1 Mhiya yekaidi iwalagalila wanhu wa ng'holo za kabila da Simeoni na hanhu hawo ha isi hakala hazungulukigwa na hanhu ha kabila da Yuda. 2 Kabila da Simeoni dipata mabululu ya Belisheba na Sheba na Molada 3 na Hasali Shuali na Bala na Ezemu 4 na Elitoladi na Besuli na Holima 5 na Zikilagi na Besi Malikabosi na Hasali Susa 6 na Besi Lebaosi na Shaluheni. Mabululu yose yoweng'higwe yakala longo na matatu, hamwe na vibululu vake. 7 Iviya weng'higwa mabululu ya Aini Limoni na Eseli na Ashani. Mabululu yose yoweng'higwe yakala mane, hamwe na vibululu vake, 8 voviyazunguluke mabululu yayo mbaka Baalasi Beeli hebu Lama, niiyo Negebu. Uwo uhazi uweng'higwe wanhu wa ng'holo za kabila da Simeoni. 9 Kwaviya hanhu howeng'higwe wanhu wa kabila da Yuda hakala hakulu ng'hani, ivo hanhu hawo hamwenga weng'higwa wanhu wa kabila da Simeoni.

10 Mhiya yetatu iwalagalila wanhu wa ng'holo za kabila da Zabuloni. Hanhu hawo hakala mbaka Salidi. 11 Kulawa uko mhaka yake ihita uswelo wa zuwa mbaka Maleali, ifosela mumgwazo mwa Debeshesi na kuhita kuna ichizanda chili ulawilo wa zuwa wa Yokineamu. 12 Kulawa Salidi mhaka iyo igendelela ulawilo wa zuwa mbaka kuna imhaka ya Kisilosi Taboli, kulawa uko ifosa Dabelasi mbaka Yafia. 13 Maabaho igendelela mbaka ulawilo wa zuwa kuhita mbaka Gasi Hefeli mbaka ifika Esi Kasini, maabaho ilawilila uko Limoni na ihindukila Nea. 14 Ubanzi wa kasikazi mhaka ihinduka kuhita Hanasoni na kuhelela kuna dibawe da Yifitaheli. 15 Iviya weng'higwa mabululu ya Katasi na Nahalali na Shimiloni na Yidala na Beselehemu, mabululu yose yoweng'higwe yakala longo na maidi, hamwe na vibululu vake. 16 Uwo niuwo uhazi uweng'higwe wanhu wa ng'holo za Zabuloni kwa kusondelela ng'holo zawo, mabululu yayo hamwe na vibululu vake.

17 Mhiya yekane iwalagalila wanhu wa ng'holo za kabila da Isakali. 18 Hanhu baho hakala na mabululu ya Yezileeli na Kesulosi na Shunemu 19 na Hafalaimu na Shioni na Anahalasi 20 na Labisi na Kishioni na Ebesi 21 na Lemesi na Eni Ganimu na Eni Hada na Besi Pasesi. 22 Mhaka yawo ifika Taboli na Shahasamu na Besi Shemeshi na kuhelela kuna ulwanda lwa Yoludani. Mabululu yose yoweng'higwe yakala longo na sita, hamwe na vibululu vake. 23 Uwo niuwo uhazi uweng'higwe wanhu wa ng'holo za kabila da Isakali, mabululu yayo hamwe na vibululu vake.

