1 Siku dimwe Samsoni kahita bululu da Gaza, uko kaiting'hana na malaya imwe kambandama. 2 Wanhu wa Gaza viwalongeligwe, "Samsoni kauko!" Ivo wahazunguluka hanhu baho na kumsepa kuna ulwivi lwa bululu ichilo chose. Hana ulwivi wa dibululu wakala hupi chilo chose, walonga, "Chimgoze mbaka mhwaniyau baho chizamkoma." 3 Basi Samsoni kagona mbaka chilo chikulu, kasegela hagati ichilo, kamha nyivi za hanhu ha kwingilila muna dibululu, na mhanda zake mbili, kang'ola hamwe na mhalalingo yake, kagelega muna diyega, kavipapa mbaka kuchany'ha kuna umulima uli habehi na Hebuloni.

4 Maabaho Samsoni kamnogela muke yatangigwe Delila, yakalile kuna dibawe da Soleki. 5 Wafalume wa Wafilisiti wamuhitila muke iyo na walonga, "Mgeze Samsoni kwa kumuuza chandusilo cha nguvu zake nyingi na chodahaze kumuhuma. Chidahe kumtataliza na kumgaza. Chila imwe wetu yondayadahe kutenda ivo kezakwing'ha hela elufu na magana dimwe."

6 Ivo Delila kamulongela Samsoni, "Nilongele choni chandusilo cha nguvu zako nyingi na kwizatatalizigwa vilihi muladi uhumigwe."

7 Samsoni kedika, "One wahanifunga na nzabi mbisi saba, nizakuwa nabule nguvu fana wanhu wamwenga." 8 Ivo wafalume wa Wafilisiti wamgalila Delila nzabi saba mbisi, nayo kamtataliza Samsoni. 9 Kukala na wanhu wamwenga muna ichiheleto chimwenga, ivo kaguta nyangi, "Samsoni! Wafilisiti wokwiza!" Mbali kadumula zinzabi fana viya luzi lwa pamba volukanhigwe uhadalisigwa na moto. Ivo wagendelela kuwa hawachimanyile chandusilo cha nguvu zake.

10 Maabaho Delila kamulongela Samsoni, "Lola, kunizeha na kunivwizila. Nokulamba nilongele munhu kodahaze kukufunga."

11 Kamwidika, "One wahanifunga kwa nzabi za sambi ziya hazinasang'haniligwa, nizakuwa nyondenyonde fana wanhu wamwenga."

12 Ivo Delila kasola nzabi za sambi na kamfunga. Maabaho kalonga, "Samsoni! Wafilisiti wokwiza!" Wanhu wakala wogozela kuna ichiheleto chimwenga. Mbali yeye kadumula zinzabi muna yamakono yake fana luzi.

13 Delila kamulongela Samsoni, "Ung'hali konizeha na hunilongela ukweli bule. Nilongele munhu kodahaze kukufunga." Samsoni kamwidika, "Uhaviluka makonga saba ya nyele zangu muna ivisingija va diwalo na kuviwambilila kwa vigingi, nizakuwa nyondenyonde fana munhu imwenga yoyose." 14 Basi kazifunga kwa ichigingi na kamulongela, "Samsoni! Wafilisiti wokwiza." Nayo kalamka muna zinhongo, kang'ola ichigingi na kadidega ija diwalo. 15 Ivo Delila kalonga, "Habali kolonga konilonda na humbe haili ivo bule? Kunizeha miyanza mitatu, na ung'hali hunanilongela choni chochikutenda uwe na nguvu." 16 Delila kagendelela kamulamba Samsoni chila siku mbaka kalegela ng'hani. 17 Baho Samsoni kamulongela Delila ukweli wose, kalonga, "Nyele zangu hazilondeka kuweguligwa. Mulungu kanitula kuwa Mnazili wake kwandusila vinyelekigwe. Nyele zangu one ziweguligwe nihagize nguvu zangu na kuwa bila nguvu fana wanhu wamwenga."

18 Delila viyavimanyile kuwa kamulongela ukweli, katuma msenga kwa wafalume wa Wafilisiti na kalonga, "Izoni mwanza uno muhala. Kanilongela ukweli." Maabaho wahita na wamwing'ha zihela zowamulaganile. 19 Nayo Delila kamtenda Samsoni yagone nhongo muna yamavindi yake, kamtanga munhu yamuwegule viya ivifungu saba va nyele muna iditwi jake. Maabaho Delila kandusa kumgaza Samsoni kwaviya nguvu zake zikala zagile. 20 Delila kamulongela Samsoni, "Samsoni! Wafilisiti wokwiza kukutowa!" Samsoni kalamka muna zinhongo kuno kagesa kuwa kezalawa na kuigombela fana uchanduso. Humbe havimanyile kuwa Mndewa Mulungu kamuleka. 21 Wafilisiti wamgwila, wamng'ola meso yake, wamgala Gaza, wamfunga mhingu za shaba na wamuwangiliza yatende usang'hano wa kudunda usage uko kuna ichifungo. 22 Mbali nyele zake zandusa kota kaidi.

23 Wafalume wa Wafilisiti waiting'hana na kudeng'helela muladi wamulavile zabihu mulungu wawo yatangigwe Dagoni. Basi wakala wokwimba, "Mulungu wetu kamwika mwihi wetu Samsoni muna yamakono yetu." 24 Wanhu viwamuwonile Samsoni wamwing'ha hewela mulungu wawo na kulonga, "Mulungu wetu kamwika mwihi wetu Samsoni muna yamakono yetu, ija yakalile kobananga isi yetu na kuwakoma wengi wetu." 25 Viwamemigwe na deng'ho ng'hani muna imizoyo yawo, walonga, "Mgaleni Samsoni muladi chimzehe." Basi wamulava Samsoni muna ichifungo, wamgala, nawo wamzeha. Viwamwikile hagati ya mhanda, 26 Samsoni kamulongela mbwanga yakalile komulongoza, "Nileke nibabase mhanda zozizengeligwe ikaye muladi nigimile." 27 Kaye iyo ikala imemile wanhu, wafalume wose wa Wafilisiti wakala umo. Kuna digulu *kukala na wanhu 3,000 walume na wanaake, kuno womzeha Samsoni.

28 Baho Samsoni kamtanga Mndewa Mulungu, "Mndewa Mulungu, nokulamba unikumbuke. Nigume nguvu mwanza uno umwe muhala, weye Mulungu, muladi niwalihilize Wafilisiti wano mwanza umwe muhala, wano wowang'olile meso yangu." 29 Ivo Samsoni kamha mhanda mbili za hagati ya kaye ija, kazigimila, imwe mkono wake wa kumoso na imwenga mkono wake wa kulume. 30 Samsoni kalonga, "Leka nidanganike na Wafilisiti!" Kasung'ha kwa nguvu zake zose, na ikaye iwagwila wafalume na wamwenga wose. Samsoni kawakoma wanhu wengi muna iifa yake kufosa muna uugima wake.

31 Ndugu zake na wanhu wake weza kusola mtufi wake, wamuwanda hagati ya bululu da Zola na bululu da Eshitaoli hana dileme da Manoa, tati yake. Samsoni kakala msemi wa Isilaili kwa miyaka malongo maidi.