1 Viwamalile kuihuma isi ija, Waisilaili wose waiting'hana hamwe uko Shilo na kudisimika hema da Mulungu. 2 Muna yamakabila ya Waisilaili yakala yasigala makabila saba yoyakalile hayanagoleligwa uhazi wawo wa isi.

3 Ivo Yoshua kawalongela Waisilaili, "Mwizagozela mbaka zuwaki kuhita kuisola isi ija iyamwing'hileni Mndewa Mulungu, Mulungu wa tati zenu? 4 Saguleni wanhu watatu kulawa chila kabila muladi niwatume muna iisi yose wakaipelembe na kuyandika fana viwolonda kwa uhazi wawo, maabaho weze wanilongele. 5 Nawo wezaigola isi iyo vihande saba. Kabila da Yuda dizasigala na hanhu hake ha kusi na kabila da Yosefu ubanzi wa kasikazi. 6 Yandikeni mbuli kusonhela vihande saba va isi na kunigalila. Baho nizatowa mhiya haulongozi wa Mndewa Mulungu, Mulungu wetu, nizagola kwa chila kabila. 7 Walawi wabule hanhu kumwenu, kwaviya hanhu hawo kuwa wakulu wa nhambiko wa kumsang'hanila Mndewa Mulungu. Gadi na Lubeni na nusu ya kabila da Manase wapata hanhu hawo ubanzi wa ulawilo wa zuwa wa lwanda lwa Yoludani. Weng'higwa hanhu baho na Musa msang'hani wa Mndewa Mulungu."

8 Ivo wanhu wawo wandusa mwanza wa kuhita kuipelemba isi. Wang'hali hawanahita, Yoshua kawalagiliza, "Hiteni muna iisi yose mukandike mbuli zisonhela isi iyo, maabaho mubwele munilongele, niye nizatowa mhiya haulongozi wa Mndewa Mulungu bahano Shilo kusonhela hanhu hondamwing'higwe." 9 Ivo wanhu wawo wahita, wafosa hagati ya isi na wandika mbuli zake muna ichitabu, waigola isi kwa vibululu vake, mbaka iwa vihande saba, maabaho wabwela kwa Yoshua kuna dilago uko Shilo. 10 Maabaho Yoshua katowa mhiya kwa ichimu chawo haulongozi wa Mndewa Mulungu uko Shilo, kawagolela Waisilaili, chila kabila hanhu hake.

11 Mhiya iwalagalila wanhu wa kabila da Benyamini kwa kusondelela ng'holo zawo. Hanhu howeng'higwe wanhu wawo hakala hagati ya hanhu ha kabila da Yuda na hanhu ha kabila da Yosefu. 12 Mhaka yake ya kasikazi yandusila kuna ulwanda lwa Yoludani na kufosela kasikazi ya Yeliko na isi ya milima, ihita uswelo wa zuwa mbaka chuwala cha Besi Aveni. 13 Maabaho kulawa uko mhaka igendelela kusi kuhita Luzu kufosela ubanzi wa kusi wa Luzu, niiyo Beseli, mbaka Atalosi Adali kuna umulima uli kusi ya Besi Holoni ya Hasi. 14 Ubanzi wa uswelo wa zuwa wa mulima uwo uli kusi ya Besi Holoni, mhaka ihinduka ihita kusi mbaka Kiliasi Baali, iviya yotangigwa Kiliasi Yealimu, bululu da kabila da Yuda. Iyo ikala mhaka yake ya ubanzi wa uswelo wa zuwa. 15 Ubanzi wa kusi mhaka yake yandusila kumgwazo wa bululu da Kiliasi Yealimu, ifika Efiloni na kuhita mbaka kuna inzasa ya mazi ya Nefitoa. 16 Maabaho mhaka ihita hasi kufosela mumgwazo mwa mulima uli habehi na bawe da mwana wa Hinomu, dodikalile ubanzi wa kasikazi wa kolongo da Walefai. Maabaho mhaka igendelela kuhita kolongo da Hinomu, ubanzi wa kusi wa chilima cha Wayebusi, igendelela mbaka Eni Logeli. 17 Uko mhaka ihinduka kuhita ubanzi wa kasikazi ihita Eni Shemeshi, ifosela Gelilosi ili malola na makwelelo ya Adumimu, maabaho ihulumuka mbaka kuna idibwe da Bohani mwana wa Lubeni. 18 Maabaho mhaka izunguluka kasikazi kuna ingema ya uchanyha ya Alaba na ihulumukila Alaba. 19 Maabaho mhaka igendelela ubanzi wa kasikazi wa chilima cha Besi Hogila na kuhelela kasikazi ya Bahali ya Munyu, hanhu holwingilila lwanda lwa Yoludani. Ino ikala mhaka yake ya ubanzi wa kusi. 20 Mhaka yake ya ubanzi wa ulawilo wa zuwa ikala lwanda lwa Yoludani. Vino niivo vizikigwe mhaka za zisi zoweng'higwe wanhu wa ng'holo za kabila da Benyamini ziwe uhazi wawo.

21 Mabululu ya ng'holo za kabila da Benyamini ni Yeliko na Besi Hogila na Emeki Kesisi 22 na Besi Alaba na Zemalaimu na Beseli 23 na Avimu na Pala na Afula 24 na Kefali Amoni na Ofini na Geba. Mabululu yose yoweng'higwe yakala longo na maidi, hamwe na vibululu vake. 25 Mabululu yamwenga yakala Gibeoni na Lama na Beelosi 26 na Mizipa na Kefila na Moza 27 na Lekemu na Ilipeeli na Talala 28 na Zela na Haelefu na Yebusi, niiyo Yelusalemu, na Gibea na Kiliasi Yealimu. Mabululu yose yoweng'higwe yakala longo na mane, hamwe na vibululu vake. Uwo ukala uhazi uweng'higwe wanhu wa kabila da Benyamini na ng'holo zawo.