1 Hanhu ha kabila da Yuda kwa kusondelela ng'holo zawo, handusila kusi mbaka muna imhaka ya Edomu. Kusi ng'hani ikala chuwala cha Sini. 2 Mhaka yawo ubanzi wa kusi yandusila ubanzi wa kusi wa Bahali ya Munyu. 3 Nayo igendelela ubanzi wa kusi wa kukwela kuhita Akilabimu. Maabaho igendelela mbaka Sini, maabaho ihita ubanzi wa kusi ya Kadeshi Balinea. Maabaho igendelela habehi ya Heziloni na ifika Adali na kuhinduka kuhita Kalika. 4 Maabaho igendelela mbaka Azimoni na kusondelela chizanda cha Misili mbaka kufika kuna ibahali ya Meditelaniya. Mhaka ya kusi ifosela baho. 5 Mhaka yawo ya ubanzi wa ulawilo wa zuwa ikala Bahali ya Munyu mbaka haja lwanda lwa Yoludani holwingilila muna ibahali. Mhaka yawo ubanzi wa kasikazi ikala kulawa chingobweda cha Bahali ya Munyu, hanhu haja lwanda lwa Yoludani holwingilila muna ibahali. 6 Mhaka iyo ifosela Besi Hogila na kasikazi ya Besi Alaba mbaka kuna idibwe da Bohani mwana wa Lubeni. 7 Maabaho igendelela mbaka Debili kuna Dibawe da Akoli na ihindukila kasikazi kusonhela Giligali, ili habehi na ngema ya Adumimu ili ubanzi wa kusi wa chizanda. Maabaho igendelela kuna zinzasa za Eni Shemeshi na ihelela Eni Logeli. 8 Maabaho mhaka iyo ifosela kuna dibawe da Hinomu, ubanzi wa kusi wa chilima cha Wayebusi, niiyo Yelusalemu, kuhita kuna inhembeti ya mulima uli ubanzi wa uswelo wa zuwa wa bawe da Hinomu na kufika ubanzi wa kasikazi wa bawe da Lefai. 9 Maabaho igendelela mbaka kuna zinzasa za Nefitoa mbaka kuna yamabululu ya mulima wa Efiloni. Baho mhaka ihinduka na kuhita Baala, niiyo Kiliasi Yealimu. 10 Izunguluka kulawa Baala kuhita ubanzi wa uswelo wa zuwa na kugendelela mbaka kumulima wa Seili, ifosela ubanzi wa kasikazi ya mulima wa Yelimu, niiyo Kesaloni, na kuhulumuka mbaka Besi Shemeshi hoifosele habehi na Timina. 11 Maabaho igendelela ubanzi wa kasikazi wa Ekiloni, izunguluka kuhita Shikiloni koifosile habehi na mulima wa Baala mbaka Yabineeli. Mhaka ihelela kuna ibahali ya Meditelaniya. 12 Mhaka ya ubanzi wa uswelo wa zuwa ikala bahali ya Meditelaniya. Ivo niivo zikalile mhaka za hanhu howeng'higwe wanhu wa kabila da Yuda kwa kusondelela ng'holo zawo.

13 Fana viya Mndewa Mulungu viyamulagilize Yoshua, kamwing'ha Kalebu mwana wa Yefune hanhu mwa wanhu wa Yuda, Kiliasi Aliba, niiyo Hebuloni. Aliba iyo niija yakalile tati yake Anaki. 14 Kalebu kaziwinga ng'holo nhatu za Waanaki zisegele hanhu baho, nazo zikala Sheshai na Ahimani na Talimai. 15 Kulawa Hebuloni kahita kuwatowa wakaya wa Debili, umwaka bululu ijo ditangigwa Kiliasi Sefeli. 16 Kalebu kalonga, "Mulume yoyose yondayadisole bululu da Kiliasi Sefeli, nizamwing'ha mndele wangu Akisa yawe muke wake." 17 Osinieli mwana wa Kenazi, yeli ndugu wa Kalebu, kadisola bululu ijo, ivo Kalebu kamwing'ha mwanage Akisa yawe muke wake. 18 Siku dimwe, Akisa viyezile kwa Osinaeli, kamulamba Osinaeli yampule mgunda tati yake Kalebu. Akisa kakala yakwelile chihongwe wake, viyakalile kohumuluka muna ichihongwe wake, Kalebu kamuuza, "Vino kolonda nikwing'he choni?" 19 Akisa kamwidika, "Nitemele mate, ning'he hanhu heli na nzasa za mazi kwaviya uko Negebu kouning'hile kuna ng'hangu." Ivo Kalebu kamwing'ha nzasa za mazi za ubanzi wa uchanyha na ubanzi wa hasi.

