1 Siku izo Isilaili kukala kwabule mfalume.

Siku izo wanhu wa kabila da Dani waizahilila uhazi wapate hanhu ha kukala kwaviya hawapatile isi yawo muna yamakabila ya Isilaili. 2 Ivo wanhu wa kabila da Dani wasagula wanhu watano magalu viweli na wawatuma kulawa uko Eshitaoli na bululu da Zola wawalagiliza wahite kuipelemba isi. Ivo wanhu wawo wafika kuna iisi ya vilima va Efulaimu ukaye kwa Mika na wakala uko. 3 Viwafikile habehi na kaye ya Mika, viwamtegeleze Mulawi ija viyolonga wammanya kuwa siyo mkaya wa baho, ivo wamuhitila na wamuuza, "Yelihi yakugalile hano? Hano kotendaki? Weye kuna sang'hano yaki hano?"

4 Kawedika, "Mika kanitenda niwe msang'hani wake, niwa mkulu wa nhambiko wake."

5 Maabaho wamulongela, "Chokulamba uchiuzile kwa Mulungu fana mwanza wetu wizanoga."

6 Mkulu wa nhambiko kawedika, "Hiteni kwa tindiwalo. Mndewa Mulungu komkalizani muna umwanza wenu."

7 Wanhu wawo watano wasegela na wahita Laishi. Wawawona wanhu wakalile uko, na viya viwakalile vinogile fana wanhu wa Sidoni. Wakala wanhu goya welibule ludumbo na hawahungukilwe na chinhu chochose muna iisi. Wakala kutali na wanhu wa Sidoni na wakala hawaitogolele na zisi zimwenga kuwataza.

8 Viwabwelile uko Zola na Eshitaoli, ndugu zawo wawauza, "Muchigalila mbuli zilingile vilihi?"

9 Wedika, "Inukeni chihite chikaitowe isi iyo. Chiiwona isi iyo, kweli inoga ng'hani. Sekemukale hano bila kutenda chinhu. Hima! Ingileni na muisole! 10 Vondamufike uko, mwizawafika wanhu welibule ludumbo. Isi iyo ni ng'hulu haihungukilwe na chinhu chochose na Mulungu kaika muna yamakono yetu."

11 Ivo wanhu magana sita wa kabila da Dani wasegela bululu da Zola na Eshitaoli, waisasala kwa ng'hondo. 12 Wahita na weka lago jawo uko Kiliasi Yealimu muna iisi ya Yuda. Lekamana hanhu baho ubanzi wa uswelo wa zuwa wa Kiliasi Yealimu hotangigwa Mahane Dani mbaka diyelo. 13 Kulawa uko wahita kuna iisi ya vilima va Efulaimu na wafika kuna ikaye ya Mika.

14 Wanhu waja watano wahitile kuipelemba isi ya Laishi wawalongela ndugu zawo, "Vino movimanya kuwa kaye imwe muna zikaye zino ina chizibawo na nyang'hiti za milungu na nyang'hiti zihakigwe shaba? Lelo geseni va kutenda." 15 Ivo wahita kuna ikaye ya Mika koyakalile Mulawi, nawo wamuuza viyogendelela. 16 Waja wanhu magana sita kulawa kabila da Dani, waisasala kwa ng'hondo, wema kuna ulwivi ulukulu. 17 Wanhu waja watano wahitile kuipelemba isi wengila kugati, wasola chizibawo na nyang'hiti za milungu na nyang'hiti zihakigwe shaba, lusita ulo mkulu wa nhambiko ija kakala yemile hamwe na waja wanhu magana sita weli na silaha. Viyawawone waja wanhu wopelemba isi 18 wengila muna ikaye ya Mika wasola chizibawo chiya na nyang'hiti za milungu na nyang'hiti zihakigwe shaba. Mkulu wa nhambiko kawauza, "Motenda choni?" 19 Nawo wamwidika, "Nyamala! Sekeulonge mbuli. Izo hamwe na cheye na uwe tati yetu na mkulu wa nhambiko wetu. Vino vinoga kumwako kuwa mkulu wa nhambiko wa munhu imwe hebu kuwa mkulu wa nhambiko wa kabila da Isilaili?"

20 Mkulu wa nhambiko kadeng'helela. Kasola chizibawo na nyang'hiti za milungu na nyang'hiti zihakigwe shaba, kahita hamwe nawo.

21 Wandusa mwanza wawo, kuno walongoleligwa na wana wawo na wanyama wawo wa kufugigwa na vinhu vawo. 22 Viwafikile kutali na kaye ya Mika, wanhu wakalile habehi na kaye ya Mika watangigwa, wawasondelele wanhu wa kabila da Dani na wawapata. 23 Maabaho wawagutila nyangi, wanhu wa kabila da Dani wahinduka na wamuuza Mika, "Kuna choni mbaka kuchisondelela na bumbila dino jose?"

24 Mika kawedika, "Musola milungu yangu yonitendile na mkulu wa nhambiko wangu na musegela navo. Lelo modahaze kuniuza nolonda choni?" 25 Wanhu wa kabila da Dani wamulongela, "Muhavu uleke gubu jako, buleivo wamwenga wetu weli na ludoko wezakugwila, kwizadanganika weye na ndugu zako." 26 Ivo wanhu wa kabila da Dani wasegela. Mika viyawone wana nguvu kufosa yeye, kahindula na kabwela ukaye yake. 27 Wanhu wa kabila da Dani wasola vinhu viyatendile Mika na mkulu wa nhambiko wake, wahita Laishi. Uko wawakoma wakaya wose wokala umo bila kudumba na kwa tindiwalo, waditimbula bululu jose. 28 Wakaya wa isi iyo hawakalile na munhu wa kuwakombola kwaviya wakala kutali na bululu da Sidoni, kaidi hawaitogolele na wanhu wa zisi zimwenga kuzigwa. Bululu ijo dikala kuna dikolongo da Besi Lehobu. Wanhu wa kabila da Dani wadizenga kaidi na wakala umo. 29 Waditanga bululu ijo Dani, kwa kudiyenzi zina da tati yawo Dani, yakalile mwana wa Isilaili, mbali zina da bululu ijo umwaka ditangigwa Laishi. 30 Wanhu wa kabila da Dani wasimika nyang'hiti ija ya kusongola. Yonasani mwana wa Gelishomu mwana wa Musa, kawa mkulu wawo wa nhambiko. Welesi wake iviya wawa wakulu wa nhambiko wa kabila da Dani mbaka wanhu wa isi iyo viwagaligwe kuna uuhami. 31 Wagendelela kusang'hanila nyang'hiti ziyatendile Mika, lusita lose kaye ya Mulungu viikalile Shilo.