1 Viifosile miyaka mingi, Mndewa Mulungu kawanogela Waisilaili tindiwalo kwa kuwalava kulawa kwa wehi wawo wose wawazunguluke. Lusita ulo Yoshua kakala mulala ng'hani. 2 Yoshua kawatanga Waisilaili wose na walala wawo na walangulizi wawo na wasemi wawo na wakulu wawo, kawalongela, "Sambi nilala ng'hani. 3 Mweye muwona mbuli zose Mndewa Mulungu, Mulungu wenu ziyawatendele wanhu wa zisi zino zose kwa ichimu chenu. Mndewa Mulungu, Mulungu wenu, niiyo yawagombeleni. 4 Loleni, nimwing'hani zisi zino zisigale kusoligwa ziwe uhazi wa makabila yenu, kwandusila lwanda wa Yoludani mbaka bahali ya Meditelaniya. 5 Mndewa Mulungu, Mulungu wenu, kezawalava na kuwawinga haulongozi wenu. Mweye mwizaisola isi yawo, fana viya Mndewa Mulungu, Mulungu wenu, viyamulaganileni.

6 "Ivo mugangamale ng'hani kuzindilila mbuli zose zandikigwe muna ichitabu cha malagilizo ya Musa na sekemuzileke. 7 Sekemuihanganye na zisi zino zozisigale vimwili. Sekemuitambule milungu yawo na sekemuilahe kwa mazina ya milungu yawo na sekemuisang'hanile na sekemuitumbalile mavindi. 8 Mbali mwamhilileni Mndewa Mulungu, Mulungu wenu, fana vomutendile mbaka diyelo.

9 "Kwaviya Mndewa Mulungu kawawinga haulongozi wenu wanhu wa zisi ng'hulu zili na nguvu. Mbaka diyelo habule munhu yadahile kumtowani. 10 Imwe wenu kowawinga wanhu magana longo, kwaviya Mndewa Mulungu, Mulungu wenu, niiyo yomgombelani fana viyamulaganileni. 11 Ivo mwiiteganye, mulondeni Mndewa Mulungu, Mulungu wenu.

12 "Mbali muhabwela kuchisogo kwa kuihanganya na zisi zino zisigale vimwili, kusola kumwawo na wawo kusola kumwenu, 13 muvimanye ng'hani kuwa Mndewa Mulungu, Mulungu wenu, hezagendelela kuwawinga wanhu wa zisi zino haulongozi wenu, mbali wezakuwa ching'hwaso na mtego kumwenu. Wezakuwa fana balati da kumulanhileni na miwa ya kumuhomani yameso mbaka vondamunangigwe na kulawa muna iisi ino inogile iyamwing'hileni Mndewa Mulungu, Mulungu wenu.

14 "Sambi lusita lwangu lwa kudanganika fana viili kwa wanhu wose lwahabehi. Mbali mweye mose movimanya muna imizoyo yenu na mihe yenu kuwa muna ivilagano vose vinogile viyamulaganileni, Mndewa Mulungu, Mulungu wenu, chila chilagano chifikizigwa. Habule hata chimwe hachifikizigwe. 15 Mbali fana viya Mndewa Mulungu, Mulungu wenu, viyafikize vilagano vose vinogile voyamulaganileni, iviya kodaha kumgalilani mbuli zose zihili mbaka yamnangeni wose kulawa muna iisi ino inogile iyamwing'hileni. 16 One muhabena lagano da Mndewa Mulungu, Mulungu wenu, doyamulagilizeni, muhahita kusang'hanila milungu imwenga na kuitumbalila mavindi, Mndewa Mulungu kezamuwonelani ludoko na mwizanangigwa hima muna iisi ino inogile iyamwing'hileni."