1 Maabaho Yoshua kawatanga hamwe wanhu wa kabila da Lubeni na wanhu wa kabila da Gadi na nusu ya kabila da Manase, 2 kawalongela, "Mutenda chila chinhu chiyalagilize Musa msang'hani wa Mndewa Mulungu na muzindilila chila chinhu chonimulagilizeni. 3 Hamuwalekile ndugu zenu siku nyingi izo mbaka diyelo, mbali muzindilila vinogile lagilizo da Mndewa Mulungu, Mulungu wenu. 4 Lelo Mndewa Mulungu, Mulungu wenu kaweng'ha tindiwalo ndugu zenu, fana viya viyalagane. Lelo bweleni kuna yamahema yenu kuna iisi yomwing'higwe na Musa msang'hani wa Mndewa Mulungu iwe yenu, isi ili kuumwambu wa lwanda lwa Yoludani. 5 Muiteganye muzindilile malagilizo na ndagilizi ziya ziyamulagilizileni Musa msang'hani wa Mndewa Mulungu. Kamulagilizani kumulonda Mndewa Mulungu, Mulungu wenu, mukale fana viyolonda na muzindilile malagilizo yake, mukale hamwe nayo na kumsang'hanila kwa moyo wose na kwa muhe wose." 6 Yoshua kawatemela mate na kawaleka wahite. 7 Musa kaweng'ha wawo nusu ya kabila da Manase uhazi muna iisi ya Bashani, mbali nusu yekaidi Yoshua kaweng'ha uhazi hagati ya ndugu zawo, kuumwambu wa lwanda lwa Yoludani ubanzi wa uswelo wa zuwa. Maabaho Yoshua viyawalekile wahite kuna yamahema yawo, kawatemela mate. 8 Maabaho kawalongela, "Bweleni na vinhu vingi muna yamahema yenu, ng'ombe wengi ng'hani na hela na zahabu na shaba na chuma na mawalo mengi ng'hani, ivo mwiigolele na ndugu zenu vinhu ivo vomupatile kwa wehi wenu."

9 Ivo wanhu wa kabila da Lubeni na Gadi na nusu ya kabila da Manase wabwela, walawa kwa Waisilaili uko Shilo, ili kuna iisi ya Kanaani, muladi wahite isi ya Gileadi, isi ya uhazi wawo, ikalile yawo, fana Mndewa Mulungu viyalagilize kufosela Musa.

10 Viwafikile kuna ulwanda lwa Yoludani viwakalile wang'hali muna iisi ya Kanaani, wanhu wa kabila da Lubeni na kabila da Gadi na nusu ya kabila da Manase, wazenga lupango lukulu ng'hani habehi na lwanda ulo. 11 Ivo wanhu wa makabila yamwenga ya Isilaili wahulika mbuli iyo kuwa kabila da Lubeni na kabila da Gadi na nusu ya kabila da Manase wakala wazenga lupango lukulu habehi na lwanda lwa Yoludani muna iisi ya Kanaani. 12 Waisilaili viwahulike mbuli iyo, waiduganya uko Shilo muladi waitowe nawo.

13 Mbali Waisilaili teng'hu wamtuma Finehasi mwana wa mkulu wa nhambiko Eleazali yahite uko Gileadi kwa wanhu wa kabila da Lubeni na kabila da Gadi na nusu ya kabila da Manase. 14 Finehasi kasegela hamwe na walangulizi longo, chila imwe kakala mulangulizi muna dikabila jake. 15 Nawo wahita kwa wanhu wa kabila da Lubeni na kabila da Gadi na nusu ya kabila da Manase uko Gileadi, wawalongela, 16 "Mting'hano wose wa Mndewa Mulungu wouza, ‘Uvwizi waki uno womumtendele Mulungu wa Isilaili? Habali mumulema Mndewa Mulungu kwa kuzenga lupango luno? 17 Vino uhasanyi wochitendile kuja Peoli haufaya? Ching'hali hachinaisafya, ingawa wanhu wa Mndewa Mulungu wapata hulo. 18 Lelo habali muleka kumsondelela Mndewa Mulungu? One muhamuleka Mndewa Mulungu diyelo, igolo kezawihila mting'hano wose wa Isilaili. 19 One isi yenu yambula mwiko, izoni muna iisi ya Mndewa Mulungu kodili hema jake na musole hanhu uko hamwe na cheye, mbali sekemumuleme Mndewa Mulungu na kuchitenda cheye chose chimulema kwa kuizengela lupango siyo uja wa Mndewa Mulungu, Mulungu wetu. 20 Vino Akani mwana wa Zela viyalekile kwaminika muna ivinhu vovilavigwe muladi vinangigwe, ludoko halulwakile Waisilaili wose? Akani kadanganika kwa ichimu cha uhasanyi wake, iviya kawatenda wanhu wamwenga wadanganike.’ "

