1 Waisilaili watenda wihi haulongozi ha Mndewa Mulungu, ivo Mndewa Mulungu kaweka muna yamakono ya Wamidiani kwa miyaka saba. 2 Wamidiani wakala na nguvu kufosa Waisilaili, ivo Waisilaili waitendela hanhu ha kuifisa kuna imilima na kuna yamatuka na kuna zimhongono. 3 Siku zose Waisilaili viwahandile mbeyu muna imigunda, Wamidiani na Waamaleki na wanhu wamwenga wokala ubanzi wa ulawilo wa zuwa weza kuwatowa. 4 Weka malago muna iisi yawo na kubananga vinhu vose vihandigwe muna iisi iyo mbaka Gaza. Hawawalekele Waisilaili chochose, yawe ng'hondolo hebu ng'ombe hebu mhunda. 5 Wehi wezaga wengi fana nzige, hamwe na ng'ombe wawo na mahema yawo, iviya wawo na ngamiya wawo wakala wengi ng'hani. Wengila muna iisi iyo muladi wainange. 6 Waisilaili watendigwa kuwa ngayengaye kwa ichimu cha Wamidiani mbaka wamulilila Mndewa Mulungu yawataze.

7 Waisilaili viwamulilile Mndewa Mulungu yawataze kwa ichimu cha Wamidiani, 8 Mndewa Mulungu kamtuma mulotezi kwa Waisilaili, kawalongela, "Mndewa Mulungu, Mulungu wa Isilaili, kolonga, ‘Nimulavani kuna iisi ya Misili komukalile watumwa. 9 Nimkombolani muna yamakono ya Wamisili wose na waja wamgazileni. Niwawinga wanhu haulongozi wenu na nimwing'hani isi yawo. 10 Maabaho nimulongelani, "Niye niiyo Mndewa Mulungu, Mulungu wenu, sekemuisang'hanile milungu ya Waamoli, waja muwasolele isi yawo." Mbali hamuhulike dizi jangu.’ "

11 Msenga wa Mndewa Mulungu kahita, kakala hasi ya mwaloni wa Yoashi, Mwabiezeli, uko Afula. Gideoni mwana wa Yoashi kakala kohulula ngano mgati ya hanhu ha kukamila zabibu muladi Wamidiani sekewamuwone. 12 Msenga wa Mndewa Mulungu kamulawilila, kamulongela, "Mndewa Mulungu kahamwe na weye, weye uli galu."

13 Gideoni kamulongela, "Weye mndewa wangu, one Mndewa Mulungu yahawa hamwe na cheye, habali mbuli zino zose zochipata? Zakulihi sang'hano zako za mwazanyo zowachisimulile wasaho zetu, walonga, ‘Mndewa Mulungu niiyo yachilavile kuna iisi ya Misili.’ Mbali sambi Mndewa Mulungu kachileka na kachika muna yamakono ya Wamidiani."

14 Mndewa Mulungu kamuhindukila, kamulongela, "Hita kwa udahi wouli nawo, ukawakombole Waisilaili kulawa muna yamakono ya Wamidiani. Niye nokutuma."

15 Gideoni kedika, "Mndewa, nizadahaze kuikombola Isilaili? Lukolo lwangu ni lunyondenyonde muna dikabila da Manase, niye ni munhu mdodo ng'hani muna ikaye yangu."

16 Mndewa Mulungu kamwidika, "Nizakuwa hamwe na weye, ivo kwizadaha kuwatowa Wamidiani wose fana komtowa munhu imwe."

17 Gideoni kedika, "One uhaninogela, nilaguse kuwa kweli weye iyo youlonga na niye. 18 Nokulamba sekeusegele hano mbaka vondanibwele na kukugalila chitumetume."

Mndewa Mulungu kalonga, "Nizakala mbaka vondaubwele."

19 Gideoni kahita ukaye yake kasasala mwanaluti na gate hadigumigwe lusu kulawa muna didebe da usage. Kaguma nyama muna ichisege na msuzi muna inongo, maabaho kamgalila hasi ya mwaloni, kamwing'ha.

20 Msenga wa Mulungu kalonga, "Sola nyama na gate hadinagumigwa lusu, vike muna uluwe na gida umsuzi." Na Gideoni katenda ivo. 21 Maabaho msenga wa Mndewa Mulungu kagolosa fimbo yake, kadalisa nyama na magate kwa fimbo yake. Moto ulawa kuna uluwe na kulunguza nyama na gate. Maabaho msenga wa kuulanga kasegela.

