1 Samsoni kahita Timina, uko kamuwona mndele imwe Mfilisiti. 2 Viyabwelile, kawalongela tati yake na mami yake, "Uko Timina nimuwona muke imwe Mfilisiti munisolele muke iyo, nolonda yawe muke wangu."

3 Tati yake na mami yake wamuuza, "Vino habule muke yoyose mwa ndugu zako hebu mwa Waisilaili wamwenga mbaka uhite kusola muke kwa Wafilisiti hawagumigwe ulungwana?"

Mbali Samsoni kamulongela tati yake, "Nisoleleni muke iyo, kwaviya kaninogela ng'hani."

4 Tati yake na mami yake hawavimanyile kuwa Mndewa Mulungu komtendeza Samsoni yatende vino, kwaviya Mndewa Mulungu kakala kozahila nzila ya kuwatowa Wafilisiti. Lusita ulo Wafilisiti wakala wotawala Isilaili.

5 Ivo Samsoni kahita Timina hamwe na tati yake na mami yake. Viwafikile kuna imigunda ya mizabibu ya Timina, mwanasimba kalawilila kuno kotongoloma. 6 Baho muhe wa Mndewa Mulungu umwingila Samsoni kwa nguvu na kamdega simba iyo fana munhu viyodega mwanaluti. Na Samsoni hawalongele bule tati yake na mami yake mbuli iyo.

7 Maabaho kasegela kahita kulonga na imwanamke iyo, muke iyo kanogelwa ng'hani na Samsoni. 8 Vizifosile siku siyo nyingi, kahita kumsola mwanamke ija. Viyafikile muna inzila kahinduka kumgwazo kuulola mtufi uja wa simba, humbe mgati ya mtufi kukala na nyuki ivugile. 9 Kapakula uki kwa makono yake kakala koja kuno kogendelela na mwanza wake. Viyawafikile tati yake na mami yake, kaweng'ha uki nawo waja. Mbali hawalongele kuwa uki uwo kaulava muna umtufi wa simba.

10 Tati yake kahita ukaye kwa imuke ija, uko Samsoni katenda dugila, fana viwatendile wabwanga siku izo. 11 Wafilisiti viwamuwone, wamwing'ha wabwanga wayage malongo matatu wakale nayo kwa dugila.

12 Samsoni kawalongela, "Lekeni nimuuzeni chitendawili. One muhadaha kufambula chitendawili icho kwa lusita lwa siku saba za dugila da sola, nizamwing'hani viwalo malongo matatu va chitani na viwalo malongo matatu va dugila. 13 Mbali one hamudahile kufambula, mwizaning'ha viwalo malongo matatu va chitani na malongo matatu va dugila."

Nawo wamwidika, "Haya tega chihulike."

14 Kalonga,

"Kwa mjaji kulawa chinhu cha kuja,

kwa mwene nguvu kulawa chinhu chili mulile."

Vizifosile siku nhatu wakala wang'hali hawanategula ichitendawili.

15 Siku yesaba wamulongela muke wa Samsoni, "Muhembeleze mulumako yachilongele fambulo da chitendawili chino. One uhalema chizatuma moto kuna ikaye ya tati yako nawo wizakulunguza. Vino mweye muchigoneka hano muladi kuchihoka vinhu vetu?"

16 Ivo muke wa Samsoni kahita kwa Samsoni kuno masozi yolawa na kalonga, "Hunilonda bule! Konihila! Kuwauza mbwiya zangu chitendawili na niye hunilongele bule fambulo jake!"

Samsoni kalonga, "Lola, hata tati yangu na mami yangu siwalongele. Habali nikulongele weye?" 17 Kalila siku zose saba za dugila. Mbali siku yesaba kamulongela fambulo da chitendawili icho, kwaviya kamuwangiliza ng'hani. Maabaho imuke kawalongela wanhu wake.

18 Ivo siku yesaba ding'hali zuwa hadinakuswa, wanhu wa dibululu wamulongela fambulo da ichitendawili,

"Choni chili mulile kufosa uki?

Choni chili na nguvu kufosa simba?"

Samsoni kedika,

"One hamulimile na ng'ombe wangu,

sigambemumanye voilondeka kunidika sambi."

19 Baho muhe wa Mndewa Mulungu umwizila Samsoni kwa nguvu, nayo kahita kuna dibululu da Ashikeloni, kawakoma wanhu malongo matatu, maabaho kasola viwalo vawo va dugila, kaweng'ha waja wategule chitendawili chake. Maabaho kasegela, kahita kwa tati yake kuno kana ludoko. 20 Muke wa Samsoni keng'higwa mbwanga imwenga yakalile mbwiyake yowataze muna isiku ya dugila da sola.