1 Mbali Waisilaili hawaminike kusonhela vinhu vikigwe kwa sang'hano yelile, kwaviya Akani kasola vinhu vimwenga vilagilizigwe vinangigwe. Akani kakala mwana wa Kalimi, mwana wa Zabidi, mwana wa Zela, wa kabila da Yuda. Ivo Mndewa Mulungu kawawonela ludoko Waisilaili.

2 Yoshua kawatuma wanhu kulawa Yeliko wahite bululu da Ai, dili habehi na Besi Aveni, ulawilo wa zuwa wa Beseli. Kawalongela, "Hiteni mukaipelembe isi." Ivo wahita kudipelemba bululu da Ai. 3 Viwabwelile kwa Yoshua wamulongela, "Hailondeka kuwagala walume wose kuditowa bululu da Ai, kwaviya wanhu wokala umo wadodo. Walume elufu mbili hebu elufu nhatu wofaya. Sekemuwagaze watowang'hondo wose kwa ichimu cha bululu dodo." 4 Wanhu wopata elufu nhatu wahita kuditowa bululu da Ai, mbali wawingigwa na walume wa bululu ijo. 5 Walume wa bululu da Ai wawakoma Waisilaili malongo matatu na sita na kuwawinga wamwenga walawe muna ulwivi lwa bululu mbaka imihulumuko ya Shebalimu na wawakoma uko. Waisilaili wafa moyo na wadumba.

6 Maabaho Yoshua hamwe na walala wa Isilaili wadega mawalo yawo kwa usungu. Wagwa chingubingubi haulongozi wa sanduku da Mndewa Mulungu mbaka ichigulogulo, waitilila matimbwisi muna yamatwi yawo. 7 Yoshua kalonga, "Chizagaya, weye Mndewa Mulungu! Habali kuchilosa ulwanda lwa Yoludani muladi uchigume muna yamakono ya Waamoli wachidanganize? Chihatogole kusigala kuumwambu wa lwanda lwa Yoludani! 8 Weye Mndewa Mulungu, nilonge choni kuno Waisilaili wawawinga wehi wawo? 9 Wakanaani na wanhu wose wokala muna iisi ino vondawavimanye mbuli iyo, wezachizunguluka na kuchinanga ng'hani. Lelo kwizadigombelaze zina jako kulu?" 10 Mndewa Mulungu kamulongela Yoshua, "Ima!" Habali kuibwanha hasi ivo? 11 Waisilaili watenda uhasanyi kwaviya wadibena lagano jangu doniwalagilize wadizindilile. Wavisola vinhu vikigwe kwa sang'hano yelile vinangigwe, wavibawa na kulonga uvwizi. Wavika hamwe na vinhu vawo. 12 Ivo Waisilaili hawadaha kuwatowa wehi wawo. Wowakimbila wehi wawo kwaviya waitenda wenyewo kuwa chinhu chikigwe helile muladi chinangigwe! Sizakuwa hamwe na mweye kaidi one hamubanange vinhu vili hagati yenu vikigwe kwa sang'hano yelile. 13 Inuka uwasafye wanhu, uwalongele, "Muisafye wenyewo muladi muisasale kwa igolo, kwaviya niye Mndewa Mulungu, Mulungu wa Isilaili, nolonga, ‘Muna ivinhu venu kuna vinhu vilavigwe muladi vinangigwe. Hamudaha kuwatowa wehi wenu mbaka vinhu ivo visegezigwe kumwenu!’ " 14 " ‘Igolo imitondo wose mwize haulongozi wangu kabila kwa kabila. Kabila dondanidisagule dizahita kuulongozi, lukolo kwa lukolo. Lukolo londanilusagule wezahita kuulongozi kaye kwa kaye. Kaye yondaniisagule wezahita kuulongozi munhu imwe imwe. 15 Munhu yoyose yondayapatike yahawa na vinhu vikigwe kwa sang'hano yelile muladi vinangigwe, kezatimbuligwa, yeye hamwe na chila chinhu chake kwaviya kadileka lagano jangu niye Mndewa Mulungu, katenda mbuli ya chinyala muna iisi ya Isilaili.’ "

16 Ivo Yoshua kalamka chilochilo, kawagala habehi Waisilaili wose, kabila kwa kabila. Kabila da Yuda disaguligwa. 17 Maabaho kazikwenhusa habehi ng'holo za Yuda, lukolo kwa lukolo, lukolo lwa Zela lusaguligwa. Kalukwenhusa habehi lukolo lwa Zelahi, kaye kwa kaye, kaye ya Zabidi isaguligwa. 18 Maabaho Yoshua kawakwenhusa habehi wanhu wa muna ikaye ya Zabidi, munhu imwe imwe na Akani mwana wa Kalimi, mwana wa Zabidi, mwana wa Zela, wa kabila da Yuda, kasaguligwa. 19 Maabaho Yoshua kamulongela Akani, "Mwanangu, mtunhize Mndewa Mulungu, Mulungu wa Isilaili na umtogoze yeye. Unilongele viutendile, hebu sekeunifise." 20 Akani kamwidika Yoshua, "Kweli nimuhasanya Mndewa Mulungu, Mulungu wa Isilaili. Chino niicho chonitendile. 21 Viniwonile walo dimwe dinogile ng'hani kulawa Shinali hagati ya nyala, shekeli magana maidi za hela na mtoho wa zahabu uli na nzamo ya nusu chilo, nivimelela mate na nivisola, nivihimbila hasi muna dihema jangu, iviya hela yahasi ya vinhu ivo."

22 Ivo Yoshua kawatuma wasenga, nawo wakimbila muna dihema na wafika vihimbiligwa hasi na hela yahasi yake. 23 Wasola vinhu ivo muna dihema, wavigala kwa Yoshua na Waisilaili wose, nawo wavika hasi haulongozi wa Mndewa Mulungu. 24 Yoshua hamwe na Waisilaili wose wamsola Akani mwana wa Zela, hamwe na hela na walo na zahabu na wanage wa chilume na wanage wa chike na ng'ombe wake na vihongwe wake na ng'hondolo wake na hema jake na chila chinhu chiyakalile nacho, wawagala kuna Dibawe da Akoli. 25 Yoshua kamuuza Akani, "Habali kuchigaza? Diyelo Mndewa Mulungu kokugaza." Waisilaili wose wamtowa Akani na mabwe mbaka kadanganika. Maabaho wawatowa na mabwe wanhu wake wose mbaka wadanganika. Wawatimbula wose kwa moto. 26 Maabaho wamwikila mabwe mengi uchanyha yake, mabwe yayo yauko mbaka diyelo. Baho ludoko lwa Mndewa Mulungu luhola, hanhu baho hatangigwa Bawe da Akoli* mbaka diyelo.