1 Mndewa Mulungu kamulongela Yoshua, "Sekeudumbe na sekeufe moyo, uwasole watowang'hondo wako wose uhite kuna dibululu da Ai, kwaviya mfalume wa Ai nimtenda umuhume, hamwe na wanhu wake na bululu jake na isi yake. 2 Mwizaditendela bululu da Ai hamwe na mfalume wake fana viya vimuditendele bululu da Yeliko hamwe na mfalume wake. Mbali vinhu vake hamwe na wanyama wake vondamuvisole vizakuwa venu. Hiteni mukadivamie bululu kwa kusinhukiza kulawa ubanzi wa kuchisogo." 3 Ivo Yoshua kenuka hamwe na watowang'hondo wake wose muladi wahite Ai. Yoshua kasagula wanhu 30,000 weli magalu na weli na nguvu, kawatuma ichilo. 4 Kawalagiliza, "Mwizadisepa dibululu kulawa ubanzi wa kuchisogo. Sekemuhite kutali ng'hani na dibululu, mbali muisasale lusita lose. 5 Niye hamwe na wanhu wose weli hamwe na niye, chizadikwenhukila dibululu. Wanhu wahalawa kunze na kuchitowa fana viwatendile ichanduso, chizawakimbila. 6 Wezachisondelela mbaka wawe kutali na bululu jawo, kwaviya wezagesa wachiwinga fana viwatendile ichanduso, chizawakimbila. 7 Baho mweye mwizalawa uko komukalile modisepa na kuditeka dibululu, kwaviya Mndewa Mulungu, Mulungu wenu kezatenda mudihume bululu ijo. 8 Vondamukomeleza kuditeka dibululu, ditimbuleni kwa moto. Tendeni fana viyalagilize Mndewa Mulungu, loleni nimulagilizani." 9 Yoshua kawatuma wanhu waja 30,000 wahite hanhu hawo ha kusepa, nawo wakala ubanzi wa uswelo wa zuwa wa bululu da Ai hagati ha bululu da Ai na Beseli. Mbali Yoshua ichilo icho kagona muna dilago da Waisilaili.

10 Yoshua kalamka chilochilo, kawaduganya wanhu na wahita bululu da Ai, yeye hamwe na walangulizi wa Waisilaili wakala haulongozi wa Waisilaili. 11 Watowang'hondo wose wowamsondelele wadikwenhukila dibululu na kwika lago ubanzi wa kasikazi wa bululu ijo, kuumwambu wa dikolongo habehi na bululu da Ai. 12 Kawasola wanhu 5,000 na kawatuma wakasepe hagati ya bululu da Beseli na Ai, uswelo wa zuwa wa bululu da Ai. 13 Bumbila kulu dikigwa ubanzi wa kasikazi wa bululu na wasigalile wekigwa ubanzi wa uswelo wa zuwa wa bululu. Mbali ichilo icho, Yoshua kagona kudikolongo.

14 Mfalume wa bululu da Ai viyawonile ivo, yeye na wanhu wake wose walopola kuhita kuna dikolongo da kuhita Alaba muladi yakaitowe na Waisilaili. Havimanyile kuwa bululu jake dikala dosepigwa kwa kuchisogo. 15 Maabaho Yoshua na wanhu wake watenda fana wapotigwa, wandusa kukimbila kuhita kuchuwala. 16 Ivo wanhu wose wakalile muna dibululu watangigwa muladi wawasondelele Waisilaili, viwakalile womsondelela Yoshua wahita kutali na bululu jawo. 17 Habule munhu yoyose yasigalile muna dibululu da Ai hebu Beseli, wazileka nyivi za bululu ijo ng'hwaa na wahita kuwasondelela Waisilaili.