24 Mhiya yetano iwalagalila wanhu wa ng'holo za kabila da Asheli. 25 Mabululu yawo yakala Helikasi na Hali na Beteni na Akishafi 26 na Alameleki na Amadi na Mishali, ubanzi wa uswelo wa zuwa ifika Kalimeli na Shiholi Libinasi. 27 Maabaho ihindukila ubanzi wa ulawilo wa zuwa kuhita Besi Dagoni koihakana na Zabuloni na bawe da Yifitaheli. Maabaho ihita kasikazi mbaka Besi Emeki na Neieli na igendelela mbaka Kabuli 28 na Ebiloni na Lehobu na Hamoni na Kana mbaka Sidoni Ng'hulu. 29 Maabaho mhaka ihinduka ihita Lama na ifika kuna dibululu da Tilo dodikalile na mhongono. Maabaho ihinduka kuhita Hosa na kuhelela kuna ibahali ya Meditelaniya. Mabululu yamwenga yakala Mahalabu na Akizibu 30 na Uma na Afeka na Lehobu. Mabululu yose yoweng'higwe yakala malongo maidi na maidi, hamwe na vibululu vake. 31 Uwo ni uhazi uweng'higwe wanhu wa ng'holo za kabila da Asheli, mabululu yayo hamwe na vibululu vake.

32 Mhiya yesita iwalagalila wanhu wa ng'holo za kabila da Nafutali. 33 Mhaka yake yandusila Helefu na mwaloni uli Zaananimu, ifosa Adami Nekebu na Yabineeli mbaka Lakumu na kuhelela kuna ulwanda lwa Yoludani. 34 Kulawa baho mhaka ihita uswelo wa zuwa kuhita Azinosi Taboli, maabaho ihita Hukoki na iiting'hana na ubanzi wa kusi wa hanhu ha kabila da Zabuloni, maabaho iiting'hana na hanhu ha kabila da Asheli ubanzi wa uswelo wa zuwa, maabaho iiting'hana na Yehuda. Ubanzi wa ulawilo wa zuwa mhaka ingilila muna ulwanda lwa Yoludani. 35 Mabululu yawo yakalile na mhongono ni Zidimu na Zeli na Hamasi na Lakasi na Kinelesi 36 na Adama na Lama na Hazoli 37 na Kedeshi na Edilei na Eni Hazoli 38 na Yiloni na Migidaleli na Holemu na Besi Anasi na Besi Shemeshi. Mabululu yose yoweng'higwe yakala longo na kenda, hamwe na vibululu vake. 39 Uwo uhazi uweng'higwe wanhu wa ng'holo za kabila da Nafutali, mabululu yayo hamwe na vibululu vake.

40 Mhiya yesaba iwalagalila wanhu wa ng'holo za kabila da Dani. 41 Hanhu hawo hakala na mabululu ya Zola na Eshitaoli na Ili Shemeshi 42 na Shaalabini na Aiyaloni na Yisila 43 na Eloni na Timina na Ekiloni 44 na Eliteke na Gibesoni na Baalasi 45 na Yehudi na Bene Belaki na Gasi Limoni 46 na Me Yalikoni na Lakoni na isi ikalile habehi na Yopa. 47 Wanhu wa kabila da Dani viwagize isi yawo, wahita kuwatowa wanhu wa bululu da Leshemu. Wawahuma na kuditeka dibululu. Viwakomeleze kuwakoma wakaya wose wa bululu ijo, wadisola na wadigalusa zina da bululu ijo kuwa Dani, zina dikalile da wasaho yawo. 48 Uwo uhazi uweng'higwe wanhu wa ng'holo za kabila da Dani, mabululu yayo hamwe na vibululu vake.

49 Viwakomeleze kuigola isi iwe uhazi, Waisilaili wamwing'ha uhazi Yoshua mwana wa Nuni hagati yawo. 50 Fana Mndewa Mulungu viyalagilize, wamwing'ha bululu diyapulile, bululu da Timinasi Sela muna iisi ya vilima va Efulaimu. Yoshua kadizenga kaidi bululu ijo na kukala umo.

51 Mkulu wa nhambiko Eleazali na Yoshua mwana wa Nuni, hamwe na makolo wa makabila ya Waisilaili wagola uhazi uwo kwa kutowa mhiya haulongozi wa Mndewa Mulungu, hana ihanhu ha kwingilila muna dihema da Mulungu uko Shilo. Ivo wakomeleza kuigola isi.