21 Baho wanhu wa kabila da Lubeni na kabila da Gadi na nusu ya kabila da Manase wawedika walangulizi wa makabila ya Waisilaili, 22 "Mulungu yeli na Udahi, Mulungu, Mndewa Mulungu! Mulungu yeli na Udahi, Mulungu, Mndewa Mulungu! Kovimanya na kowatenda Waisilaili wose wavimanye. Fana kuno kumuleka Mndewa Mulungu hebu ubananzi, sekemuchikombole diyelo. 23 One chimuleka Mndewa Mulungu kwa kuzenga lupango lwetu wenyewo muladi chilave nhambiko za kutimbula na za usage na za tindiwalo, basi Mndewa Mulungu yachilihilizile. 24 Mbali haili ivo bule. Chizenga kwaviya chidumba yodahika siku zikwiza wanenu wezawalongela wanetu, ‘Mweye muimanyaze na Mndewa Mulungu, Mulungu wa Isilaili? 25 Hamuwona kuwa Mndewa Mulungu keka lwanda lwa Yoludani kuwa mhaka hagati ya mweye na cheye? Mweye wanhu wa kabila da Lubeni na kabila da Gadi mwabule fungu jojose kwa Mndewa Mulungu.’ Ivo hamwande wanenu wahadahile kuwasongeza wanetu waleke kumtambikila Mndewa Mulungu. 26 Lekamana chilamula kuzenga lupango luno, mbali siyo kwa ichimu cha kulavila nhosa uchanyha yake hebu nhambiko ya kutimbula, 27 mbali chilonda lupango luno luwe ukalangama hagati yetu na mweye na nyelesi zetu zikwiza, kuwa cheye cholondeka kumsang'hanila Mndewa Mulungu kwa nhambiko zetu za kutimbula na nhambiko zetu na nhambiko zetu za tindiwalo. Ivo siku zikwiza wanenu hawezadaha kuchilongela kuwa wanetu wabule fungu jojose kwa Mndewa Mulungu. 28 Kaidi chigesa kuwa one mbuli ino izalongigwa kumwetu hebu kwa nyelesi zetu kuna zisiku zikwiza, chizalonga, ‘Loleni simwe da lupango lwa Mndewa Mulungu, wowautendile tata zetu. Siyo kwa ichimu cha nhambiko ya kutimbula hebu nhambiko imwenga, mbali ukalangama hagati ya mweye na cheye.’ 29 Hachimulekile Mndewa Mulungu na kwaga diyelo na kuleka kumtambikila Mndewa Mulungu kwa kuzenga lupango kwa ichimu cha nhambiko ya kutimbula hebu nhosa za usage hebu nhambiko zimwenga, kutali na lupango lwa Mndewa Mulungu, Mulungu wetu, wili kuulongozi wa hema jake."

30 Baho mkulu wa nhambiko Finehasi na wakulu wa Waisilaili wose wakalile hamwe nayo, viwahulike mbuli izo za wanhu wa kabila da Lubeni na kabila da Gadi na nusu ya kabila da Manase, watogola. 31 Nayo Finehasi mwana wa mkulu wa nhambiko Eleazali kalonga nawo, kalonga, "Diyelo chovimanya kuwa Mndewa Mulungu kaubanzi wetu, kwaviya hamutendile uhasanyi kwa kumulema Mndewa Mulungu. Lelo muwakombola Waisilaili sekewatagusigwe na Mndewa Mulungu."

32 Maabaho Finehasi mwana wa mkulu wa nhambiko Eleazali, hamwe na walangulizi wayage wawalaga wanhu wa kabila da Lubeni na kabila da Gadi na wasegela kuna iisi ya Gileadi. Wabwela Kanaani kwa Waisilaili na kuwalongela mbuli izo. 33 Mbuli iyo iwanogela Waisilaili, wamwing'ha hewela Mndewa Mulungu na kuleka malungilo yawo ya kutenda ng'hondo na lungilo jawo da kunanga ng'hani isi yoikalile ya wanhu wa kabila da Lubeni na kabila da Gadi.

34 Wanhu wa kabila da Lubeni na kabila da Gadi walutanga lupango ulo, "Ukalangama." Walonga, "Lupango ulo ukalangama hagati yetu kuwa Mndewa Mulungu niiyo Mulungu."