1 Mfalume Adoni Sedeki wa Yelusalemu kahulika viya Yoshua viyaditekile bululu da Ai na kudinanga ng'hani, kaditendela bululu ijo na mfalume wake fana viyaditendele bululu da Yeliko na mfalume wake. Iviya kahulika kuwa wakaya wa Gibeoni watenda chilagano cha tindiwalo na Waisilaili na kuwa sambi wokala kumwawo. 2 Mbuli izo ziwatenda wanhu wa Yelusalemu wadumbe kwaviya bululu da Gibeoni dikala kulu ng'hani muna yamabululu ya chifalume. Iviya bululu dino dikala kulu ng'hani kufosa bululu da Ai, walume wose wakalile umo wakala watowang'hondo. 3 Ivo mfalume Adoni Sedeki katuma usenga kwa mfalume Hohamu wa Hebuloni na mfalume Pilamu wa Yalimusi na mfalume Yafia wa Lakishi na mfalume Debili wa Egiloni. 4 Kawalongela, "Izoni munitaze chiwatowe Wagibeoni, kwaviya watenda chilaho cha tindiwalo na Yoshua hamwe na Waisilaili." 5 Maabaho wafalume wawo watano wa Waamoli, mfalume wa Yelusalemu na mfalume wa Hebuloni na mfalume wa Yalimusi na mfalume wa Lakishi na mfalume wa Egiloni, wawaduganya hamwe wakalizi wawo, wahita nawo mbaka Gibeoni, weka lago kudizinga bululu ijo, wawatowa.

6 Wagibeoni watuma usenga kwa Yoshua kuna dilago uko Giligali, wamulongela, "Chokulamba, sekeuchase cheye wasang'hani wako, izo hima uchitaze na kuchikombola mana wafalume wose wa Waamoli kulawa isi ya milima weza kuchitowa."

7 Ivo Yoshua hamwe na watowang'hondo wake wose na magalu wasegela Giligali. 8 Mndewa Mulungu kamulongela Yoshua, "Sekeuwadumbe hata chidogo mana niwaguma muna yamakono yako, habule hata imwe yondayadahe kuigombela haulongozi wako." 9 Ivo Yoshua kawalawila kwa kusinhukila, kwaviya kagenda kulawa Giligali ichilo chose. 10 Mndewa Mulungu kawatenda Waamoli wawadumbe Waisilaili, wowawakomile wanhu wengi uko Gibeoni, wawawinga na wawatowa muna inzila ya bawe da Besi Holoni mbaka Azeka na Makeda. 11 Viwakalile wowakimbila Waisilaili kuna dibawe da Besi Holoni, Mndewa Mulungu kawagalila mvula ya mabwe makulu viwakalile muna inzila mbaka Azeka. Wanhu wakomigwe kwa mabwe yayo wakala wengi kufosa wakomigwe kwa silaha za Waisilaili.

12 Mndewa Mulungu viyawatendile Waamoli wahumigwe na Waisilaili, Yoshua kampula Mndewa Mulungu haulongozi wa Waisilaili wose, kalonga,

"Weye zuwa ima hupi uchanyha ya Gibeoni,

weye mwezi, muna dibawe da Aiyaloni."

13 Zuwa dima hupi na mwezi wima mbaka Waisilaili viwawalihilize wehi wawo. Fana viyandikigwe muna ichitabu cha Yashali, zuwa dima hupi hagati ya ulanga. Dileka mwanza wake wa kuhita kwingila siku yose. 14 Siku ilingile ivo hainalawilila hebu hainawoneka kaidi, siku Mndewa Mulungu iyamwidikile munhu vilingile ivo, kwaviya Mndewa Mulungu mwenyewo kawagombela Waisilaili.

15 Maabaho Yoshua kabwela kuna dilago uko Giligali hamwe na Waisilaili wose.

16 Wafalume waja watano wakimbila na kuifisa muna dituka da Makeda. 17 Yoshua kalongeligwa, "Wafalume watano watoligwa, waifisa muna dituka da Makeda." 18 Nayo Yoshua kalonga, "Bimbiliseni mabwe makulu hana umulomo wa dituka ijo na muweke wanhu wadikalize. 19 Mweye wenyewo sekemukale uko, mbali muwasondelele wehi wenu. Muwatowe kulawa ubanzi wa kuchisogo na sekemuwaleke wengile muna yamabululu yawo, kwaviya Mndewa Mulungu, Mulungu wenu, kawaguma muna yamakono yenu." 20 Yoshua hamwe na Waisilaili wawatowa na kuwananga wengi, wadodo wasigalile wakimbilila kuna yamabululu yawo yeli na mhongono. 21 Waisilaili wose wabwela vinogile kwa Yoshua kuna dilago uko Makeda, habule munhu yagezile kulonga mbuli yoyose ihile kusonhela Waisilaili.

