1 Waisilaili wamuhasanya kaidi Mndewa Mulungu, nayo kawaleka watawaligwe na Wafilisiti kwa miyaka malongo mane.

2 Siku izo kukala na munhu imwe wa bululu da Zola wa kabila da Dani, zina jake Manoa. Muke wake kakala mgumba. 3 Msenga wa kuulanga wa Mndewa Mulungu kamulawilila muke iyo na kamulongela, "Weye kwamgumba na kwabule mwana, mbali kwizapata wimo na kwizakweleka mwana wa chilume. 4 Ivo wiiteganye, sekeung'we divai hebu chinhu chochose chikola, hebu sekeuje chinhu chochose chambule mwiko, 5 kwaviya kwizapata wimo na kwizakweleka mwana wa chilume. Nyele za mwana iyo siku zose sekeziweguligwe, kwaviya kwandusila kwelekigwa kwake kezakuwa Mnazili yotuligwa kwa Mulungu kwa sang'hano yelile. Nayo kezakwandusa kuwakombola Waisilaili muna yamakono ya Wafilisiti."

6 Maabaho mwanamke ija kahita kwa mulumake na kamulongela, "Munhu wa Mulungu kanizila, chihanga chake kalinga fana msenga wa Mulungu wa kudumbiza ng'hani. Simuuzile kalawahi, nayo hanilongele zina jake. 7 Mbali kanilongela, ‘Kwizapata wimo na kwizakweleka mwana wa chilume. Kanilongela sekening'we divai hebu chinhu chikola hebu sekenije chinhu chochose chambule mwiko, kwaviya mwana kezakuwa katuligwa kwa Mulungu siku zose za ugima wake.’ "

8 Maabaho Manoa kampula Mndewa Mulungu, kalonga, "Weye Mndewa Mulungu, nokulamba umtume kaidi munhu ija iumtumile, muladi yachifunze mbuli zochilondeka kumtendela imwana yondayelekigwe."

9 Mulungu kahulika pulo da Manoa na msenga wa Mulungu kamuhitila kaidi ija mwanamke viyakalile kumgunda, mbali Manoa mulumake hakalile hamwe nayo bule. 10 Mwanamke kakimbila himahima kamulongela mulumake, "Lola, munhu yoyanilawilile siku ija kanilawilila kaidi."

11 Manoa kenuka na kamsondelela muke wake. Viyamfikile munhu iyo kamuuza, "Vino weye iyo munhu ija yalongile na muke ino?"

Nayo kamwidika, "Ena."

12 Maabaho Manoa kalonga, "Mbuli zako vondazifike, mwana iyo kezakuwaze na kezatenda sang'hano yaki?"

13 Msenga wa Mndewa Mulungu kamulongela Manoa, "Muke wako kolondeka yatende chila chinhu chonimulongele. 14 Kolondeka sekeyaje chinhu chochose chochilawile muna umzabibu hebu sekeyang'we divai hebu chinhu chikola hebu sekeyaje chinhu chochose chambule mwiko. Yatende chila chinhu chonimulagilize."

15 Manoa kamulongela msenga wa Mndewa Mulungu, "Chokulamba ukale chidogo chikusasalile mwanaluti uje."

16 Mbali msenga wa Mndewa Mulungu kamulongela Manoa, "Hata fana koniwangiliza nikale, sizakuja ndiya yenu. Mbali one uhalonda sasala nhambiko ya kutimbula, kolondeka umulavile Mndewa Mulungu." Kwaviya Manoa havimanyile bule kuwa iyo kakala msenga wa Mndewa Mulungu.

17 Manoa kamulongela msenga wa Mndewa Mulungu, "Weye yelihi, muladi mbuli zako vondaziwe kweli chikuhishimu?"

18 Msenga wa Mndewa Mulungu kalonga, "Hulondeka kudimanya zina jangu. Na one uhadimanya, dizakwazanya."

19 Ivo Manoa kasola mwanaluti na nhosa ya usage, kavitimbula hana uluwe lwa Mndewa Mulungu. Msenga iyo katenda mbuli za mauzauza, Manoa na muke wake wakala walola. 20 Lambi da moto vidihitile kuulanga kulawa hana ulupango, msenga iyo wa Mndewa Mulungu kahita kuulanga muna dilambi da moto wa hana ulupango. Manoa na muke wake walola na waidulika mbaka vihanga vidalisa hasi.

21 Msenga wa Mulungu hawalawilile kaidi Manoa na muke wake, ivo Manoa kavimanya kuwa iyo kakala msenga wa Mndewa Mulungu.

22 Manoa kamulongela muke wake, "Kweli cheye chizadanganika, kwaviya chimuwona Mulungu!"

23 Mbali muke wake kamwidika, "Mndewa Mulungu one yalondile kuchikoma, sigambeyatogole nhambiko yetu ya kutimbula na nhosa yetu ya usage. Wala sigambeyachilagusile hebu kuchilongela mbuli zino."

24 Maabaho muke keleka mwana wa chilume na kamwing'ha zina jake Samsoni. Mwana iyo kakula na Mndewa Mulungu kamtemela mate. 25 Muhe wa Mndewa Mulungu wandusa kumgangamiza viyakalile Mahane Dani hagati ya bululu da Zola na Eshitaoli.