1 Hanhu howeng'higwe welesi wa Yosefu handusila lwanda lwa Yoludani uko Yeliko, ulawilo wa zuwa kuna yamazi ya Yeliko na kufosela kuchuwala mbaka kuna iisi ya milima mbaka Beseli. 2 Kulawa Beseli mhaka isonhela Luzu ifosela Atalosi kowakalile Waaliki. 3 Maabaho ihulumuka uswelo wa zuwa kuna iisi ya Wayafileti mbaka Besi Holoni ya Hasi na Gezeli na kuhelela bahali ya Meditelaniya. 4 Welesi wa Yosefu, yaani kabila da Manase na kabila da Efulaimu weng'higwa isi iyo kuwa uhazi wawo.

5 Mhaka ya wana wa Efulaimu kwa kusondelela ng'holo zawo ikala vino, mhaka na uhazi wawo ubanzi wa ulawilo wa zuwa ikala Atalosi Adali mbaka Besi Holoni ya Uchanyha 6 na ihelela kuna ibahali ya Meditelaniya. Kwa ubanzi wa kasikazi mhaka ifosela Mikimesasi na kwa ubanzi wa ulawilo wa zuwa ihinduka na kuhita Taanasi Shilo koifosile ubanzi wa ulawilo wa zuwa mbaka Yanoa. 7 Kulawa Yanoa ihita mbaka Atalosi na Naala, mbaka kufika Yeliko na ihelela kuna ulwanda lwa Yoludani. 8 Kulawa Tapua, mhaka ihita uswelo wa zuwa mbaka chizanda cha Kana na kuhelela bahali ya Meditelaniya. Ino niiyo isi yoweng'higwe wanhu wa kabila da Efulaimu kwa kusondelela ng'holo zawo, 9 hamwe na mabululu na vibululu vowongezeligwe kulawa muna iisi ya kabila da Manase. 10 Waefulaimu hawawawingile Wakanaani wakalile Gezeli. Wakanaani wawo wagendelela kukala mwa wanhu wa Efulaimu mbaka diyelo, mbali wawangilizigwa kusang'hana sang'hano.