kwa miyaka sita. Maabaho Yefita yeli Mgileadi kadanganika na kawandigwa kuna dibululu jake uko Gileadi. 8 Viyafosile Yefita, Ibizani kulawa Beselehemu kawalanguliza Waisilaili. 9 Kakala na wana malongo matatu wa chilume na malongo matatu wa chike. Kawafungiza zengele wanage wa chike kuna ulukolo lumwenga, iviya kapata wanaake malongo matatu kulawa kuna ulukolo lumwenga. Ibizani kawalanguliza Waisilaili kwa miyaka saba. 10 Maabaho Ibizani kadanganika na kawandigwa uko Beselehemu.

11 Viyafosile Ibizani, Eloni wa kabila da Zabuloni kawalanguliza Waisilaili kwa miyaka longo. 12 Maabaho Eloni kadanganika na kawandigwa uko Aiyaloni kuna iisi ya Zabuloni. 13 Viyafosile Eloni, Abidoni mwana wa Hileli kulawa Pilasoni kawalanguliza Waisilaili. 14 Kapata wana wa chilume malongo mane wa wazukulu wa chilume malongo matatu, wakwelile vihongwe malongo saba. Abidoni kawalanguliza Waisilaili kwa miyaka minane. 15 Maabaho Abidoni mwana wa Hileli kadanganika na kawandigwa kuna dibululu da Pilasoni dili kuna iisi ya mulima wa Efulaimu kowakalile Waamaleki.