1 Hamwande, lusita lwa kuhulula ngano, Samsoni kasola mwanaluti na kahita kumulaula muke wake. Kalonga, "Nohita kuna ichiheleto cha muke wangu." Mbali tata wa muke wake kamulema sekeyengile.

2 Kamwidika Samsoni, "Nigesa kumwihila mwanangu, ivo nimwing'ha mbwiyako. Mbali mdodo wake kanoga kufosa yeye. Nokulamba umsole ino badala yake." 3 Samsoni kalonga, "Mwanza uno sizalongigwa vihile kwa chiya chondaniwatendele Wafilisiti!" 4 Samsoni kahita na kagwila mbwizi magana matatu. Maabaho kasola miwenge ya moto na kawafunga iwambwizi mkila kwa mkila. Keka milenge hagati ya mikila midi. 5 Viyakomeleze kubwinha miwenge ija, kawalekela mbwizi hagati ya ngano ya Wafilisiti, katimbula makinza ya ngano na ngano ili ing'hali hainahunigwa, mbaka migunda ya mizabibu na mizaituni. 6 Wafilisiti viwauzile, "Yelihi yatendile vino?" Walonga, "Samsoni, mkoi wa ija Mtimina kwaviya kasola muke wake kamwing'ha miyage" Wafilisiti wahita kumtimbula muke iyo na tati yake kwa moto.

7 Samsoni kawalongela, "Vino ivo mutenda? Noilaha kuwa sizasegela mbaka vondanimulihilizeni!" 8 Ivo kawatowa ng'hani na kuwakoma wengi. Maabaho kahita kukala muna dituka da luwe lwa Etamu.

9 Wafilisiti weza, weka lago jawo muna iisi ya Yuda na waisasala kuditowa bululu da Lehi. 10 Wanhu wa Yuda wawauza, "Habali mwiza kuchitowa?" Nawo wawedika, "Chiza muladi chimfunge Samsoni na kumtendela fana viyachitendele." 11 Wanhu 3,000 wa Yuda wamuhitila Samsoni kuna dituka da luwe lwa Etamu wamulongela, "Vino hamuvimanyile kuwa Wafilisiti wochitawala? Lola mwila wouchitendele!"

Samsoni kawedika, "Fana viwanitendele, niivo voniwatendele." 12 Wamulongela, "Chiza kukufunga muladi chikugume muna yamakono yawo."

Samsoni kawalongela, "Nilahileni kuwa mweye wenyewo hamwizanikoma."

13 Nawo wamulongela, "Hachizakukoma mbali chizakufunga na kukuguma muna yamakono yawo." Ivo wamfunga mizabi midi ya sambi na kumulava kulawa muna uluwe. 14 Viyafikile Lehi, Wafilisiti wamkimbilila kuno woguta nyangi. Baho muhe wa Mndewa Mulungu umwizila Samsoni kwa nguvu na zinzabi ziya ziwamfungile muna yamakono yake zifunguka fana chitani chamhile moto, na vifungo vilagala hasi. 15 Samsoni kapata usaya wa mhunda, kausang'hanila kuwakomela wanhu 1,000. 16 Maabaho Samsoni kalonga,

"Kwa usaya wa mhunda,

niduganya mafungu ya mitufi.

Kwa usaya wa mhunda,

niwakoma wanhu 1,000."

17 Viyakomeleze kulonga kawasa usaya uwo. Hanhu baho hatangigwa Lamasi Lehi, fambulo jake mulima wa usaya.

18 Kwaviya Samsoni kakala na ng'hilu ng'hani, kampula Mndewa Mulungu, kalonga, "Kuning'ha niye, msang'hani wako uhumi mkulu. Lelo sambi kwizanileka nidanganike na ng'hilu na kugwa muna yamakono ya wanhu hawengile ulungwana?" 19 Mulungu kafungula hanhu hakalile na kombo uko Lehi, maabaho mazi yalawa. Samsoni kang'wa mazi yayo na nguvu zake zimbwelela. Nzasa iyo itangigwa Eni Hakole, iyo yauko Lehi mbaka diyelo. 20 Samsoni kakala msemi wa Waisilaili kwa miyaka malongo maidi muna zisiku za Wafilisiti.