22 Baho Gideoni kavimanya kuwa iyo kakala msenga wa Mndewa Mulungu, kalonga, "Nizagaya, weye Mndewa Mulungu, kwaviya nimuwona msenga wako chihanga kwa chihanga." 23 Mbali Mndewa Mulungu kamulongela, "Tindiwalo diwe na weye! Sekeudumbe hwizadanganika." 24 Gideoni kamzengela Mndewa Mulungu lupango na kalutanga, "Mndewa Mulungu ni tindiwalo." Mbaka diyelo lupango ulo lwauko Afula bululu da Wabiezeli. 25 Ichilo icho Mndewa Mulungu kamulongela Gideoni, "Sola ng'ombe lume da tati yako dekaidi dili na miyaka saba, ukabomole lupango lwa Baali luyelinalo tati yako na ubene nyang'hiti ya Ashela ili habehi na baho. 26 Maabaho unizengele niye Mndewa Mulungu, Mulungu wako, lupango loulondeka uchanyha ya mhongono ino. Maabaho unilavile nhambiko ya kutimbula ya ng'ombe diya dilume dekaidi. Usang'hanile ngodi za nyang'hiti za Ashela youibenile." 27 Basi Gideoni kasola wasang'hani wake longo na katenda fana Mndewa Mulungu viyamulongele. Mbali kwaviya kadumba ndugu zake na wanhu wa muna dibululu badala ya kutenda mbuli izo imisi, katenda ichilo. 28 Wanhu wa muna dibululu viwalamkile imitondo ng'hani, wawona lupango lwa Baali na nyang'hiti ya Ashela ikalile habehi na baho vibenigwa. Ng'ombe lume dekaidi ditimbuligwa uchanyha ya lupango luzengigwe baho. 29 Waiuza wawo kwa wawo, "Yelihi yatendile mbuli ino?" Wachunguza na watola kuwa Gideoni mwana wa Yoashi katenda mbuli ino. 30 Maabaho walume wa bululu wamulongela Yoashi, "Mgale mwanago hano muladi yakomigwe! Kabananga lupango lwa Baali na kabomola nyang'hiti ya Asheli yoikalile hamwe nayo." 31 Mbali Yoashi kawalongela wanhu wose wakalile woihuma nayo, "Vino mweye mwizamgombela Baali? Hebu mwizamkombola? Munhu yoyose yomgombela kezakomigwa ing'hali hainafika imitondo! One Baali yahawa mulungu, kodaha koigombela mwenyewo munhu yahabena lupango lwake." 32 Ivo kwandusila siku ijo wamtanga Gideoni "Yelubaali" fambulo jake, "Baali nayaigombele mwenyewo", kwaviya kabomola lupango lwa Baali. 33 Maabaho Wamidiani wose na Waamaleki na wanhu wa makabila ya ulawilo wa zuwa waiting'hana. Waloka lwanda lwa Yoludani na weka lago kuna dikolongo da Yezileeli. 34 Mbali muhe wa Mndewa Mulungu umwizila Gideoni, nayo katowa mhalati kuwatanga Wabiezeli muladi wamsondelele. 35 Kawatuma wasenga muna isi yose ya Manase weze kumsondelela. Kawatuma wasenga wamwenga wakawatange wanhu wa makabila ya Asheli, Zabuloni na Nafutali, nawo weza kuilumba nayo.

36 Maabaho Gideoni kamulongela Mulungu, "One uhaikombola Isilaili kwa mkono wangu fana viulongile, 37 nizakwika mbende ya ng'hondolo uchanyha ya sakafu ya kuhwagila uhemba. One kuhawa na nungwe muna imbende muhala, sakafu ihanyala, basi nizavimanya kuwa kwizaikombola Isilaili kwa mkono wangu, fana viulongile." 38 Vino ivo voilawilile. Gideoni viyalamkile igolo yake imitondo ng'hani, kakama nhungwe yoikalile uchanyha ya ija imbende, kamemeza hamha. 39 Maabaho Gideoni kamulongela Mulungu, "Sekeuniwonele ludoko, nileke nilonge mwanza umwenga. Nileke niigeze kaidi mbende ino. Nokulamba uchanyha ya mbende kunyale, mbali hasi hawe na nhungwe." 40 Ichilo icho Mulungu katenda ivo. Mbende ija ikala inyalile, iviya nhungwe ikala hana iisi muhala.