1 Kuna iisi ya vilima va Efulaimu kukala na munhu imwe, zina jake Mika. 2 Siku dimwe kamulongela mami yake, "Viya vihande va hela elufu imwe na gana dimwe voubawiligwe na weye kumduwila ija yakubawile. Niye nihulika, ninavo, nivisola niye."

Mami yake kalonga, "Mwanangu, utemeligwe mate na Mndewa Mulungu."

3 Mika kambwelezela mami yake viya vihande va hela elufu imwe na gana dimwe. Mami yake kalonga, "Muladi duwilo donilavile sekedikupate, hela ino noika kwa sang'hano ya Mndewa Mulungu muladi kutendela nyang'hiti ya mulungu wa kusongola na kunonela ihakigwe na hela. Lelo nokubwelezela vihande va hela."

4 Mika viyambwelezele mami yake hela iyo, mami yake kasola vihande va hela magana maidi, kamwing'ha muhunzi wa hela ija yoyafuwile nyang'hiti ya kusongola na kunonela. Nyang'hiti iyo ikigwa muna ikaye ya Mika. 5 Munhu ino Mika kakala na hanhu hake ha kutambikila. Katenda chizibawo cha mkulu wa nhambiko na nyang'hiti, maabaho kamtenda imwe wa wanage kuwa mkulu wa nhambiko wake. 6 Siku izo Isilaili hakukalile na mfalume, chila munhu katenda viyalondile mwenyewo.

7 Iviya siku izo kukala na Mulawi mdodo yoyakalile fana nyambenyambe kuna dibululu da Beselehemu dili uko Yuda. 8 Munhu iyo kasegela muna dibululu da Beselehemu dili muna iisi ya Yuda, muladi yakazahile hanhu hamwenga ha kukala. Viyakalile yogenda, kafika kuna ikaye ya Mika kuna iisi ya vilima va Efulaimu. 9 Mika kamuuza, "Kulawa kulihi?"

Nayo kamwidika, "Niye ni Mulawi kulawa Beselehemu muna iisi ya Yuda, nozahila hanhu ha kukala."

10 Mika kalonga, "Kala hamwe na niye, uwe fana tata kumwangu na mkulu wa nhambiko wangu. Nizakuliha vihande longo va hela chila mwaka na viwalo hamwe na chila chinhu chiulonda." 11 Ivo Mulawi katogola kukala nayo, mbwanga iyo yeli Mulawi kumwake kakala fana imwe wa wanage. 12 Mika kamsagula Mulawi iyo kuwa mkulu wa nhambiko wake, kakala muna ikaye ya Mika. 13 Maabaho Mika kalonga, "Sambi novimanya kuwa Mndewa Mulungu kezatenda vinhu vangu vihite goya, kwaviya Mulawi kawa mkulu wa nhambiko wangu."