1 Wano wakala wafalume wowahumigwe na Waisilaili na kusola isi yawo yose yoikalile ubanzi wa ulawilo wa zuwa wa lwanda lwa Yoludani, kwandusila kudibawe da lwanda lwa Alinoni mbaka mulima wa Helimoni na isi yose ya Alaba ubanzi wa ulawilo wa zuwa. 2 Sihoni mfalume wa Waamoli yakalile uko Heshiboni na kutawala kwandusila Aloeli, bululu dikalile mumgwazogwazo wa bawe da Alinoni. Iviya katawala kwandusila hagati ya bawe mbaka lwanda lwa Yaboki lolukalile mhaka ya isi ya Waamoni, yaani nusu ya isi ya Gileadi. 3 Iviya katawala isi yose ubanzi wa ulawilo wa zuwa Alaba, kwandusila bahali ya Kinelesi, mbaka Besi Yeshimosi kuli Ibahali ya Munyu na kugendelela mbaka mulima wa Pisiga.

4 Iviya mhaka ya Ogu mfalume wa Bashani, yoyasigale mwa Walefai, yoyatawale uko Ashitalosi na Edilei. 5 Katawala kuna umulima wa Helimoni na uko Saleka na Bashani yose mbaka kuna imhaka ya Wageshuli na Wamaaka na nusu ya Gileadi, mbaka kuna imhaka ya Sihoni mfalume wa Heshiboni. 6 Musa msang'hani wa Mndewa Mulungu hamwe na Waisilaili wose, wawahuma wafalume wawo. Zisi izo kaweng'ha wanhu wa makabila ya Lubeni na Gadi na nusu ya kabila da Manase ziwe zawo.

7 Wano wafalume wowahumigwe na Yoshua na Waisilaili wose kuumwambu wa lwanda lwa Yoludani ubanzi wa uswelo wa zuwa, kwandusila Baali Gadi kuna dibawe da Lebanoni mbaka chilima cha Halaki, chochihita uko Seili. Yoshua kayagolela makabila ya Isilaili isi iyo iwe yawo. 8 Isi izo zikala hamwe na kuna imilima na isi ya bawe na uko Alaba na mahulumuko ya milima na kuchuwala na ubanzi wa Negebu, zisi zikalile za Wahiti na Waamoli na Wakanaani na Wapelizi na Wahivi na Wayebusi. 9 Wafalume wahumigwe wakala mfalume wa Yeliko na mfalume wa Ai, bululu dili habehi na Beseli 10 na mfalume wa Yelusalemu na mfalume wa Hebuloni 11 na mfalume wa Yalimusi na mfalume wa Lakishi 12 na mfalume wa Egiloni na mfalume wa Gezeli 13 na mfalume wa Debili na mfalume wa Gedeli 14 na mfalume wa Holima na mfalume wa Aladi 15 na mfalume wa Libina na mfalume wa Adulamu 16 na mfalume wa Makeda na mfalume wa Beseli 17 na mfalume wa Tapua na mfalume wa Hefeli 18 na mfalume wa Afeka na mfalume wa Lashaloni 19 na mfalume wa Madoni na mfalume wa Hazoli 20 na mfalume wa Shimiloni Meloni na mfalume wa Akishafi 21 na mfalume wa Taanaki na mfalume wa Megido 22 na mfalume wa Kedeshi na mfalume wa Yokineamu, bululu dili kuna umulima wa Kalimeli 23 na mfalume wa Doli muna umkowa wa Nafasi Dolo na mfalume wa Goiimu uko Giligali 24 na mfalume wa Tiliza. Wafalume wawo wose wakala malongo matatu na imwe.