1 Wafalume wose wakalile kuumwambu wa lwanda lwa Yoludani muna iisi ya milima na kuna yamabawe na mhwani yose ya bahali ya Meditelaniya kuhita Lebanoni, wafalume wawo wakala mfalume wa Wahiti na mfalume wa Waamoli na mfalume wa Wakanaani na mfalume wa Wapelizi na mfalume wa Wahivi na mfalume wa Wayebusi, viwahulike mbuli za Waisilaili, 2 waiting'hana hamwe kwa lungilo dimwe muladi kuitowa ng'hondo na Yoshua na Waisilaili.

3 Mbali wakaya wa Gibeoni viwahulike mbuli ziya Yoshua ziyatendile Yeliko na Ai, 4 walamula kumvwizila. Wasasala ndiya, wakweza maguniya yasakale uchanyha ya vihongwe wawo na mifuko ya mbende ya kwikila divai isakale na kusonigwa. 5 Wavala vilatu na viwalo visakale na ndiya zawo zose zikala zinyala na kumung'hunyuka. 6 Wahita kwa Yoshua kuna dilago uko Giligali, wamulongela yeye na Waisilaili, "Cheye chilawa isi ya kutali ng'hani, ivo tendeni lagano na cheye." 7 Mbali Waisilaili wawalongela Wahivi, "Huwenda mokala habehi na cheye, lelo chodahaze kutenda lagano na mweye?" 8 Wamulongela Yoshua, "Cheye wasang'hani wako." Mbali Yoshua kawauza, "Mweye welihi na molawa kulihi?" 9 Wamwidika, "Cheye wasang'hani wako, chilawa isi ya kutali kwa ichimu cha Mndewa Mulungu, Mulungu wenu, kwaviya chihulika mbuli zake, mbuli zose ziyatendile muna iisi ya Misili, 10 na mbuli zose ziyawatendele kwa wafalume waidi wa Waamoli wakalile kuumwambu wa lwanda lwa Yoludani. Wawo wakala Sihoni mfalume wa Heshiboni na Ogu mfalume wa Bashani yakalile uko Ashitalosi. 11 Maabaho walangulizi wetu na wakaya wose wa isi yetu, wachilongela, ‘Soleni mhamba muhite mukaiting'hane na wanhu wawo na muwalongele, "Cheye wasang'hani wenu, lelo tendeni lagano na cheye." ’ 12 Dino gate jetu dochidisolile ding'hali moto lusita vichisegele kumwetu, mbali sambi digagadala na domung'hunyuka. 13 Mifuko ino ya mbende chiimemeza divai ing'hali yasambi, mbali sambi itulikatulika. Mawalo yetu na vilatu vetu visakala kwaviya mwanza ukala mtali ng'hani."

14 Waisilaili wahokela ndiya zimwenga kulawa kumwawo, mbali hawamuuzile Mndewa Mulungu. 15 Yoshua katenda tindiwalo hamwe nawo na katenda nawo lagano muladi sekewakomigwe. Walangulizi wa Isilaili wawalahiza kutenda fana viwailagane.

16 Vizifosile siku nhatu viwakomeleze kutenda nawo lagano, Waisilaili wahulika kuwa wanhu wawo wakala wakaya wayawo na wakala habehi nawo. 17 Ivo Waisilaili wandusa mwanza na vizifosile siku nhatu wafika muna yamabululu ya wanhu wawo. Mabululu yayo yakala Gibeoni na Kefila na Beelosi na Kiliasi Yealimu. 18 Mbali Waisilaili hawawakomile, kwaviya walangulizi wa kabila da Waisilaili wakala wawalahiza kwa zina da Mndewa Mulungu, Mulungu wa Isilaili. Ivo mting'hano wose wawalongelelela walangulizi wawo. 19 Mbali walangulizi wa Waisilaili wawalongela wanhu wose, "Kwaviya chiwalahiza kwa zina da Mndewa Mulungu, Mulungu wa Isilaili, hachidaha kuwadalisa. 20 Chizawatendela vino na chizawaleka wawe wagima, muladi sekechitagusigwe kwa ichimu cha chilaho chochiwalahile." 21 Walangulizi wagendelela kulonga, "Walekeni wawe wagima." Ivo Wagibeoni wakala wowasang'hanila Waisilaili wose kwa kuwalondela ngodi na kuwadehela mazi, fana viwalongile walangulizi wa Waisilaili.

22 Yoshua kawatanga Wagibeoni na kawauza, "Habali muchivwizila kuwa mulawa isi ya kutali ng'hani humbe mokala bahano? 23 Lelo muduwiligwa, wamwenga wenu wezakuwa watumwa wa siku zose na kukanha ngodi na kudeha mazi kwa ichimu cha kaye ya Mulungu wangu."

24 Wawo wamwidika Yoshua, "Cheye wasang'hani wako chilongeligwa viya Mndewa Mulungu, Mulungu wako viyamulagilize msang'hani wake Musa yawanange wakaya wose wa isi ino na yamwing'heni mweye isi ino iwe yenu. Ivo chidumba ng'hani kwa ichimu cha ugima wetu, lekamana chitenda mbuli ino. 25 Sambi cheye chamuna yamakono yako. Chitendele chochose chouwona chinoga na chigoloka kumwako." 26 Yoshua kawatendela ivo, kawakombola kulawa muna yamakono ya Waisilaili muladi sekewanangigwe, ivo hawawakomile. 27 Kwandusila siku iyo, Yoshua kawatenda wawo wawe walondaji wa ngodi na wadehaji wa mazi wa Waisilaili wose na wa lupango lwa Mndewa Mulungu, hanhu hohose hoyohasagula Mndewa Mulungu mbaka diyelo.