1 Wanhu wose viwakomeleze kuloka ulwanda lwa Yoludani, Mndewa Mulungu kamulongela Yoshua, 2 "Saguleni walume longo na waidi kulawa mwa Waisilaili, mulume imwe kulawa chila kabila, 3 na muwalagilize, ‘Soleni mabwe longo na maidi kulawa hano hagati ya lwanda lwa Yoludani, kulawa hano haili migulu ya wakulu wa nhambiko, yasoleni mabwe yayo mukayeke hanhu hondamugone diyelo.’ "

4 Ivo Yoshua kawatanga hamwe walume waja longo na waidi wowasaguligwe kulawa mwa Waisilaili, mulume imwe kulawa chila kabila. 5 Yoshua kawalongela, "Dilongoleleni sanduku da lagano da Mndewa Mulungu, Mulungu wenu, mbaka hagati ya lwanda lwa Yoludani. Chila imwe wenu yasole dibwe yageleke muna diyega jake, dibwe dimwe kwa chila kabila da Isilaili. 6 Mbuli iyo izakuwa chilaguso hagati yenu, siku zikwiza wanenu wahamuuzani, ‘Vino mabwe yano fambulo jake choni kumwenu?’ 7 Mwizawalongela, ‘Sanduku da lagano da Mndewa Mulungu vidifosezigwe lwanda lwa Yoludani, mazi ya lwanda ulo yatendigwa sekeyakilime!’ Ivo mabwe yano yezakuwa lukumbuso kwa Waisilaili siku zose."

8 Walume wa Isilaili watenda fana Yoshua viyawalagilize. Wasola mabwe longo na maidi hagati ya lwanda lwa Yoludani, dibwe dimwe kwa chila kabila da Isilaili, fana Mndewa Mulungu viyamulagilize Yoshua. Wahita nayo mbaka hanhu howagonile, wayeka uko. 9 Yoshua kasimika mabwe longo na maidi hagati ya lwanda lwa Yoludani, hanhu haja hoibojoge migulu ya wakulu wa nhambiko wapapile sanduku da lagano. Mabwe yayo yauko mbaka diyelo.

10 Wakulu wa nhambiko wapapile sanduku da lagano wema hagati ya lwanda lwa Yoludani mbaka chikomelezeke chila chinhu Mndewa Mulungu chiyamulagilize Yoshua yawalongele Waisilaili. Yoshua katenda mbuli zose ziyalagilizigwe na Musa. Wanhu walopola kuloka ulwanda. 11 Wanhu viwakomeleze kuloka, wawalola wakulu wa nhambiko na diya disanduku da lagano da Mndewa Mulungu vidiloka. 12 Walume wa kabila da Lubeni na kabila da Gadi na nusu ya kabila da Manase wawalongolela Waisilaili wayawo kuno wana silaha zawo, fana viwalagilizigwe na Musa. 13 Wanhu waja 40,000 wahawa na silaha waisasala kwa kuitowa ng'hondo, waloka haulongozi wa Mndewa Mulungu wosonhela bawe da bululu da Yeliko. 14 Siku iyo Mndewa Mulungu kamwinula Yoshua haulongozi wa Waisilaili wose, nawo wamuhishimu Yoshua siku zose za ugima wake fana viwamuhishimu Musa.

15 Maabaho Mndewa Mulungu kamulongela Yoshua, 16 "Walagilize wakulu wa nhambiko wapapile sanduku da lagano, walawe kuna ulwanda lwa Yoludani." 17 Ivo Yoshua kawalagiliza wakulu wa nhambiko waja, "Laweni muna ulwanda lwa Yoludani." 18 Wakulu wa nhambiko wapapile sanduku da lagano da Mndewa Mulungu viwalawile hagati ya lwanda lwa Yoludani na kubojoga mwiingema ya ulwanda, mazi ya lwanda lwa Yoludani yandusa kukilima kaidi na yamema fana ichanduso.

19 Muna isiku ya longo ya mwezi wa mwanduso, Waisilaili waloka ulwanda lwa Yoludani na weka lago uko Giligali, ubanzi wa ulawilo wa zuwa wa Yeliko. 20 Yoshua kayasimika mabwe yaja longo na maidi yowayasolile kuna ulwanda lwa Yoludani uko Giligali. 21 Maabaho Yoshua kawalongela Waisilaili, "Siku zikwiza wanenu wahamuuzani, ‘Mabwe yano fambulo jake choni?’ 22 Mwizawalongela, ‘Waisilaili waloka lwanda luno lwa Yoludani hanhu hanyalile.’ 23 Kwaviya Mndewa Mulungu, Mulungu wenu, kayanyaza yamazi ya lwanda lwa Yoludani kwa ichimu chenu mbaka chiloka, fana viyawatendele wanhu wetu kuna ibahali ya Shamu. 24 Katenda vino muladi wanhu wose wavimanye kuwa mkono wa Mndewa Mulungu una nguvu, muladi mumdumbe Mndewa Mulungu, Mulungu wenu, siku zose."