20 Uno uwo uhazi wa isi wa kabila da Yuda kwa kusondelela ng'holo zawo. 21 Mabululu yakalile ubanzi wa kusi ng'hani wa isi ya Yuda kuhita kuna imhaka ya Edomu yakala Kabiseeli na Edeli na Yaguli 22 na Kina na Dimona na Adada 23 na Kedeshi na Hazoli na Isinani 24 na Zifu na Telemu na Bealosi 25 na Hazoli Hadata na Keliosi Heziloni, niiyo Hazoli 26 na Amamu na Shema na Molada 27 na Hazali Gada na Heshimoni na Besi Peleti 28 na Hazali Shuali na Belisheba na Biziosiya 29 na Baala na Iyimu na Ezemu 30 na Elitoladi na Kesili na Holima 31 na Zikilagi na Madimana na Sansana 32 na Lebaosi na Shilihimu na Aini na Limoni. Mabululu yoweng'higwe yakala malongo maidi na kenda hamwe na vibululu vake.

33 Mabululu yakalile kuna dibawe, yakala Eshitaoli na Zola na Ashina 34 na Zanoa na Eni Ganimu na Tapua na Enamu 35 na Yalimusi na Adulamu na Soko na Azeka 36 na Shaalaimu na Adisaimu na Gedela na Gedelosaimu. Mabululu yoweng'higwe yakala longo na mane hamwe na vibululu vake.

37 Iviya weng'higwa mabululu ya Senani na Hadasha na Migidali Gadi 38 na Dileani na Misipa na Yokiseeli 39 na Lakishi na Bozikasi na Egiloni 40 na Kaboni na Lahimamu na Kisilishi 41 na Gedelosi na Besi Dagoni na Naama na Makeda. Mabululu yose yoweng'higwe yakala longo na sita hamwe na vibululu vake. 42 Iviya weng'higwa mabululu ya Libina na Eseli na Ashani 43 na Yifita na Ashina na Nezibu 44 na Keila na Akizibu na Malesha. Mabululu yose yoweng'higwe yakala kenda hamwe na vibululu vake. 45 Iviya weng'higwa Ekiloni hamwe na mabululu yake madododo na vibululu, 46 mabululu yose na vibululu vikalila habehi na Ashidodi kulawa Ekiloni mbaka bahali ya Meditelaniya. 47 Iviya kuna Ashidodi na Gaza hamwe na mabululu na vibululu vake, mbaka chizanda cha Misili na mhwani ya bahali ya Meditelaniya.

48 Mabululu yakalile kuna imilima yakala Shamili na Yatili na Soko 49 na Dana na Kiliasi Sana, niiyo Debili, 50 na Anabu na Eshitemoa na Animu, 51 Gosheni na Holoni na Gilo. Mabululu yose yoweng'higwe yakala longo na dimwe hamwe na vibululu vake. 52 Iviya weng'higwa mabululu ya Alabu na Duma na Eshani, 53 na Yanimu na Besi Tapua na Afeka, 54 na Humita na Kiliasi Aliba, niiyo Hebuloni, na Sioli. Mabululu yose yoweng'higwe yakala kenda hamwe na vibululu vake.

55 Iviya weng'higwa mabululu ya Maoni na Kalimeli na Zifu na Yuta 56 na Yezileeli na Yokideamu na Zanoa 57 na Kaini na Gibea na Timina. Mabululu yose yoweng'higwe yakala longo hamwe na vibululu vake.

58 Iviya weng'higwa mabululu ya Halihuli na Besi Suli na Gedoli 59 na Maalasi na Besi Anosi na Elitekoni. Mabululu yose yoweng'higwe yakala sita hamwe na vibululu vake. 60 Iviya weng'higwa Kiliasi Baali, bululu ijo iviya dotangigwa Kiliasi Yealimu, na Laba. Mabululu yoweng'higwe yakala maidi hamwe na vibululu vake.

61 Mabululu ya kuchuwala yakala Besi Alaba na Midini na Sekaka 62 na Nibishani na Bululu da Munyu na Engedi. Mabululu yose yoweng'higwe yakala sita hamwe na vibululu vake.

63 Mbali wanhu wa Yuda hawadahile kuwawinga Wayebusi, wowakalile wakaya wa Yelusalemu. Mbaka diyelo Wayebusi wang'hali wokala muna dibululu ijo hamwe na wanhu wa Yuda.