1 Siku dimwe Yelubaali, niiyo Gideoni, hamwe na wanhu wake wose walamka na weka lago jawo habehi na nzasa ya Halodi. Lago da Wamidiani dikala kasikazi kuna dikolongo da mulima Mole.

2 Mndewa Mulungu kamulongela Gideoni, "Wanhu wouli nawo ni wengi ng'hani kumwangu kuwaguma Wamidiani muna yamakono yawo. Waisilaili sekewaitogoze haulongozi wangu na kulonga kuwa waikombola kwa nguvu zawo wenyewo. 3 Lelo wagong'ondele wanhu wose kuwa munhu yoyose yeli moga hebu yogudema yasegele kuna umulima wa Gileadi yabwele ukaye yake." Ivo wanhu 22,000 wabwela ukaye, wanhu 10,000 wasigala.

4 Mndewa Mulungu kamulongela Gideoni, "Wanhu wawo wang'hali wengi ng'hani. Lelo wagale kuna ulwanda, niye nizawageza uko. Munhu yoyose yondanikulongele, ‘Ino kezahita na weye,’ nayahite. Mbali munhu yoyose yondanimulongele, ‘hezahita na weye,’ iyo sekeyahite na weye." 5 Gideoni kawagala wanhu kuna yamazi. Mndewa Mulungu kamulongela Gideoni, "Chila munhu yondayalambite mazi yano kwa lulimi lwake fana imbwa viyolambita, kwizambagula, iviya kwizambagula munhu yotumbala mavindi kung'wa mazi."

6 Wanhu wang'wile mazi kulawa muna yamakono yawo kwa kulambita fana imbwa wakala 300. Mbali wamwenga wose wasigalile watumbala mavindi kung'wa mazi. 7 Mndewa Mulungu kamulongela Gideoni, "Kwa wanhu wawo 300 wang'wile kwa kulambita fana imbwa, nizawakombola Waisilaili na kuwaguma Wamidiani muna yamakono yawo. Wamwenga wose wabwele kumwawo." 8 Wanhu waja wasola ndiya zawo muna yamakono na mhalati zawo, Gideoni kawatuma wanhu wose wa Isilaili, chila imwe muna dihema jake. Kawakimilila wanhu waja 300, na lago da Wamidiani dikala hasi yake kuna dikolongo.

9 Ichilo icho Mndewa Mulungu kamulongela Gideoni, "Hita ukawatowe muna dilago jawo, kwaviya niweka muna yamakono yako. 10 Mbali one uhadumba, hita hamwe na Pula msang'hani wako. 11 Kwizahulika chiwolonga, maabaho makono yako yezagumigwa nguvu, uhite kuna dilago." Ivo Gideoni na Pula msang'hani wake wahita mbaka kumgwazo wa dilago da wehi. 12 Wamidiani na Waamaleki na wanhu wose wa ulawilo wa zuwa wakala kuna dikolongo, wengi fana nzige na ngamiya wawo hawapeteka, wengi fana msanga wa mhwani. 13 Gideoni viyafikile kamuhulika munhu imwe komsimulila miyage nzozi vino, "Nilota nzozi. Niwona gate da shayili dobimbilika mbaka kuna dilago da Wamidiani kutowa hema na kudihindula hasi uchanyha. Hema dibiduka na digona hasi." 14 Miyage kamwidika, "Iyo yolagusa upanga wa Muisilaili ija Gideoni mwana wa Yoashi iyo muna yamakono yake Mulungu kaweka Wamidiani na jeshi jose."

15 Gideoni viyahulike simulizi izo za nzozi na fambulo jake, katumbala mavindi kamtambikila Mndewa Mulungu. Maabaho kabwela kuna dilago da Waisilaili kalonga, "Lamkeni chihite, kwaviya Mulungu kadika jeshi da Wamidiani muna yamakono yenu." 16 Ivo kawagola wanhu waja 300 muna yamabumbila matatu, kaweng'ha mhalati na vimbazi na viwenge mgati. 17 Kawalongela, "Munilole na mutende fana vondanitende chipindi vondanifike muna dilago. 18 Niye na wanhu wose weli hamwe na niye vondachitowe mhalati, mweye wose toweni mhalati kulawa chila ubanzi na kulandula dizi, ‘Kwa ichimu cha Mndewa Mulungu na kwa ichimu cha Gideoni!’ "

19 Gideoni na wanhu waja 100 woyakalile hamwe nawo, wafika kuuhelelo wa dilago, mwanduso wa zamu ya ichilo ng'hani, viwasakanye wakalizi. Watowa mhalati na watula vimbazi vikalile muna yamakono yawo. 20 Mabumbila yose matatu watowa mhalati kutula vimbazi vawo. Muna yamakono yawo ya kumoso wamha milenge kwa makono yawo ya kulume wamha mhalati kuzitowa, kuno wolonga kwa dizi kulu, "Upanga kwa ichimu cha Mndewa Mulungu kwa ichimu cha Gideoni!" 21 Chila munhu kema hanhu hake kudizunguluka dilago. Watowang'hondo wose wa wehi wapwilika kuno woguta ng'hondo. 22 Viwatowile mhalati zawo, Mndewa Mulungu kawatenda wehi waikanhe na upanga wawo wenyewo. Wakimbilila uko Besi Shita, kugendelela Selela, mbaka kuna imhaka ya Abeli Mehola, habehi na Tabasi. 23 Walume wa Isilaili wakala waiduganya kulawa Nafutali na kulawa Asheli na kulawa isi yose ya Manase, wawakimbilila Wamidiani. 24 Gideoni katuma wasenga iisi yose ya vilima va Efulaimu, kalonga, "Hulumukeni kusonhela Wamidiani na mukimilile viloko va mazi haulongozi wawo mbaka Besi Bala na iviya lwanda lwa Yoludani." Ivo walume wose wa Efulaimu watangigwa, wauzinga lwanda lwa Yoludani mbaka Besi Bala. 25 Wawateka walangulizi waidi wa Midiani, yani Olebu na Zeebu. Wamkoma Olebu muna uluwe lwa Olebu, nayo Zeebu wamkoma hanhu ha kukamila zabibu, viwakalile wowakimbilila Wamidiani. Wamgalila Gideoni matwi ya Olebu na Zeebu kuumwambu wa lwanda lwa Yoludani.