18 Maabaho Mndewa Mulungu kamulongela Yoshua, "Mgoha wako usonhele kuna dibululu da Ai, mana nizatenda udihume bululu ijo." Ivo Yoshua kausonhela mgoha wake kuna dibululu da Ai. 19 Bahaja Yoshua viyatendile ivo, bumbila da wanhu wakalile wosepa dibululu walawilila himahima na kwingila muna dibululu. Waditeka dibululu na kuditimbula kwa moto. 20 Wanhu wa bululu da Ai viwalolile kuchisogo wawona yosi dolawa muna dibululu dokwela uchanyha kuulanga, nawo hawawile na nguvu na kukimbila ubanzi wowose mana Waisilaili wawahindukila waja wakalile wowasondelela. 21 Yoshua na Waisilaili wose viwawone kuna bumbila dikalile dosepa diteka dibululu, na kuwa yosi dikala dokwela kuulanga, wawahindukila na wandusa kuwakoma wanhu wa Ai. 22 Waisilaili wasigalile muna dibululu walawa, mbali wanhu wose wa Ai wakala wazingigwa na Waisilaili, nawo wakomigwa. Hasigale hata munhu imwe. 23 Mbali mfalume wa bululu da Ai kagwiligwa yang'hali mgima na kagaligwa kwa Yoshua.

24 Waisilaili viwakomeleze kuwakoma watowang'hondo wa bululu da Ai uko kuchuwala kowawasondelele, wabwela bululu da Ai na kuwakoma wose wasigalile umo. 25 Wanhu wose wa Ai wakomigwe siku iyo wakala 12,000. 26 Yoshua hauhulumuse mkono wake woukalile wamha mgoha wake kusonhela Ai mbaka wanhu wose wa bululu ijo viwakomigwe na Waisilaili. 27 Waisilaili wateka wanyama na vinhu muhala muna dibululu ijo, fana Mndewa Mulungu viyamulagilize Yoshua.

28 Ivo Yoshua kaditimbula bululu da Ai na kaditenda tongo mbaka diyelo. 29 Kamtumbika mfalume wa Ai muna umbiki mbaka ichigulogulo. Mbali zuwa vijanduse kuhonga, Yoshua kalagiliza mtufi wake usegezigwe muna umbiki na kwasigwa kuna ulwivi lwa bululu. Maabaho weka bugulu da mabwe uchanyha ya mtufi uwo. Bugulu ijo dabaho mbaka diyelo.

30 Maabaho Yoshua kamzengela lupango Mndewa Mulungu, Mulungu wa Isilaili, kuna umulima wa Ebali, 31 fana Musa msang'hani wa Mndewa Mulungu viyawalagilize Waisilaili, fana viyandikigwe muna ichitabu cha malagilizo ya Musa kuwa lwizakuwa lupango luzengigwe kwa mabwe hayasongoligwe hebu kudalisigwa na chia chochose cha chuma. Uchanyha ya lupango ulo wamulavila Mndewa Mulungu nhambiko za kutimbula na nhambiko za kugala tindiwalo. 32 Haulongozi ha Waisilaili wose, Yoshua kandika malagilizo ya Musa uchanyha ya mabwe. 33 Waisilaili wose hamwe na walangulizi wawo na walala na wasemi wawo na nyambenyambe wose wakalile hagati yawo, wema chila ubanzi wodilola sanduku da lagano haulongozi wa wakulu wa nhambiko Walawi wakalile wadipapa sanduku da lagano da Mndewa Mulungu. Nusu yawo wema kuulongozi wa mulima wa Gelizimu na nusu imwenga wema kuulongozi wa mulima wa Ebali, fana viya Musa msang'hani wa Mndewa Mulungu viyalagilize umwaka kusonhela kutemeligwa mate kwa Waisilaili. 34 Maabaho Yoshua kawasomela malagilizo yose, hamwe na kutemeligwa mate na kuduwiligwa, fana viyandikigwe muna ichitabu cha malagilizo. 35 Habule mbuli ilagilizigwe na Musa ija Yoshua haisomile haulongozi wa mting'hano wa Waisilaili wose, hamwe na wanaake na wana na nyambenyambe wokala hamwe nawo.