1 Siku izo Isilaili kukala kwabule mfalume. Kukala na Mulawi imwe yoyakalile fana nyambenyambe yakalile kutali muna iisi ya vilima va Efulaimu, yoyasolile msang'hani wa chike uko Beselehemu muna iisi ya Yuda. 2 Mbali msang'hani wa chike iyo kamwihila Mulawi iyo, kamuleka na kabwela ukaye kwa tati yake uko Beselehemu, kakala uko miyezi mine. 3 Maabaho mulumake kenuka kamsondelela, yasimulile nayo kwa ulondo muladi yadahe kumbweleza kaidi. Nayo kakala hamwe na msang'hani wake na vihongwe waidi, muke iyo kamkalibisha muna ikaye ya tati yake. Tati yake viyamuwone kadeng'helela kuiwona nayo. 4 Mkoi wake, tata wa muke ija kamkalibisha, nayo kakala uko siku nhatu, Mulawi iyo na wasang'hani wake waja ndiya na wang'wa na wagona uko.

5 Siku yekane walamuka imitotondo na kuisasala kusegela, mbali tata wa muke ija kamulongela Mulawi, "Teng'hu diya ndiya ubweleze lukuli maabaho kodaha kusegela." 6 Ivo waidi wawo wakala, waja na kung'wa hamwe. Maabaho tata wa imuke kalonga, "Nokulamba ukale chilo chose na udeng'helele." 7 Munhu ija viyenuke muladi yanduse mwanza, mkoi wake kamuhimiza yasigale, nayo kasigala chilo chimwenga chimwe. 8 Siku yetano imitondo kalamka muladi yasegele, tata wa imuke kalonga, "Humuza moyo wako. Gozela mbaka imisi." Ivo waidi wawo waja hamwe.

9 Maabaho munhu ija na muke wake na msang'hani wake, wenuka muladi wasegele, mkoi wake kamulongela, "Lola, sambi ichilo kala hano uhoze moyo wako. Igolo imitondo ng'hani kodaha kulamka na kusegela."

10 Mbali munhu iyo ichilo icho kalema kugona, ivo kenuka na kasegela, kafika habehi na bululu da Yebusi, niiyo Yelusalemu. Kahita na vihongwe waidi wasasaligwe, hamwe na msang'hani wake wa chike. 11 Viwakalile habehi na Yebusi, zuwa dikala diswile, msang'hani kamulongela mwenevale wake, "Muhavu chingile muna dibululu dino da Wayebusi chigone ichilo chino." 12 Mwenevale wake kamwidika, "Hachidaha kwingila muna dibululu da nyambenyambe weli siyo Waisilaili, chizagendelela na mwanza mbaka chifike Gibea." 13 Kongeza kulonga, "Izo, leka chigeze kufika Gibea hebu Lama na chizagona muna dibululu dimwe mwa mabululu yayo." 14 Ivo wagendelela na mwanza wawo. Viwafikile Gibea dili bululu da kabila da Benyamini zuwa diswa. 15 Wengila muna dibululu ijo muladi wagone ichilo. Viwengile wahita kukala kuna ulubuga lwa bululu, mbali habule munhu yawahokele ukaye yake.

16 Viwakalile uko mulala imwe keza kulawa kuna umgunda wake. Mulala iyo kakala mkaya wa isi ya vilima ya Efulaimu na kakala uko Gibea fana nyambenyambe. Wakaya wa bululu da Gibea wakala wa kabila da Benyamini. 17 Mulala iyo viyalolile na kumuwona mfosanzila kuna ulubuga lwa bululu, kamuuza, "Kohita kulihi? Kolawa kulihi?" 18 Mulawi kedika, "Cheye chofosa nzila, chilawa bululu da Beselehemu dili kuna iisi ya Yuda, chohita kutali kuna ivilima va Efulaimu, konikala. Nikala Beselehemu ili Yuda na sambi nohita kuna ikaye ya Mndewa Mulungu. Habule hata munhu imwe yanihokele muna ikaye yake. 19 Mbali cheye wasang'hani wako china nyasi kwa ichimu cha chihongwe wetu. Iviya nina gate na divai, ivo vonifaya niye na msang'hani wako wa chike na wasang'hani wako. Hachihungukilwa na chinhu chochose."

20 Mulala ija kalonga, "Muwe na tindiwalo! Nizamwing'hani vinhu vose vomulonda. Mbali sekemugone hana ulubuga ichilo." 21 Ivo kawagala ukaye yake na kaweng'ha nyasi vihongwe wawo. Nyambenyambe wawo wanawa magulu yawo, waja na kung'wa. 22 Viwakalile wodeng'helela, walume wotenda yehile wa bululu ijo weza waizinga ikaye iyo na kuhodiza. Wamulongela mulala mwene kaye, "Mulave mulume iyo yeli kumwako chimbandame."

23 Mwene kaye kalawa kunze, kawalongela, "Bule mbwiya zangu! Nomulambani sekemutende mbuli ihile fana iyo. Nyambenyambe ino kokala kumwangu, ivo sekemumtendele mbuli zilingile ivo. 24 Hano hana msang'hani wa chike wa nyambenyambe yokala kumwangu na mndele wangu yeli mhambe, nitogoleleni niwalave kunze muladi muwasole na kuwatendela vomulonda, mbali munhu ino sekemumtendele mbuli ino ihile." 25 Mbali walume wawo hawamuhulike bule. Ivo Mulawi ija kamsola msang'hani wa chike na kawalavila kunze. Nawo wamsola na kumtenda yambule mwiko ichilo chose mbaka imitondo. Viiwile habehi na kukunguzuka wamuleka yahite.

26 Imitondo muke ija keza mbaka kuna ulwivi lwa kaye iyakalile mulumake, kagwa hasi baho hana ulwivi na kakala hasi mbaka vikukunguzuke ng'hani. 27 Imitondo mulumake kalamka, viyavugule ulwivi muladi yasegele, kamuwona suliya wake kagona kuna ulwivi lwa kaye na mikono yake kagimila ichizingiti. 28 Kamulongela, "Inuka chihite." Mbali hedikigwe bule. Maabaho kamkweza muke ija muna ichihongwe wake na kamgala ukaye. 29 Viyengile muna ikaye yake kasola mwele, maabaho kamwamha msang'hani wa chike na kamkanhakanha vihande longo na vidi na kavituma kuna zimhaka zose za Isilaili. 30 Chila munhu yawonile ivo kalonga, "Mbuli fana iyo hainalawilila hebu kuwoneka kwandusila Waisilaili viwasegele Misili mbaka diyelo. Geseni na lamuleni muladi mukalonge."