1 Waisilaili wose kwandusila bululu da Dani mbaka bululu da Belisheba na kwandusila isi ya Gileadi weza na waiting'hana haulongozi ha Mndewa Mulungu uko Misipa. 2 Walangulizi wose wa makabila ya Isilaili walawilila hana umting'hano wa wanhu wa Mulungu. Wose wakala wakalizi 400,000 wogenda na magulu weli na panga. 3 Wanhu wa kabila da Benyamini wahulika kuwa Waisilaili wamwenga wose waiting'hana uko Misipa.

Waisilaili wauza, "Chilongele, wihi uno utendeka vilihi?"

4 Mulawi ija, mulume wa suliya ija kedika, "Niye na msang'hani wangu wa chike chifika Gibea bululu da kabila da Benyamini muladi chigone uko ichilo. 5 Mbali wanhu wa Gibea weza ichilo na waizingila kaye inikalile nigonile. Walonda kunikoma, wambandama shuluti msang'hani wangu wa chike mbaka kadanganika. 6 Nisola mtufi wake, nikanha vihande vihande na nivigala kwa makabila yose ya Isilaili, kwaviya watenda mbuli ihile na ya kutibusa muna iisi ya Isilaili. 7 Mweye Waisilaili mose munilongele chitende choni."

8 Wanhu wose wema fana munhu imwe, walonga, "Cheye wose hachizahita ukaye. Habule hata imwe wetu yondayabwele ukaye yake. 9 Vino niivo vondachiitendele Gibea. Chizatowa mhiya viya voilondeka kuwatowa. 10 Chizasagula wanhu longo mwa chila wanhu gana wa Isilaili, wanhu gana mwa chila wanhu magana longo mwa wanhu magana magana, wanhu magana longo mwa chila wanhu 10,000, wawagalile wanhu ndiya. Watowang'hondo vondawafike bululu da Gibea da kabila da Benyamini, wezawatendela yaja yolondeka kwa ichimu cha wihi uno uwatendile muna iisi ya Isilaili." 11 Ivo walume wose wa Isilaili waiting'hana kwa moyo umwe kwa ichimu cha kuditowa bululu da Gibea.

12 Wanhu wa makabila ya Isilaili watuma wasenga mbaka chila hanhu ha kabila da Benyamini, walonga, "Vino uno ni wihi waki woulawilile kumwenu? 13 Lelo ching'heni wanhu wawo wotenda yehile wa Gibea muladi chiwakome na kwagiza wihi uno muna iisi ya Isilaili." Mbali wanhu wa kabila da Benyamini hawawategeleze ndugu zawo Waisilaili. 14 Wanhu kulawa makabila yose ya Benyamini weza Gibea kuitowa na wanhu wa Isilaili. 15 Wanhu wa kabila da Benyamini waiduganya kulawa muna yamabululu yawo, watowang'hondo 26,000 wosang'hanila silaha, na wakaya wa bululu magana saba da Gibea waduganya wanhu wowasaguligwe. 16 Hagati ya wanhu wawo wose wasaguligwe, kukala na watowang'hondo magana saba wowasang'hanile makono ya kumoso, chila munhu kodaha kupigisa dibwe kwa ng'humbewe kulenga nyele bila kuhonya. 17 Waisilaili wose, bila ya kabila da Benyamini waduganya wanhu 400,000 wowodaha kusang'hanila silaha. Wose wakala magalu wa ng'hondo. 18 Waisilaili wahita Beseli kumuuza Mulungu, muladi wavimanye kabila dondajanduse kuitowa na wanhu wa kabila da Benyamini. Mndewa Mulungu katambula kabila da Yuda diwe da mwanduso.

19 Igolo yake imitondo Waisilaili wahita na weka lago jawo habehi na Gibea 20 Waisilaili walawa kuitowa na kabila da Benyamini habehi na Gibea. 21 Wanhu wa kabila da Benyamini walawa kunze ya bululu da Gibea waitowa na Waisilaili. Siku iyo wawakoma walume wa Isilaili 22,000. 22 Mbali Waisilaili waing'ha moyo, waisasala kaidi kwa ng'hondo hanhu haja howaisasale uchanduso. 23 Waisilaili wahita, wamulilila Mndewa Mulungu mbaka ichigulogulo. Maabaho wamuuza Mndewa Mulungu, "Vino chihite kaidi kuitowa na ndugu zetu wa kabila da Benyamini?"

Mndewa Mulungu kawedika, "Hiteni mukaitowe nawo." 24 Igolo yake Waisilaili wahita kuitowa na wanhu wa kabila da Benyamini. 25 Siku iyo wanhu wa kabila da Benyamini walawa Gibea na kuwatowa Waisilaili, wawakoma Waisilaili watowang'hondo 18,000. 26 Waisilaili wose wahita Beseli na kulila. Wakala uko haulongozi wa Mndewa Mulungu, waomboleza na kufunga mbaka ichigulogulo. Wamulavila Mndewa Mulungu nhambiko za kutimbula na nhambiko za kugala tindiwalo. 27 Waisilaili wampula Mndewa Mulungu yawataze. Siku izo sanduku da lagano da Mndewa Mulungu dikala uko Beseli. 28 Finehasi mwana wa Eleazali, mwana wa Haluni, iyo yakalile mkulu wa nhambiko siku izo. Waisilaili wamuuza Mndewa Mulungu, "Vilihi chihite kaidi kuitowa na ndugu zetu wa kabila da Benyamini?"

