1 Yoshua viyawile mulala ng'hani, Mndewa Mulungu kamulongela, "Weye sambi kwa mulala ng'hani na ing'hali kuna zisi nyingi hazinasoligwa. 2 Zisi izo zikala isi yose ya Wafilisiti na isi yose ya Wageshuli, 3 kulawa lwanda lwa Shilo koihakane na Misili mbaka kuna imhaka ya Ekiloni ubanzi wa kasikazi, isi yoimanyika kuwa ya Wakanaani. Kuna wafalume watano wa Wafilisiti wowatawale uko Gaza na Ashidodi na Ashikeloni na Gasi na Ekiloni, hamwe na Avi. 4 Kaidi ni ubanzi wa kusi kuwa isi yose ya Wakanaani na Ala ya Wasidoni mbaka Afeka muna imhaka ya Waamoli, 5 na isi ya Wagebali na isi yose ya Lebanoni, ubanzi wa ulawilo wa zuwa, kwandusila Baali Gadi hasi ya mulima wa Helimoni mbaka Lebo Hamasi. 6 Iviya hanhu ha milima ili kwandusila Lebanoni na Misilefosi Maimu, wakaya wake Wasidoni, niye Mulungu nizawawinga wawo wose wasegele haulongozi ha Waisilaili, mbali weye kwizawagolela isi muhala fana viya vinikulagilize. 7 Zisi izo kwizawagolela makabila kenda na nusu ya kabila da Manase iwe uhazi wawo."

8 Makabila ya Lubeni na Gadi na nusu imwenga ya kabila da Manase wakala weng'higwa isi ya ulawilo wa zuwa wa lwanda lwa Yoludani, fana Mndewa Mulungu viyamulagilize Musa msang'hani wake. 9 Hanhu hawo hakala kwandusila Aloeli ili mumgwazogwazo mwa kolongo da Alinoni na bululu diya dili hagati ya kolongo na isi ija yose ya dibawe da Medeba mbaka Diboni, 10 hamwe na mabululu yose ya Sihoni mfalume wa Waamoni yoyatawale uko Heshiboni mbaka mhaka ya Waamoli. 11 Iviya ikala hamwe na isi ya Gileadi na hanhu ha Wageshuli na Wamaaka na mulima wose wa Helimoni na isi yose ya Bashani mbaka Saleka 12 na ufalume wose wa mfalume Ogu, imwe wa Walefai wowasigale, yoyatawale uko Ashitalosi na Edilei. Musa kawahuma wanhu wawo wose na kawawinga. 13 Mbali Waisilaili hawawawingile Wageshuli na Wamaaka, ivo wang'hali wokala na Waisilaili mbaka diyelo. 14 Musa haweng'hile welesi wa Lawi isi yoyose. Mbali nhosa ziwamulavile Mndewa Mulungu, Mulungu wa Isilaili kwa moto, niizo zikalile yombe jawo fana viya Mndewa Mulungu viyamulongele Musa. 15 Musa kaweng'ha uhazi wa isi wanhu wa kabila da Lubeni fana vizili ng'holo zawo. 16 Mhaka yawo ikala kwandusila Aloeli, mumgwazo wa bawe da Alinoni na bululu dikalile hagati ya bawe ijo hamwe na isi yose ili muna dibawe da Medeba. 17 Iviya ikala hamwe na Heshiboni na mabululu yake yose yeli hanhu hake ha bawe, yaani Diboni na Bamosi Baali na Besi Baali Meoni 18 na Yahazi na Kedemosi na Mefaasi 19 na Kiliasaimu na Sibima na Selesi Shahali, kuna umulima mdododo wili mudibawe, 20 na Besi Peoli na isi ya mihulumuko ya Pisiga na Besi Yeshimosi 21 na mabululu yose yeli kudibawe na ufalume wose wa Sihoni mfalume wa Waamoli, yoyakalile kotawala muna iisi ya Heshiboni. Kahumigwa na Musa hamwe na wakulu wa Midiani, nawo wakala Evi na Lekemu na Suli na Huli na Leba, wawo wakala waja wamtazile Sihoni kutawala isi. 22 Iviya Waisilaili wamkoma Balaamu, mwana wa Beoli yoyakalile muhawi. 23 Mhaka ya isi ya kabila da Lubeni ubanzi wa uswelo wa zuwa ukala lwanda lwa Yoludani. Uwo ukala uhazi wa wana wa Lubeni viili na kwa kusondelela ng'holo zawo na mabululu yake na vibululu vake.

24 Musa kaweng'ha uhazi wa isi wanhu wa kabila da Gadi kwa kusondelela ng'holo zawo. 25 Hanhu hawo hakala Yazeli na mabululu yose ya Gileadi na nusu ya isi ya Waamoni mbaka Aloeli ili ulawilo wa zuwa wa Laba. 26 Iviya ikala kwandusila Heshiboni mbaka Lamasi Misipa na Betonimu na kulawa Mahanaimu mbaka kuna imhaka ya Debili. 27 Iviya yakala mabululu yakalile muna dibawe da Besi Halamu na Besi Nimila na Sukosi na Zafoni na isi imwenga ikalile ya mfalume Sihoni wa Heshiboni. Hanhu baho hakala ubanzi wa ulawilo wa zuwa wa Yoludani na hahakana na ubanzi wa kusi wa bahali ya Kinelesi. 28 Mabululu yayo na vibululu vake weng'higwa wanhu wa kabila da Gadi kwa kusondelela ng'holo zawo.

29 Maabaho Musa kaweng'ha uhazi wa isi nusu ya kabila da Manase fana vizili ng'holo zawo. 30 Mhaka yawo ikala kwandusila Mahanaimu na isi yose ya mfalume Ogu wa Bashani na mabululu malongo sita ya Yaili, 31 na nusu ya Gileadi na Ashitalosi na Edilei yoyakalile mabululu ya Ogu mfalume wa Bashani. Hanhu baho weng'higwa nusu ya welesi wa Makili mwana wa Manase kwa kusondelela ng'holo zawo.

32 Uno uwo uhazi Musa uyagolile kuna iisi ya bawe da Moabu, kuumwambu wa Yoludani, ubanzi wa ulawilo wa zuwa wa Yeliko. 33 Mbali kabila da Lawi hading'hile hanhu hawo ha isi, kwaviya wahokela ukulu wa nhambiko fana viyalaganile Mndewa Mulungu, Mulungu wa Isilaili.