1 Lwivi lukulu lwa bululu da Yeliko ukala uhindigwe kwa mgati muladi Waisilaili sekewengile. Habule munhu yadahile kwingila hebu kulawa muna dibululu ijo. 2 Mndewa Mulungu kamulongela Yoshua, "Lola, nikwing'ha bululu da Yeliko, hamwe na mfalume wake na wakalizi wake weli na nguvu. 3 Weye na wanhu waja weli na silaha mwizadizunguluka bululu ijo mwanza umwe chila siku kwa siku sita. 4 Wakulu wa nhambiko saba, chila mkulu wa nhambiko yasole mhalati ya hembe da bebelu da ng'hondolo, wezadilongolela sanduku da lagano. Siku yesaba mwizadizunguluka bululu ijo miyanza saba, kuno wakulu wa nhambiko wotowa mhalati. 5 Vondawatowe mhalati izo kwa dizi kulu na muhahulika dizi ijo, wanhu wose wezaguta nyangi, ng'huta za bululu zizalagala. Wanhu wezakwingila dimwe kwa dimwe mudibululu, chila munhu hanhu hake."

6 Ivo Yoshua mwana wa Nuni kawatanga wakulu wa nhambiko na kawalongela, "Papeni sanduku da lagano da Mndewa Mulungu na wakulu wa nhambiko saba wasole mhalati za mahembe ya bebelu da ng'hondolo wadilongolele disanduku ijo." 7 Maabaho kawalongela wanhu, "Hiteni kuulongozi mkadizunguluke bululu, wanhu weli na silaha wadilongolele sanduku da lagano da Mndewa Mulungu."

8 Yoshua viyalongile na wanhu, wakulu wa nhambiko weli na mhalati saba za mhembe za bebelu da ng'hondolo haulongozi wa Mndewa Mulungu, wahita kuulongozi na watowa mhalati izo, maabaho sanduku da lagano da Mndewa Mulungu diwasondelela. 9 Wanhu waja weli na silaha wawalongolela waja wakulu wa nhambiko wakalile wotowa mhalati na wakalizi wamwenga wasondelela kuchisogo cha sanduku ijo, kuno mhalati zolila ulo kwa ulo. 10 Mbali Yoshua kawalagiliza wanhu, "Sekemugute na kulava madizi yenu, hebu sekemulonge mbuli yoyose, mbaka siku vondanimulongeleni mugute nyangi, lusita ulo niulo londamugute nyangi." 11 Ivo Yoshua kawatenda wanhu waja wazunguluke bululu mwanza umwe kuno wapapa sanduku da lagano da Mndewa Mulungu na ichilo wabwela kugona kuna dilago.

12 Maabaho Yoshua kalamka chilochilo, wakulu wa nhambiko wadipapa diya disanduku da lagano da Mndewa Mulungu. 13 Waja wakulu wa nhambiko saba weli na mhalati saba za mahembe ya bebelu da ng'hondolo, wadilongolela sanduku da Mndewa Mulungu kuno wotowa mhalati ulo kwa ulo. Wanhu weli na silaha wadilongolela sanduku da Mndewa Mulungu na wakalizi wamwenga wasondelela kuchisogo. Mhalati zigendelela kutowigwa. 14 Siku yekaidi wadizunguluka bululu ijo mwanza umwe, maabaho wabwela kuna dilago. Watenda ivo kwa siku sita.

15 Siku yesaba walamka chilochilo wadizunguluka bululu ijo fana viwatendile ichanduso. Ikala siku iyo muhala wadizunguluka bululu miyanza saba. 16 Viifikile mwanza wesaba, wakulu wa nhambiko viwatowile mhalati, Yoshua kawalongela wanhu, "Guteni kwaviya Mndewa Mulungu kamwing'hani bululu dino. 17 Bululu ijo dizanangigwa na vinhu vose vili umo kwaviya dikigwa kwa Mndewa Mulungu muhala. Lahabu ija imalaya niiyo yondayasigale hamwe na waja weli muna ikaye yake, kwaviya kawafisa wapelembaji wetu. 18 Mbali sekemusole chinhu chochose chikigwe kwa Mndewa Mulungu muhala muladi chinangigwe. Muhasola chinhu chochose chikigwe kwa sang'hano yelile muladi chinangigwe, mwizatenda lago da Waisilaili kuwa chinhu cha kunangigwa na kuigalila magayo. 19 Mbali vinhu vose vovitendigwa na hela na zahabu na via va shaba na chuma, vela kwa Mndewa Mulungu, ivo vizakwikigwa muna ingama ya Mndewa Mulungu."

20 Ivo wanhu waguta nyangi na mhalati zitowigwa. Wanhu viwahulike mhalati waguta nyangi ng'hani, ng'huta za bululu zigwa hasi ng'hani. Ivo chila munhu kalawa hanhu hoyemile, wengila muna dibululu na wadisola. 21 Wawakoma wanhu wose wa bululu ijo kwa panga, walume na wanaake, wabwanga na walala, ng'ombe na ng'hondolo na vihongwe.

22 Yoshua kawalongela waja walume waidi waipelembe isi iyo, "Hiteni kuna ikaye ya malaya ija, mumulave kunze yeye na ndugu zake wose fana vimumulahile." 23 Wapelembaji waja wahita na wamulava Lahabu na tati yake na mami yake na ndugu zake na wanhu wose weli muna ikaye yake, waweka kunze ya lago da Isilaili. 24 Maabaho waditimbula dibululu kwa moto na chila chinhu chili umo, mbali weka hela na zahabu na via va shaba na chuma, ivo vikigwa muna ingama ya Mndewa Mulungu. 25 Mbali Yoshua kamulopola Lahabu hamwe na wanhu wose wa muna ikaye ya tati yake na wanhu wose wakalile nayo. Lahabu kokala mwa Waisilaili mbaka diyelo, kwaviya kawafisa wasenga waja Yoshua woyawatumile wahite kudipelemba bululu da Yeliko.

26 Yoshua kawalahila wanhu kalonga,

"Yondayadizenge kaidi bululu da Yeliko,

yaduwiligwe na Mndewa Mulungu,

yoyose yondayeke chandusilo cha bululu ijo,

mwanage wa udele nayadanganike,

yoyose yondayazenge lwivi lwa bululu ijo,

mzuwanda wake nayadanganike."

27 Ivo Mndewa Mulungu kakala hamwe na Yoshua na nhogolwa zake zenela chila hanhu muna iisi.