Mndewa Mulungu kawedika, "Hiteni, kwaviya igolo nizawatenda muwahume."

29 Ivo Waisilaili weka watowang'hondo waifisile kudizunguluka bululu da Gibea 30 Siku yetatu Waisilaili wahita kuitowa na wanhu wa kabila da Benyamini, waisasala kuitowa na Gibea fana viwatendile umwaka. 31 Wanhu wa kabila da Benyamini viwalawile kuna dibululu kuitowa na Waisilaili, wakwesigwa kutali na bululu. Ilawilila fana viwatendile umwaka kuwatowa Waisilaili muna zinzila zing'hulu, imwe yoihita Beseli na imwenga yoihita Gibea. Wawakoma Waisilaili fana viya malongo matatu kuna imigunda. 32 Wanhu wa kabila da Benyamini walonga, "Chohuma fana umwaka." Mbali Waisilaili walonga, "Chikimbile muladi chiwakwese kulawa kutali na bululu mbaka kuna inzila ing'hulu." 33 Ivo Waisilaili wose walawa hanhu hawo na wahita kuipanga kaidi uko Baali Tamali. Wayawo wakalile waifisile na walawa himahima hanhu baho ubanzi wa uswelo wa zuwa wa Gibea. 34 Walume 10,000 wowasaguligwe kulawa muna yamakabila yose ya Isilaili, wafika Gibea. Ng'hondo ikala ichaga, ivo wanhu wa kabila da Benyamini hawavimanyile kuwa wahabehi kunangigwa. 35 Mndewa Mulungu kawatenda Waisilaili wawahume wanhu wa kabila da Benyamini. Muna isiku iyo Waisilaili wawakoma wanhu wa kabila da Benyamini 25,100, wose wakala wakalizi wosang'hanila silaha. 36 Ivo wanhu wa kabila da Benyamini wawona kuwa wahumigwa.

Waisilaili wabwela ukaye fana wowakimbila wanhu wa kabila da Benyamini, kwaviya wawahuwila wayawo wakalile wodisepa bululu da Gibea. 37 Wanhu waja waifisile walawa hima na kuditowa bululu da Gibea na kuwakoma kwa upanga wanhu wose wakalile umo. 38 Chilaguso chiwailagane Waisilaili na wanhu waja waifisile wahadiwona yosi dikwela kuchany'ha kulawa muna dibululu ijo. 39 Maabaho Waisilaili wahinduka kuna ing'hondo ija, wanhu wa kabila da Benyamini wandusa kuwatowa na kuwakoma Waisilaili fana viyamalongo matatu, kwaviya walonga, "Chiwahuma fana kuna ing'hondo ya ichanduso." 40 Mbali wingu ijo vijanduse kukwela kulawa kuna dibululu, dilingile fana mhanda ya yosi, wanhu wa kabila da Benyamini walola kuchisogo na wawona bululu jose dokwela uchanyha kuna diyosi kuhita kuulanga. 41 Maabaho Waisilaili wahinduka, wanhu wa kabila da Benyamini wadumba, kwaviya wavimanya kuwa wezanangigwa. 42 Ivo wahinduka na wawakimbila Waisilaili wahita kuna dibwilingu, mbali wakumbigwa na ng'hondo, waifika wahagati ya mabumbila maidi ya watowang'hondo wa Isilaili na watowang'hondo walawile muna ya mabululu wawananga. 43 Waisilaili wawazinga wanhu wa kabila da Benyamini, wawasondelela kulawa Noha mbaka ulawilo wa zuwa wa bululu da Gibea, uko wawakoma wengi wawo. 44 Siku iyo wakomigwa walume 18,000 wa kabila da Benyamini, wawo wose wakala magalu. 45 Wanhu wamwenga wa kabila da Benyamini wahinduka, wakimbilila kuhita kudibwilingu mbaka luwe lwa Limoni. Wanhu wamwenga 5,000 wakomigwa kuna inzila ng'hulu viwakalile wokimbila. Waisilaili wagendelela kuwasondelela ng'hani wanhu wa kabila da Benyamini mbaka bululu da Gidomu na wawakoma wanhu 2,000. 46 Wanhu wose wa kabila da Benyamini wakomigwe siku iyo wakala 25,000, wawo wose wakala magalu. 47 Mbali walume magana sita wahinduka na wakimbilila kudibwilingu kuna uluwe lwa Limoni, uko wakala miyezi mine. 48 Walume wa Isilaili wawabwelela wanhu wa kabila da Benyamini na wawakoma wanhu wose na wanyama. Wayatimbula mabululu yose yowafikile uko.