1 Viifosile ifa ya Yoshua, Waisilaili wamuuza Mndewa Mulungu, "Vino kabila dilihi dondajanduse kuhita kuitowa na Wakanaani?" 2 Mndewa Mulungu kawedika, "Kabila da Yuda dizakwandusa kuhita kuitowa nawo. Niiguma isi iyo muna yamakono yawo." 3 Wanhu wa kabila da Yuda wawalongela ndugu zawo, wanhu wa kabila da Simeoni, "Hiteni hamwe na cheye hana iisi yomwing'higwe muladi kwiitowa ng'hondo na Wakanaani. Iviya na cheye chizahita hamwe na mweye hana iisi yomwing'higwe." Ivo wanhu wa kabila da Simeoni wahita hamwe nawo.

4 Wanhu wa kabila da Yuda viwahitile kuwatowa, Mndewa Mulungu kaweka Wakanaani na Wapelizi muna yamakono yawo na wawakoma wanhu 10,000 kuna ing'hondo uko Bezeki. 5 Uko wamuwona mfalume Adoni Bezeki, waitowa nayo na wawahuma Wakanaani na Wapelizi. 6 Mfalume Adoni Bezeki kakimbila, mbali wamuwinga na kumgwila. Wamkanha madole ng'hulu ya muna yamakono na muna yamagulu. 7 Mfalume Adoni Bezeki kalonga, "Wafalume malongo saba waja wakanhigwe madole ng'hulu ya muna yamakono na muna yamagulu wadondola masigavu ya ndiya hasi ya meza yangu. Lelo Mulungu kaniliha fana vinitendile." Wamgala Yelusalemu na kadanganikila uko.

8 Walume wa kabila da Yuda wawatowa wanhu wa bululu da Yelusalemu na kudisola bululu ijo. Wawakoma kwa panga wakaya wake na waditimbula dibululu kwa moto. 9 Maabaho walume wa kabila da Yuda wahita kuwatowa Wakanaani wowokala muna iisi ya milima, isi ya Negebu na isi ya milima midododo ili ubanzi wa uswelo wa zuwa. 10 Maabaho kabila da Yuda wawasondelela Wakanaani wakalile uko Hebuloni, umwaka itangigwa Kiliasi Aliba. Nawo wawahuma wanhu wa ng'holo za Sheshai na Ahimani na Talimai.

11 Kulawa Hebuloni, wanhu wa kabila da Yuda wahita kuwatowa wakaya wa bululu da Debili diya umwaka ditangigwa Kiliasi Sefeli. 12 Kalebu kalonga, "Mulume yoyose yondayadahe kuditowa bululu da Kiliasi Sefeli na kudisola, nizamwing'ha mwanangu Akisa yawe muke wake." 13 Osinieli mwana wa Kenazi yeli mdodo wake Kalebu kadisola, nayo Kalebu kamulava Akisa mwanage muladi yasoligwe na Osinieli. 14 Akisa viyafikile kwa Osinieli, kamulongela Osinieli yampule mgunda Kalebu tati yake. Akisa kakala kakwela chihongwe, viyahulumuke, tati yake kamuuza, "Kolonda nikwing'he choni?" 15 Kamwidika, "Nitemele mate! Ning'he nzasa za mazi, kwaviya isi youning'hile kuno Negebu ina ng'hangu." Ivo Kalebu kamwing'ha nzasa zili uchanyha na zili hasi.

16 Welesi wa ija Mkeni yakalile mkoi wa chilume wa Musa, kaisondelela na wanhu wa kabila da Yuda kulawa bululu da mitende, yaani bululu da Yeliko, mbaka chuwala cha Yuda uko Negebu habehi na Aladi. Wakala uko hamwe na wanhu wokala muna iisi iyo. 17 Wanhu wa kabila da Yuda wahita hamwe na ndugu zawo wa kabila da Simeoni, wawahuma Wakanaani wakalile Sefasi. Wadinanga bululu ijo na wadigalusa zina, waditanga Holima*. 18 Wanhu wa kabila da Yuda iviya wasola bululu da Gaza na vibululu vake, Ashikeloni na vibululu vake, Ekiloni na vibululu vake. 19 Mndewa Mulungu kakala hamwe na wanhu wa kabila da Yuda, nawo waisola isi ya milima mbali hawadahile kuwahuma wakaya wa isi ya bawe, kwaviya wakala na mituka ya ng'hondo itendigwe kwa zuma. 20 Kalebu keng'higwa bululu da Hebuloni fana viyalagilize Musa, nayo kaziwinga ng'holo nhatu za Anaki. 21 Mbali wanhu wa kabila da Benyamini hawawawingile Wayebusi wowokala bululu da Yelusalemu. Lekamana Wayebusi wokala na wanhu wa kabila da Benyamini mbaka diyelo.

22 Makabila ya Efulaimu na Manase wanage Yosefu, wahita kuditowa bululu da Beseli, Mndewa Mulungu kakala hamwe nawo. 23 Wawatuma wanhu wahite kudipelemba bululu da Beseli diya umwaka ditangigwa Luzu. 24 Wapelembaji wawo wamuwona munhu kolawa muna dibululu ijo, wamulongela, "Chokulamba, chilagusile nzila ya kwingila muna dibululu dino, cheye chizakutendela yanogile." 25 Ivo kawalagusa nzila ya kwingila muna dibululu, nawo wengila na wawakoma wanhu wa bululu diya kwa panga. Mbali hawamkomile munhu iyo na ndugu zake. 26 Hamwande munhu iyo kahita kuna iisi ya Wahiti. Uko kazenga bululu na kaditanga Luzu, niijo zina da bululu ijo mbaka diyelo.

27 Wanhu wa kabila da Manase hawawawingile wanhu wa Besi Sheani na Taanaki na Doli na Ibileamu na Megido na vibululu vawo vose. Wakanaani wananahila kukala uko. 28 Waisilaili viwapatile nguvu hawawawingile Wakanaani, mbali waweng'ha sang'hano za kuwangilizigwa.

29 Wanhu wa kabila da Efulaimu hawawawingile Wakanaani wakalile Gezeli, mbali Wakanaani wagendelela kukala uko hamwe nawo.

30 Wanhu wa kabila da Zabuloni hawawawingile Wakanaani wakalile mabululu ya Kitiloni na Nahalali, mbali wagendelela kukala hamwe nawo kuno wowatendeza sang'hano za kuwangilizigwa.

31 Wanhu wa kabila da Asheli hawawawingile wanhu wa mabululu ya Ako na Sidoni na Alabu na Akizibu na Heliba na Afeka na Lehobu.

32 Wanhu wa kabila da Asheli wakala na Wakanaani weli wakaya wa isi iyo kwaviya hawawawingile.

33 Wanhu wa kabila da Nafutali hawawawingile wanhu wa mabululu ya Besi Shemeshi na Besi Anasi, mbali wakala hamwe nawo. Hata ivo wakaya wa mabululu yayo walondeka kuwasang'hanila Waisilaili sang'hano za kuwangilizigwa.

34 Waamoli wawawinga wanhu wa kabila da Dani kuna iisi ya milima, kwaviya hawawalekele kwiza kukala kuna iisi ya bawe. 35 Waamoli wananahila kukala muna yamabululu yeli kuna imilima ya Helesi na Aiyaloni na Shaalibimu. Mbali wanhu wa makabila ya Efulaimu na Manase wawatawala Waamoli na kuwatenda watende sang'hano za kuwangilizigwa.

36 Mhaka ya Waamoli ikala kasikazi ya Sela kufosela nzila yoyohita muna imilima ya Akilabimu.