1 Mndewa Mulungu kawatenda wanhu wa zisi zino wasigale muladi kuwageza Waisilaili wakalile hawaitowile ng'hondo muna iisi ya Kanaani. 2 Katenda vino muladi kuwafunza wanhu wa welesi wa Waisilaili kuitowa ng'hondo kwaviya wakala hawanawona ng'hondo. 3 Wasigale muna iisi wakala wakulu watano wa Wafilisiti, Wakanaani wose na Wasidoni na Wahivi wowakalile muna imilima ya Lebanoni kulawa mulima wa Baali Helimoni mbaka kufika Hamasi.

4 Mndewa Mulungu kawaleka wawo muladi yawageze Waisilaili fana wozindilila malagilizo yake, yoyaweng'hile wasaho zawo kwa mkono wa Musa. 5 Ivo Waisilaili wakala hamwe na Wakanaani na Wahiti na Waamoli na Wapelizi na Wahivi na Wayebusi. 6 Wabwanga wa Waisilaili wawasola wandele wa zisi izo na Waisilaili wawaleka wandele wawo wasoligwe na wabwanga wa zisi izo. Kwa ichimu icho Waisilaili waisang'hanila milungu ya chigeni.

7 Waisilaili watenda wihi haulongozi wa Mndewa Mulungu, wamzimiza Mndewa Mulungu, Mulungu wawo na wawasang'hanila Mabaali na Maashela. 8 Ivo Mndewa Mulungu kawawonela ludoko Waisilaili na kawaguma muna yamakono ya Kushani Lishataimu mfalume wa kasikazi ya Shamu, nawo wamsang'hanila kwa miyaka minane. 9 Maabaho Waisilaili viwamulilile Mndewa Mulungu, kawagalila munhu wa kuwakombola, niiyo Osinieli, mwana wa chilume wa Kenazi yeli mdodo wake Kalebu. 10 Muhe wa Mndewa Mulungu umwizila, nayo kawa msemi wa Waisilaili. Kahita kuna ing'hondo na Mndewa Mulungu kamguma Kushani Lishataimu muna yamakono yake nayo kamuhuma. 11 Ivo isi iyo ikala na tindiwalo kwa miyaka malongo mane, mbaka viyadanganike Osinieli.

12 Waisilaili watenda wihi kaidi haulongozi ha Mndewa Mulungu. Ivo Mndewa Mulungu kamtenda mfalume Egiloni wa Moabu yawatowe Waisilaili, kwaviya watenda wihi haulongozi wa Mndewa Mulungu. 13 Egiloni kawaduganya Waamoni na Waamaleki, kahita kuitowa na Waisilaili na kawahuma. Kadisola Bululu da Mitende, niiyo Yeliko. 14 Waisilaili wamsang'hanila Egiloni mfalume wa Moabu miyaka longo na minane.

15 Waisilaili viwamulilile Mndewa Mulungu, kawagalila munhu wa kuwakombola, niiyo Ehudi mwana wa chilume wa Gela wa kabila da Benyamini, yosang'hanila mkono wa kumoso. Waisilaili wamgalila chitumetume Egiloni mfalume wa Moabu kufosela mumkono wa Ehudi. 16 Ehudi kaitendela panga dikutwa banzi mbili, utali wake sentimita malongo matano. Kadifunga muna ichigudi chake ubanzi wa kulume mgati ya mawalo yake. 17 Maabaho kamgalila Egiloni mfalume wa Moabu vitumetume viya. Egiloni kakala munhu yanenehe ng'hani. 18 Ehudi viyamwing'hile chitumetume, kawalongela wanhu wapapile ivitumetume wasegele. 19 Mbali viyafikile kuna zinyang'hiti za mabwe yasongoligwe habehi na Giligali, kambwelela Egiloni, kalonga, "Weye mfalume, nina usenga wa chinyele wa kukulongela." Ivo mfalume kawalongela wasang'hani wake, "Chilekeni chiidumwe!" Wanhu wose wakalile wokwima habehi yake walawa kunze. 20 Maabaho Ehudi kamkwenhukila haja hayakalile yaidumwe muna ichiheleto chake cha uchanyha chili na mbeho, kamulongela, "Nina usenga wako kulawa kwa Mulungu." Mfalume kenuka muna ichigoda kema wima. 21 Ehudi kasomola panga jake kwa mkono wake wa kumoso kulawa ubanzi wa kulume na kamuhoma najo mfalume muna umunda. 22 Panga jose dingila mgati hamwe na muhini wake. Mavuta yadigubika panga ijo kwaviya Ehudi hadilavile, dilawilila ubanzi umwenga. 23 Maabaho Ehudi kalawa kunze na kahinda kwa kufuli zinyivi za chiheleto icho cha uchanyha.

24 Viyasegele, wasang'hani wa mfalume wabwela. Viwawonile nyivi zose zihindigwa, wagesa kahita mwanza umo mgati ya ichiheleto. 25 Wagozela mbaka wengilwa na ludumbo. Viwawonile havugula, wasola luvugulo na wavugula ulwivi. Wamuwona mfalume wawo hasi, kadanganika.

26 Viwakalile wogozela, Ehudi kawabanga kafosela kuna zinyang'hiti za mabwe, kahita Seila. 27 Viyafikile kuna iisi ya vilima va Efulaimu katowa mhalati, Waisilaili wahulumuka hamwe nayo kulawa kuna imilima na kawalanguliza. 28 Kawalongela, "Nisondeleleni, kwaviya Mndewa Mulungu kawaguma wehi wenu Wamoabu muna yamakono yenu." Ivo wamsondelela mbaka hana ichiloko cha Yoludani na kuchisola kulawa muna yamakono ya Wamoabu, wakimilila munhu yoyose sekeyafose. 29 Siku iyo wawakoma Wamoabu walume 10,000, wose wakala watelele na wana nguvu, hasigale hata munhu imwe. 30 Ivo Waisilaili wawahuma Wamoabu. Isi ihola miyaka malongo manane.

31 Viyakomeleze Ehudi keza Shamgali mwana wa chilume wa Anasi, ija yawakomile Wafilisiti magana sita kwa balati da kudimila ng'ombe. Nayo iviya kawakombola Waisilaili.