1 Viwakalile uko Shilo muna iisi ya Kanaani, walangulizi wa ng'holo za Walawi wawahitila mkulu wa nhambiko Eleazali na Yoshua mwana wa Nuni na walangulizi wa ng'holo zose za makabila ya Waisilaili, 2 walonga, "Mndewa Mulungu kamulagiliza Musa kuwa ching'higwe mabululu ya kukala na vyuwala va kudimila wanyama wetu." 3 Kwaviya kwa kusondelela viyalongile Mndewa Mulungu, Waisilaili waweng'ha Walawi mabululu yano, hamwe na hanhu ha kudimila muna uuhazi wawo.

4 Mhiya iwalagalila wanhu wa lukolo lwa Wakohasi, wana wa mkulu wa nhambiko Haluni wakalile mwa Walawi. Wapata mabululu longo na matatu kwa kutowa mhiya muna dikabila da Yuda na muna dikabila da Simeoni na muna dikabila da Benyamini. 5 Wanhu wa ng'holo za Wakohasi wasigale weng'higwa mabululu longo kulawa muna zing'holo za makabila ya Efulaimu na Dani na nusu ya kabila da Manase.

6 Wanhu wa ng'holo za Wagelishoni weng'higwa mabululu longo na matatu hana ihanhu ha makabila ya Isakali na Asheli na Nafutali hana ihanhu ha nusu ya kabila Manase uko Bashani.

7 Wanhu wa ng'holo za Melali, lukolo kwa lukolo, wahokela mabululu longo na maidi kulawa hana ihanhu ha makabila ya Lubeni na Gadi na Zabuloni.

8 Waisilaili waweng'ha Walawi mabululu yayo hamwe na hanhu hawo ha kudimila wanyama wawo kwa kutowa mhiya, fana Mndewa Mulungu viyamulagilize Musa.

9 Yano mazina ya mabululu yoweng'higwe makabila ya Yuda na Simeoni. 10 Mabululu yano weng'higwa welesi wa Haluni wowalawile muna zing'holo za Wakohasi wowakalile wana wa Lawi, kwaviya mhiya ya mwanduso iwalagalila wawo. 11 Waweng'ha Kiliasi Aliba, niiyo Hebuloni, hamwe na hanhu ha kudimila kuna iisi ya milima ya Yuda. Alaba kakala tati yake Anaki. 12 Mbali migunda ya bululu ijo hamwe na vibululu vili habehi keng'higwa Kalebu mwana wa Yefune viwe vake. 13 Maabaho wana wa mkulu wa nhambiko Haluni weng'higwa bululu da Hebuloni hamwe na hanhu hake ha kudimila, ijo bululu da kukimbilila kwa ichimu cha munhu mkomaji, Libina hamwe na hanhu hake ha kudimila 14 na Yatili hamwe na hanhu hake ha kudimila na Eshitemoa hamwe na hanhu ha kudimila 15 na Holoni hamwe na hanhu hake ha kudimila na Debili hamwe na hanhu hake ha kudimila 16 na Aini hamwe na hanhu hake ha kudimila na Yuta hamwe na hanhu hake ha kudimila na Besi Shemeshi hamwe na hanhu hake ha kudimila. Mabululu yose yeli hana ihanhu ha makabila yayo maidi yakala kenda. 17 Kulawa kabila da Benyamini weng'higwa mabululu yamwenga, Gibeoni hamwe na hanhu hake ha kudimila na Geba hamwe na hanhu hake ha kudimila 18 na Anasosi hamwe na hanhu hake ha kudimila na Alimoni hamwe na hanhu hake ha kudimila. Mabululu yose yoweng'higwe yakala mane. 19 Mabululu yose ya welesi wa Haluni wakalile wakulu wa nhambiko yakala longo na matatu, hamwe na hanhu hawo ha kudimila.

