1 Maabaho Yoshua mwana wa Nuni kawatuma wanhu waidi kwa mvisa kulawa Shitimu wahite wakapelembe muna iisi haswa bululu da Yeliko. Wahita, wafika muna ikaye ya malaya imwe yatangigwe Lahabu, wakala umo.

2 Mfalume wa bululu da Yeliko kalongeligwa, "Lola, walume wa Waisilaili weza hano ichilo kuipelemba isi." 3 Mfalume wa Yeliko katuma wanhu kwa Lahabu, kalonga, "Uwalave kunze wanhu weli muna ikaye yako kwaviya weza kuipelemba isi yose." 4 Mbali mwanamke ija kawafisa walume wawo wa Waisilaili, kalonga, "Kweli wanhu wawo weza kumwangu mbali sivimanyile walawa kulihi. 5 Lusita luguhi lwa kuhinda lwivi lukulu lwa bululu, ziza vidingile, wanhu wawo wasegela. Kuwahitile niye sikumanyile, wasondeleleni hima mwizawapata." 6 Mbali kawakweza kudidungu na kawafisa kwa mabuwa yatandazigwe uchanyha kudidungu. 7 Wanhu waja watumigwe na mfalume wawawinza kwa kuwazahila kwa nzila yoihita kuna iviloko va lwanda wa Yoludani. Bahaja lusita viwasegele muna dibululu, lwivi lwa bululu luhindigwa.

8 Lahabu kahita kwa wapelembaji wawo ing'hali hawanagona, 9 kawalongela, "Nivimanya kuwa Mndewa Mulungu kamwing'hani isi ino, chomdumbani na wakaya wose wa isi ino wafa moyo kwa ichimu chenu. 10 Mana chihulika viya Mndewa Mulungu viyanyazile mazi ya bahali ya Shamu haulongozi wenu vimulawile kuna iisi ya Misili, na viya vimuwatendele wafalume waidi wa Waamoli na watowang'hondo wawo wowakalile kuumwambu wa lwanda lwa Yoludani, wafalume wawo wakala Sihoni na Ogu, falume zawo muzinanga. 11 Vichihulike mbuli izo, chifa moyo kwa ichimu chenu na nguvu zetu zitenyuka. Mndewa Mulungu, Mulungu wenu niiyo Mulungu wa kuulanga na muna iisi. 12 Nomulambani muilahe kwa zina da Mndewa Mulungu kuwa mwizanitendela kwa unovu niye na ndugu zangu fana viya niye vinimtendeleni kwa unovu na muning'he chilaguso cha kulagusa ukweli. 13 Nilaganileni kuwa mwizaleka kuwakoma tati yangu na mami yangu, lumbu zangu na mwali zangu na kaye zawo zose, na mwizachikombola muna iifa!"

14 Wapelembaji waja wamwidika Lahabu, "Ugima wenu niuwo ugima wetu! One hwizalonga mbuli yetu ya mviso, Mndewa Mulungu vondayaching'he isi ino, chizakutendela vinogile na kwa waminika."

15 Lahabu kawahulumusa wanhu wawo kwa luzabi kufosela muna dizonzo, kwaviya kaye yake ikala ng'huta imwe na nhumba ya bululu da Yeliko. 16 Kawalongela, "Hiteni kuna imilima mukaivise uko muladi wanhu womsondelelani sekewamfikeni. Kaleni uko siku nhatu, mbaka womsondelelani vondawabwele kuna dibululu, maabaho musegele." 17 Wanhu wawo wamulongela, "Chizafikiza chilaho chako choulongile chiilahe one uhatenda vinhu vino vondachikulongele. 18 Cheye na watowang'hondo wetu vondachize muna iisi ino, funga luzabi luno uludung'hu hana dizonzo douchihulumusile. Uwaduganye hano hamwako, tati yako na mami yako na lumbu zako na mwali zako na kaye yose ya tati yako. 19 Munhu yoyose yahalawa muna ikaye yako na kuhita yowegela, yahadanganika, cheye chabule ubananzi. Mbali munhu yoyose yondayawe muna ikaye yako yahadanganizigwa, ifa yake izakuwa mmwetu cheye. 20 One uhamulongela munhu yoyose mbuli yochiisang'hana, basi hachizafungigwa na chilaho choutendile chikulahile." 21 Nayo kawalongela, "Na iwe fana vimulongile." Maabaho kawaleka wahite, nawo wasegela. Nayo kafunga luzabi luja uludung'hu hana dizonzo.

22 Wapelembaji wawo wasegela na wahita kuna imilima. Wakala uko siku nhatu mbaka waja wakalile wowazahila wapotigwa kuwapata mnzila na wabwela kuna dibululu da Yeliko. 23 Maabaho wapelembaji wawo waidi wahulumuka kulawa kuna umulima, waloka ulwanda na wahita kwa Yoshua mwana wa Nuni, wamulongela mbuli zose ziwalawilile. 24 Wamulongela Yoshua, "Mndewa Mulungu katenda chiwahume wanhu wa isi yose. Kaidi wakaya wa isi iyo wadumba kwa ichimu chetu."