1 Chilochilo Yoshua hamwe na Waisilaili wose wandusa mwanza kulawa Shitimu. Viwafikile lwanda lwa Yoludani, weka lago na wakala baho chidogo, ing'hali hawanaloka ulwanda. 2 Vizikomelezeke siku nhatu, walangulizi wafosa hagati ya lago ijo, 3 wawalagiliza wanhu, "Vondamudiwone sanduku da lagano da Mndewa Mulungu, Mulungu wenu, dipapigwa na wakulu wa nhambiko weli Walawi, mwizasegela hanhu henu na kudisondelela. 4 Muhatenda ivo mwizavimanya nzila ya kufosa, mana hamunafosa nzila ino. Mbali sekemudikwenhukile ng'hani sanduku da lagano, mukale vitali chilomita imwe."

5 Yoshua kawalongela wanhu, "Muisafye, mana igolo Mndewa Mulungu kezatenda mauzauza ya kwazanya kumwenu."

6 Maabaho Yoshua kawalongela wakulu wa nhambiko, "Disoleni sanduku da lagano na mulongole najo kuulongozi wa wanhu." Nawo wadisola na wawalongolela wanhu.

7 Mndewa Mulungu kamulongela Yoshua, "Diyelo nizakwandusa kukwinula haulongozi wa Waisilaili wose, muladi wavimanye kuwa vinikalile hamwe na Musa niivo vondaniwe hamwe na weye. 8 Walagilize wakulu wa nhambiko wopapa sanduku da lagano, ‘Vondamufike kuna ulwanda lwa Yoludani na kwima muna ulwanda.’ " 9 Yoshua kawalongela Waisilaili, "Izoni hano mutegeleze mbuli za Mndewa Mulungu, Mulungu wenu." 10 Maabaho Yoshua kalonga, "Kwa mbuli ino mwizavimanya kuwa Mndewa Mulungu yeli mgima kahamwe na mweye na kezawawinga wakaya wa isi iyo haulongozi wenu, wawo ni Wakanaani na Wahiti na Wahivi na Wapelizi na Wagiligashi na Waamoli na Wayebusi. 11 Loleni sanduku da lagano da Mndewa wa isi yose dahabehi kufosa kuulongozi wenu kwingila kuna ulwanda lwa Yoludani. 12 Lelo saguleni walume longo na waidi kulawa muna yamakabila ya Isilaili, chila kabila mulume imwe. 13 Vizegeyu va wakulu wa nhambiko wopapa sanduku da lagano da Mndewa Mulungu, Mulungu wa isi yose, vondavibojoge mazi ya lwanda lwa Yoludani, mazi ya lwanda ulo yezaleka kukilima. Mazi yondayakilime kulawa ubanzi wa uchanyha yezaiduganya hamwe."

14 Ivo wanhu viwasegele muna yamalago yawo muladi kuloka lwanda lwa Yoludani, wakulu wa nhambiko wapapile sanduku da lagano wawalongolela wanhu. 15 Lwanda lwa Yoludani lomema lusita lwa mavuno. Waja wapapile sanduku da lagano viwafikile lwanda lwa Yoludani na vizegeyu vawo vivibojoge yamazi ya lwanda. 16 Mazi yakalile yokilima kulawa ubanzi wa uchanyha yema na kuiduganya hamwe mbaka uko Adamu, chibululu chili habehi na bululu da Salesani. Mazi yaja yakalile yokilima kuhita bahali ya Alaba, niiyo Bahali ya Munyu, yema. Wanhu waloka kuulongozi wa Yeliko. 17 Waisilaili viwakalile woloka hanhu hanyalile, wakulu wa nhambiko wapapile sanduku da lagano da Mndewa Mulungu wema hanhu hanyalile mudikolongo da Yoludani, mbaka wanhu wose viwakomeleze kuloka ulwanda uwo.