1 Maabaho Mndewa Mulungu kamulongela Yoshua, 2 "Walongele Waisilaili, ‘Saguleni mabululu ya kukimbilila, fana vinimulagilizeni kufosela Musa, 3 muladi munhu yoyose yahamkoma munhu bila kwiilunga hebu bila kuvimanya, yakimbilile uko. Hanhu baho hezakuwa ha kukimbilila kumwenu muladi kumbanga munhu ija yolihiliza ukomaji uwo. 4 Mkomaji kezakimbilila muna dibululu dimwe na kwima hana ihanhu ha kwingilila muna dibululu na kuwalongela walala wa bululu ijo mbuli yake. Walala wezamuhokela na kumwing'ha hanhu ha kukala hamwe nawo. 5 One munhu ija wa kulihiliza chisasi yahampelemba mbaka kuna dibululu, walala wawo hawatogoleligwa kumulava mkomaji iyo kwa munhu ija wa kulihiliza. Kwaviya iyo kamkoma miyage bila kwiilunga na hawaihile baho haichanduso. 6 Mkomaji kezakala umo muna dibululu da kukimbilila mbaka baho vondayahumizigwe haulongozi wa mting'hano na iviya mbaka baho ija mkulu wa nhambiko digogogo yoyakalile mtawala vondayadanganike. Maabaho, munhu iyo kodaha kubwela kuna dibululu jake diyalawile viyakimbile.’ "

7 Nawo waika hakwe Kadeshi ili Galilaya kuna umulima wa isi ya Nafutali na Shekemu ili kuna umulima wa isi ya Efulaimu na Kiliasi Aliba, niiyo Hebuloni kuna umulima wa isi ya Yuda. 8 Kuumwambu wa lwanda wa Yoludani, ubanzi wa ulawilo wa zuwa wa bululu da Yeliko, wasagula bululu da Beseli dili muna ichuwala cha bawe, dili da kabila da Lubeni. Iviya wasagula bululu da Lamosi uko Gileadi muna dikabila da Gadi na Golani uko Bashani hana ihanhu ha kabila da Manase. 9 Yano mabululu yekigwe kwa ichimu cha wanhu wose wa Isilaili na nyambenyambe wowokala hamwe nawo, muladi munhu yoyose yondayamkome miyage bila kwiilunga, yakimbilile uko muladi sekeyakomigwe na munhu yolihiliza chisasi, mbaka baho vondayatagusigwe haulongozi wa mting'hano.