20 Wakohasi wasigalile wa ng'holo za Walawi weng'higwa mabululu kulawa muna dikabila da Efulaimu. 21 Weng'higwa Shekemu, iviya dikala bululu da kukimbilila, hamwe na hanhu hake ha kudimila muna iisi ya vilima va Efulaimu, Gezeli hamwe na hanhu hake ha kudimila 22 na Kibizaimu hamwe na hanhu hake ha kudimila na Besi Holoni hamwe na hanhu hake ha kudimila. Mabululu yose yoweng'higwe yakala mane. 23 Kulawa hanhu ha kabila da Dani weng'higwa Eliteke hamwe na hanhu hake ha kudimila na Gibesoni hamwe na hanhu hake ha kudimila 24 na Aiyaloni hamwe na hanhu hake ha kudimila na Gasi Limoni hamwe na hanhu hake ha kudimila. Mabululu yose yoweng'higwe yakala mane. 25 Kulawa hanhu ha nusu ya kabila da Manase weng'higwa Taanaki hamwe na hanhu hake ha kudimila na Gasi Limoni hamwe na hanhu hake ha kudimila. Mabululu yose yoweng'higwe yakala maidi. 26 Mabululu yose yoweng'higwe wanhu ng'holo za Wakohasi wasigalile yakala longo hamwe na hanhu hawo ha kudimila.

27 Iviya Wagelishoni, lukolo lumwe lwa Walawi weng'higwa mabululu maidi hana ihanhu ha nusu ya kabila da Manase. Mabululu yayo yakala Golani ili uko Bashani, bululu da kukimbilila wakomaji hamwe na hanhu hake ha kudimila na Beeshitela hamwe na hanhu hake ha kudimila. 28 Kulawa hanhu ha dikabila da Isakali weng'higwa Kishioni hamwe na hanhu hake ha kudimila na Dabelasi hamwe na hanhu hake ha kudimila 29 na Yalimusi hamwe na hanhu hake ha kudimila na Eni Ganimu hamwe na hanhu hake ha kudimila. Mabululu yose yoweng'higwe yakala mane. 30 Kulawa hanhu ha kabila da Asheli weng'higwa Mishali hamwe na hanhu hake ha kudimila na Abidoni hamwe na hanhu hake ha kudimila 31 na Helikasi hamwe na hanhu hake ha kudimila na Lehobu hamwe na hanhu hake ha kudimila. Mabululu yose yoweng'higwe yakala mane. 32 Kulawa hanhu ha kabila da Nafutali weng'higwa Kedeshi, bululu da kukimbilila dili uko Galilaya hamwe na hanhu hake ha kudimila na Hamosi Doli hamwe na hanhu hake ha kudimila na Kalitani hamwe na hanhu hake ha kudimila. Mabululu yose yoweng'higwe yakala matatu. 33 Mabululu yose ya ng'holo za Wagelishoni yakala longo na matatu hamwe na hanhu hawo ha kudimila.

34 Walawi wamwenga wasigalile weli welesi wa Melali weng'higwa mabululu kulawa hanhu ha kabila da Zabuloni. Mabululu yayo yakala Yokineamu hamwe na hanhu hake ha kudimila na Kalita hamwe na hanhu hake ha kudimila 35 na Dimina hamwe na hanhu hake ha kudimila na Nahalali hamwe na hanhu hake ha kudimila. Mabululu yose yakala mane. 36 Kulawa hanhu ha kabila da Lubeni weng'higwa Beseli hamwe na hanhu hake ha kudimila na Yahazi hamwe na hanhu hake ha kudimila 37 na Kedemosi hamwe na hanhu hake ha kudimila na Mefaasi hamwe na hanhu hake ha kudimila. Mabululu yose yakala mane. 38 Kulawa hanhu ha kabila da Gadi weng'higwa Lamosi ili Gileadi, bululu da kukimbilila wakomaji, hamwe na hanhu hake ha kudimila na Mahanaimu hamwe na hanhu hake ha kudimila 39 na Heshiboni hamwe na hanhu hake ha kudimila na Yazeli hamwe na hanhu hake ha kudimila. Mabululu yose yakala mane. 40 Mabululu yose yoweng'higwe welesi wa Melali, weli ng'holo za Walawi zozisigale, yakala longo na maidi.

41 Mabululu yose ya Walawi yeli hana ihanhu ha Waisilaili yakala malongo mane na manane, hamwe na hanhu hawo ha kudimila. 42 Chila bululu muna yamabululu yano dizungulukigwa na hanhu ha kudimila.

43 Ivo Mndewa Mulungu kaweng'ha Waisilaili isi iyo yose iyawalaganile kuweng'ha wasaho zawo, nawo waisola na kukala umo. 44 Mndewa Mulungu kaweng'ha tindiwalo chila hanhu muna iisi fana viyawalahile wasaho zawo. Habule mwihi yoyose yadahile kuwatowa, kwaviya Mndewa Mulungu kaweka wehi wawo muna yamakono yawo. 45 Habule chilagano chochose chinogile Mndewa Mulungu choyawalaganile Waisilaili chiya hachifikile. Vilagano vose vifika.