1 Wanhu wa kabila da Manase yeli mwana wa udele wa Yosefu, iviya weng'higwa hanhu hawo. Makili yeli mwana wa udele wa Manase na Gileadi tati yake, keng'higwa mabululu ya Gileadi na Bashani, kwaviya kakala galu kuna ing'hondo. 2 Wamwenga wasigale wa kabila da Manase weng'higwa hanhu hawo kwa kusondelela ng'holo zawo. Ng'holo izo zikala ziya za Abiezeli na Heleki na Asilieli na Shekemu na Hefeli na Shemida, wawo wose wakala welesi wa chilume wa Manase mwana wa Yosefu.

3 Mbali Selofehadi mwana wa Hefeli, mwana wa Gileadi, mwana wa Makili, mwana wa Manase, hakalile na wana wa chilume, mbali kakala na wana wa chike muhala, nawo wakala Mahila na Noa na Hogila na Milika na Tiliza. 4 Wandele wawo weza kwa mkulu wa nhambiko Eleazali na Yoshua mwana wa Nuni na walangulizi wamwenga, wawalongela, "Mndewa Mulungu kamulagiliza Musa yachigolele na cheye chose isi fana viwogoleligwa walume wa kabila jetu." Ivo fana viyalagilize Mndewa Mulungu, Yoshua kaweng'ha wanhu hanhu hawo fana viyaweng'hile walume wa kabila jawo. 5 Ivo kabila da Manase weng'higwa hanhu longo hamwe na isi ya Gileadi na Bashani ili ubanzi umwenga wa lwanda lwa Yoludani, 6 kwaviya wandele wa Manase weng'higwa hanhu hawo fana viwagoleligwe walume wa kabila jawo. Isi ya Gileadi weng'higwa welesi umwenga wa Manase.

7 Hanhu ha kabila da Manase handusila Asheli na kuhita mbaka Mikimesasi ulawilo wa zuwa wa Shekemu, maabaho mhaka yawo igendelela ubanzi wa kusi mbaka kuna iisi ya wakaya wa Eni Tapua. 8 Isi ya Tapua ikala ya Manase, mbali bululu da Tapua dodikalile muna imhaka, dikala da welesi wa Efulaimu. 9 Mhaka iyo igendelela mbaka chizanda cha Kana. Mabululu yoyakalile ubanzi wa kusi ya Kana yakala ya Waefulaimu ingawa ikala muna iisi ya kabila da Manase. Maabaho mhaka ifosela ubanzi wa kasikazi ya chizanda cha Kana na kuhelela kuna ibahali ya Meditelaniya. 10 Kabila da Efulaimu dikala ubanzi wa kusi na kabila da Manase dikala ubanzi wa kasikazi, mhaka yawo ikala bahali ya Meditelaniya. Wafika mbaka Asheli ubanzi wa kasikazi na kwenela mbaka Isakali ubanzi wa ulawilo wa zuwa. 11 Iviya muna iisi ya kabila da Isakali na kabila da Asheli, kabila da Manase ding'higwa mabululu ya Besi Sheani na Ibileamu hamwe na vibululu vake, hamwe na wanhu wa mabululu ya Doli na Eni Doli na Taanaki na Megido hamwe na vibululu vake, iviya selusi yoitangigwa Nafasi. 12 Mbali welesi wa Manase hawadahile kuwawinga wakaya wa mabululu yayo. Wakanaani wagendelela kukala umo. 13 Waisilaili viwapatile nguvu, hawadahile kuwawinga mbali waweka Wakanaani wasang'hane sang'hano za kuwangilizigwa.

14 Wanhu wa kabila da Yosefu wamulongela Yoshua, "Habali kuching'ha hanhu hamwe muhala ha isi? Mndewa Mulungu kachitemela mate na kachitenda chiwe wengi ng'hani."

15 Yoshua kawedika, "Kwaviya mweye muwa wengi, hata isi ya vilima va Efulaimu ndodo kumwenu, lelo hiteni kuna imbago kuna iisi ya Wapelizi na Walefai, mukaikang'hanhe mbago iyo muladi mukale uko." 16 Wanhu wa kabila da Yosefu wedika, "Isi ya milima haichifaya, mbali Wakanaani wose wokala kuna dikolongo wana mituka ya zuma, waja wose wokala Besi Sheani hamwe na vibululu vake na waja wokala muna dibawe da Yezileeli."

17 Mbali Yoshua kawalongela wana wa Yosefu, yaani kabila da Efulaimu na Manase, "Mweye muwa wengi na muna nguvu ng'hani, hanhu hamwe hahamfayani, 18 mbali isi ya milima izakuwa yenu. Ingawa sambi mbago, mwizaikang'hanha na kuisola yose, kwandusila ubanzi uno mbaka ubanzi umwenga. Mwizawawinga Wakanaani, hata fana wana nguvu na wana mituka ya zuma."