1 Yoshua kayaduganya hamwe makabila yose ya Isilaili uko Shekemu, kawatanga walala na walangulizi na wasemi na wakulu wa Isilaili, nawo weza haulongozi wa Mndewa Mulungu. 2 Yoshua kawalongela wanhu wose, "Mndewa Mulungu, Mulungu wa Isilaili, kolonga, ‘Umwaka wasaho zenu Tela na wanage Bulahimu na Naholi wakala kuumwambu wa lwanda lwa Efulate, waisang'hanila milungu imwenga. 3 Maabaho nimsola wasaho yenu Bulahimu kulawa kuumwambu wa lwanda ulwo na nimulongoza muna iisi yose ya Kanaani na nimwing'ha welesi wengi. Nimwing'ha Isaka. 4 Nayo Isaka nimwing'ha Yakobo na Esau. Esau nimwing'ha milima ya Seili iwe yake, mbali Yakobo na welesi wake wahumuluka Misili. 5 Maabaho niwatuma Musa na Haluni. Niwatowa Wamisili kwa mahulo yayo yose yoyatendeke hagati yawo, maabaho nimulavani muna iisi iyo. 6 Niwalava wasaho zenu kulawa Misili na niwagala mbaka kuna Ibahali ya Shamu. Wamisili wawasondelela wahawa na mituka na watowang'hondo wakwelavihongwe. 7 Waisilaili viwanililile niye Mndewa Mulungu, nika ziza hagati ya mweye na Wamisili na nitenda bahali iwagubike Wamisili. Mweye wenyewo muwona mbuli zoniwatendele Wamisili. Mukala kuchuwala siku nyingi.

8 " ‘Maabaho nimgalani kuna iisi ya Waamoli wokala ubanzi wa ulawilo wa zuwa wa lwanda lwa Yoludani. Waitowa na mweye, mbali niye nimtendani muwanange na kuisola isi yawo. 9 Balaki mwana wa Sipoli, yeli mfalume wa Moabu kenuka na kaitowa na Waisilaili. Kawatuma wanhu wakamtange Balaamu mwana wa Beoli yeze kumduwilani, 10 mbali niye simtegeleze Balaamu, ivo kamtemelani mate, niye nimkombolani muna yamakono ya Balaki. 11 Maabaho muloka lwanda lwa Yoludani mufika Yeliko. Wakaya wa Yeliko waitowa na mweye, iviya Waamoli na Wapelizi na Wakanaani na Wahiti na Wagiligashi na Wahivi na Wayebusi. Wawo niwaguma muna yamakono yenu. 12 Maabaho niwatenda wafalume waidi wa Waamoli wadumbe muladi wawingigwe kuulongozi wenu. Muhuma siyo kwa ichimu cha mapanga na mhinde zenu. 13 Nimwing'hani migunda hamuilimile na mabululu hamuyazengile, momukala sambi na kuja zabibu na zaituni hamuzihandile.’

14 "Ivo mumdumbe Mndewa Mulungu na mumsang'hanile kwa moyo ugoloke na kwaminika. Ilekeni milungu ija iwaitambikile wasaho zenu kuumwambu wa lwanda lwa Efulate na muna iisi ya Misili. Msang'hanileni Mndewa Mulungu. 15 One hamulonda kumsang'hanila Mndewa Mulungu, saguleni diyelo kuwa yelihi yondamumsang'hanile, milungu ija iwaisang'hanile wasaho zenu kuumwambu wa lwanda lwa Efulate hebu milungu ya Waamoli yomukala muna iisi yawo. Mbali niye na wanhu wa muna ikaye yangu chizamsang'hanila Mndewa Mulungu."

16 Wanhu wedika, "Mawe! Hachidaha kumuleka Mndewa Mulungu na kuisang'hanila milungu imwenga. 17 Kwaviya Mndewa Mulungu, Mulungu wetu, niiyo yachilavile cheye na wasaho zetu muna iisi ya Misili kochikalile watumwa. Chiwona kwa meso yetu wenyewo mbuli ng'hulu zoyatendile. Kachikaliza muna imiyanza yetu na mwa wanhu wose wochifosile hagati yawo. 18 Mndewa Mulungu kawawinga kumwetu wanhu wose, hamwe na Waamoli wakalile muna iisi yetu. Ivo cheye chizamsang'hanila Mndewa Mulungu kwaviya yeye Mulungu wetu."

19 Yoshua kawalongela wanhu, "Hamudaha kumsang'hanila Mndewa Mulungu, kwaviya yeye niiyo Mulungu yelile. Yeye niiyo Mulungu yeli na migongo, hezalekelela ubananzi wenu na uhasanyi wenu. 20 One muhamuleka Mndewa Mulungu na kusang'hanila milungu imwenga, kezahinduka na kumtendelani mbuli zihile na kumnangani, ingawa kamtendelani mbuli zinogile." 21 Wanhu wamulongela Yoshua, "Mawe! Chizamsang'hanila Mndewa Mulungu." 22 Maabaho Yoshua kawalongela, "Mweye wenyewo wakalangama wa mihe yenu kuwa musagula kumsang'hanila Mndewa Mulungu."

Nawo wamwidika, "Ona, cheye wakalangama." 23 Yoshua kawalongela, "Segezeni milungu ya zisi zimwenga imuli nayo. Mumsondelele Mndewa Mulungu, Mulungu wa Isilaili, kwa mizoyo yenu yose." 24 Wanhu wamulongela Yoshua, "Chizamsang'hanila Mndewa Mulungu, Mulungu wetu na kumtegeleza."

25 Ivo Yoshua katenda lagano hagati ya wanhu na Mulungu, kaweng'ha malagilizo na ndagilizi uko Shekemu. 26 Yoshua kandika mbuli zino zose muna ichitabu cha malagilizo ya Mulungu. Maabaho kasola dibwe kulu, kadisimika hasi ya mbiki ukalile habehi na hanhu helile ha Mndewa Mulungu. 27 Yoshua kawalongela wanhu wose, "Loleni, dibwe dino dizakuwa ukalangama wetu, kwaviya dihulika mbuli zose ziyachilongele Mndewa Mulungu. Dizakuwa ukalangama wenu, muladi sekemumuleme Mulungu wenu." 28 Ivo Yoshua kawaleka wanhu wahite chila munhu hana ihanhu hake hayeng'higwe.

29 Vizikomelezeke mbuli izo, Yoshua mwana wa Nuni, msang'hani wa Mndewa Mulungu, kadanganika yahawa na miyaka gana na longo. 30 Wamuwanda muna iisi ya uhazi wake, uko Timinasi Sela ili muna iisi ya vilima va Efulaimu, ubanzi wa kasikazi wa mulima wa Gaashi.

31 Waisilaili wamsang'hanila Mndewa Mulungu siku zose za ugima wa Yoshua na siku zose za walala wakalile viifosile ifa ya Yoshua, waja wawonile sang'hano yose ya Mndewa Mulungu iyawatendele Waisilaili.

32 Mivuha ya Yosefu yowaigalile Waisilaili kulawa Misili waiwanda uko Shekemu hanhu hoyagulile Yakobo kulawa kwa wana wa Hamoli, tati yake Shekemu kwa vihande gana va hela. Isi ino nayo iwa uhazi wa welesi wa Yosefu.

33 Eleazali mwana wa Haluni kadanganika na kawandigwa uko Gibea, bululu da Finehasi mwanage doyeng'higwe, muna iisi ya vilima va Efulaimu.