1 Zino niizo zisi Waisilaili zowazihokele kuwa uhazi muna iisi ya Kanaani. Mkulu wa nhambiko Eleazali na Yoshua mwana wa Nuni, hamwe na makolo wa makabila ya Waisilaili wawagolela Waisilaili. 2 Hanhu hawo wagoliligwa kwa kutowa mhiya fana viya Mndewa Mulungu viyamulagilize Musa yayagolele makabila yaja kenda na nusu. 3 Musa kakala kamala kuyagolela yaja makabila maidi na nusu ubanzi wa ulawilo wa zuwa wa lwanda lwa Yoludani. Kwaviya wana wa Yosefu wakala makabila maidi, Manase na Efulaimu. Mbali kabila da Walawi wakala hawagoleligwe hanhu hawo hamwe nawo. 4 Nawo hawaweng'hile Walawi hanhu muna iisi iyo, mbali wawagolela mabululu wadahe kukala na hanhu ha kudimila ng'ombe na ng'hondolo wawo. 5 Waisilaili waigola isi fana viya Mndewa Mulungu viyamulagilize Musa.

6 Siku dimwe wanhu wa kabila da Yuda wamuhitila Yoshua uko Giligali. Kalebu mwana wa Yefune, Mkenizi, kamulongela Yoshua, "Weye kokumbuka viya Mndewa Mulungu viyamulongele Musa munhu wa Mulungu kusonhela niye na weye vichikalile Kadeshi Balinea. 7 Viniwile na miyaka malongo mane, Musa msang'hani wa Mndewa Mulungu, kanituma kulawa Kadeshi Balinea kuhita kuipelemba isi. Vinibwelile nimgalila mbuli za uko fana viya vinihuwile muumoyo wangu. 8 Mbali waja wayangu wochihitile chose wawatenda wanhu wafe moyo, mbali niye nimsondelela Mndewa Mulungu, Mulungu wangu kwa uwaminika. 9 Siku iyo Musa kanilahila, kalonga, ‘Kweli isi ija youfosile izakuwa yako weye na welesi wako siku zose, kwaviya weye kumsondelela Mndewa Mulungu, Mulungu wako kwa uwaminika.’ 10 Mbali sambi, Mndewa Mulungu kanitenda niwe mgima mbaka sambi kwa miyaka malongo mane na mitano fana viyamulongele Musa chipindi Waisilaili viwakalile wofosela kuchuwala. Sambi nina miyaka malongo manane na mitano. 11 Mbali ning'hali nina nguvu fana vinikalile na nguvu lusita luja Musa viyanitumile. Mbaka sambi nina nguvu za kudaha kuitowa ng'hondo na kusang'hana usang'hano umwenga wowose. 12 Lelo nopula uning'he isi ino ya milima, Mndewa Mulungu yoyanilaganile siku ija. Weye kuhulika kuwa siku ija Waanaki wakala umo muna yamabululu yeli na mhongono. Yodahika Mndewa Mulungu kezakuwa hamwe na niye, nizawawinga fana Mndewa Mulungu viyalongile."

13 Maabaho Yoshua kamtemela mate Kalebu mwana wa Yefune na kamwing'ha bululu da Hebuloni diwe uhazi wake. 14 Ivo bululu da Hebuloni dikala da welesi wa Kalebu mwana wa Yefune, Mkenizi, mbaka diyelo, kwaviya Kalebu kamsondelela Mndewa Mulungu, Mulungu wa Isilaili kwa uwaminika. 15 Umwaka bululu da Hebuloni ditangigwa Kiliasi Aliba. Aliba kakala munhu mkulu ng'hani kufosa wanhu wose mwa Waanaki. Isi yose ikala na tindiwalo bila ya ng'hondo.