22 Maabaho Yoshua kalonga, "Segezeni yamabwe hana umulomo wa dituka na munigalile waja wafalume watano hano hanze ya dituka." 23 Nawo watenda ivo, wawagala waja wafalume watano kunze ya dituka, mfalume wa Yelusalemu na mfalume wa Hebuloni na mfalume wa Yalimusi na mfalume wa Lakishi na mfalume wa Egiloni. 24 Maabaho viwamgalile Yoshua wafalume wawo watano kunze, Yoshua kawatanga walume wose wa Isilaili, kawalongela walangulizi wa watowang'hondo wowahitile nayo, "Kwenhukeni habehi, muwabojoge zisingo wafalume wano." Nawo wakwenhuka habehi na wabojoga zisingo za wafalume. 25 Yoshua kawalongela, "Sekemudumbe na sekemufe moyo. Muwe wagangamavu na magalu, kwaviya niivo Mndewa Mulungu vondayawatendele wehi wenu wose womuitowa nawo." 26 Maabaho Yoshua kawatowa na kuwakoma. Kawatumbika muna imibiki mitano, watumbikigwa muna imibiki iyo mbaka ichigulogulo. 27 Zuwa vidihongile, Yoshua kalagiliza wahulumusigwe, nawo wawahulumusa muna imibiki iyo na kuwasa muna dituka diya dowakalile waifisa. Maabaho weka mabwe makulu hana umulomo wa dituka, mabwe yayo yauko mbaka diyelo.

28 Siku iyo Yoshua viyaditekile bululu da Makeda, kamkoma mfalume wa bululu ijo na wakaya wake wose bila kumsigaza munhu hata imwe. Kamtendela mfalume wa Makeda fana viya viyamtendele mfalume wa Yeliko.

29 Maabaho kulawa Makeda, Yoshua hamwe na Waisilaili wose wahita bululu da Libina kuditowa. 30 Mndewa Mulungu kadiguma bululu ijo hamwe na mfalume wawo muna yamakono ya Waisilaili, wawakoma wakaya wake bila kumsigaza munhu hata imwe. Wamtendela mfalume wa Libina fana viwamtendele mfalume wa Yeliko.

31 Maabaho Yoshua na Waisilaili wose walawa Libina na wahita Lakishi, wadizinga bululu ijo na kuditowa. 32 Mndewa Mulungu kadiguma bululu ijo muna yamakono ya Waisilaili, siku yekaidi waditeka. Wawakoma wakaya wose wa bululu ijo fana viwatendile kuja Libina.

33 Maabaho mfalume Holamu wa Gezeli kalamula kwiza kuwataza wanhu wa Lakishi. Mbali Yoshua kamkoma hamwe na wanhu wake wose. Hamsigaze hata munhu imwe.

34 Maabaho kulawa Lakishi, Yoshua na Waisilaili wose wahita Egiloni, wadizinga na kuditowa dibululu ijo. 35 Waditeka siku iyo iyo na kuwakoma wakaya wake wose fana viwatendile kuja Lakishi.

36 Maabaho kulawa Egiloni, Yoshua na Waisilaili wose wahita mbaka Hebuloni, waditowa bululu ijo na waditeka. 37 Wawakoma wakaya wake wose hamwe na mfalume wawo. Wayatowa ng'hani mabululu yamwenga yeli mumgwazogwazo na wawakoma wakaya wake wose fana viwatendile kuja Egiloni. Na hasigale hata munhu imwe.

38 Maabaho Yoshua na Waisilaili wose wahinduka wabwela kuna dibululu da Debili na waditowa. 39 Waditeka bululu ijo na mfalume wake hamwe na mabululu yamwenga yose yeli mumgwazogwazo, wawakoma wanhu wose weli umo bila kumsigaza hata munhu imwe. Waditendela bululu ijo fana viwaditendele bululu da Hebuloni na bululu da Libina na wafalume wawo.

40 Yoshua kawatowa wanhu wose wa isi iyo, isi ya vilima na isi ya Negebu na isi ya milima midododo na isi ya mabawe na wafalume wose. Hamsigaze hata munhu imwe, mbali kawananga wose wakalile wagima, fana Mndewa Mulungu, Mulungu wa Isilaili viyalagilize. 41 Yoshua kawahuma wanhu wose kwandusila Kadeshi Balinea mbaka Gaza, na isi ya Gosheni mbaka Gibeoni. 42 Yoshua kaisola isi ino yose na wafalume wawo kwa mwanza umwe, kwaviya Mndewa Mulungu, Mulungu wa Isilaili kawagombela Waisilaili. 43 Ivo Yoshua kabwela mbaka kuna dilago uko Giligali, hamwe na Waisilaili wose.