1 Mfalume Yabini wa bululu da Hazoli viyahulike ivo, katuma usenga kwa mfalume Yobabu wa Madoni na mfalume wa Shimiloni na mfalume wa Akishafi, 2 na kwa wafalume wakalile kuna imilima ya ubanzi wa kasikazi, wowakalile Alaba yoikalile ubanzi wa kusi wa Kinelesi, kuna dibawe, na wakalile Nafasi Doli ubanzi wa uswelo wa zuwa. 3 Iviya katuma usenga kwa Wakanaani wakalile ubanzi wa ulawilo wa zuwa na uswelo wa zuwa wakala Waamoli na Wahiti na Wapelizi na Wayebusi wowakalile kuna imilima na kwa Wahivi wakalile hasi ya mulima wa Helimoni muna iisi ya Misipa. 4 Walawa wose na watowang'hondo wawo. Nawo wakala wengi fana msanga wa mhwani hamwe na mituka mingi na vihongwe wengi ng'hani. 5 Wafalume wano wose wailumba na kwika lago jawo kuna mazi ya Melomu muladi waitowe na Waisilaili.

6 Mndewa Mulungu kamulongela Yoshua, "Sekeuwadumbe wawo, kwaviya igolo lusita fana luno nizawananga wose kwa kuwaguma muna yamakono ya Waisilaili. Mwizakanha mige ya vihongwe wawo na kuitimbula matololi yawo kwa moto."

7 Ivo kwa kusinhukila Yoshua kalawilila hana inzasa ya Melomu hamwe na watowang'hondo wake wose na kuwatowa. 8 Mndewa Mulungu kawaguma muna yamakono ya Waisilaili, nawo wawatowa na kuwawinga mbaka Sidoni ng'hulu na Misilefosi Maimu, mbaka ubanzi wa ulawilo wa zuwa kuna dibawe da Misipa. Waisilaili wawatowa na kuwakoma wose. 9 Yoshua kawatendela fana Mndewa Mulungu viyamulagilize, kakanha mige ya falasi wawo na kutimbula matololi yawo kwa moto.

10 Yoshua kabwela lusita ulo na kusola bululu da Hazoli. Kamkoma mfalume wa bululu ijo kwaviya niiyo yakalile mulangulizi wa falume izo zose. 11 Nawo wawatowa kwa panga wanhu wose wakalile muna dibululu da Hazoli na wawananga ng'hani. Hasigazigwe munhu hata imwe. Maabaho kaditimbula kwa moto bululu da Hazoli. 12 Mabululu yose ya wafalume wawo na wafalume wake wose, Yoshua kawasola na kawakanha na panga na kuwananga ng'hani, fana viyalagilizigwe na Musa msang'hani wa Mndewa Mulungu. 13 Waisilaili hawayatimbule mabululu yakalile kuna ivilima, mbali bululu da Hazoli muhala doyaditimbule Yoshua. 14 Waisilaili wasola vinhu vose vowavitekile na wanyama wa mabululu yayo, mbali wawakoma wakaya wake wose, hawamulekile hata munhu imwe. 15 Fana Mndewa Mulungu viyamulagilize Musa msang'hani wake, iviya Musa kamulagiliza Yoshua, nayo Yoshua katenda ivo. Yoshua katenda chila chinhu Mndewa Mulungu chiyamulagilize Musa.

16 Yoshua na watowang'hondo wake waisola isi kulawa kasikazi mbaka kusi. Waisola isi ya vilima na milima midododo na isi yose ya Gosheni na Negebu hamwe na bawe da Yoludani, 17 kwandusila mulima Halaki wousonhele ubanzi wa Seili mbaka Baali Gadi kuna dibawe da Lebanoni hasi ya mulima Helimoni. Kawateka wafalume wawo wose, kawatowa na kuwakoma. 18 Yoshua kaitowa ng'hondo na wafalume wawo wose siku nyingi. 19 Habule hata bululu dimwe dikile chilagano cha tindiwalo na Waisilaili, mbali Gibeoni muhala, mowakalile Wahivi. Waisilaili wayateka mabululu yamwenga yose kwa kuitowa ng'hondo. 20 Kwaviya ikala niivo viyalondile Mndewa Mulungu mwenyewo kawatenda wanhu wa zisi izo wawe na mizoyo midala muladi waitowe. Kalonda sekewawoneligwe ubazi mbali wanangigwe. Ivo niivo Mndewa Mulungu viyamulagilize Musa.

21 Lusita ulo Yoshua kahita na kuwananga Waanaki wowakalile wokala kuna imilima uko Hebuloni na Debili na Anabu na isi yose ya milima ya Yuda na Isilaili. Yoshua kawananga wanhu wawo hamwe na mabululu yawo. 22 Habule Muanaki yoyose yasigalile muna iisi ya Isilaili, mbali wamwenga wasigala uko Gaza na Gasi na Ashidodi.

23 Ivo Yoshua kaisola isi yose fana viya Mndewa Mulungu viyamulagilize Musa na kaweng'ha Waisilaili iwe yawo. Waigolele kuwa uhazi wawo fana viyeli makabila yawo. Maabaho isi yose iwa zinziwa.