1 Msenga wa kuulanga yoyatumigwe na Mndewa Mulungu kahita kulawa Giligali mbaka Bokimu, kawalongela Waisilaili, "Nimulavani kuna iisi ya Misili na nimgalani muna iisi yoniwalahile kuweng'ha wasaho zenu. Nilonga, ‘Sizabena lagano donikile na mweye ng'o! 2 Sekemutende lagano na wanhu wokala muna iisi ino, mbali beneni malupango yawo.’ Mbali hamutendile chiya chinimulongeleni. Habali mutenda vino? 3 Lelo nolonga, ‘Sizawawinga kaidi wanhu wokala isi ino, mbali wezakuwa wehi kumwenu na milungu yawo izakuwa mtego kumwenu.’ " 4 Msenga wa Mndewa Mulungu viyakomeleze kuwalongela Waisilaili wose mbuli zino zose, Waisilaili wandusa kulila kwa usungu. 5 Hanhu baho wahatanga Bokimu*. Uko wamulavila nhambiko Mndewa Mulungu.

6 Yoshua viyakomeleze kuwalaga Waisilaili, chila munhu kahita hana iisi iyeng'higwe kuwa uhazi wake, muladi yakaisole isi iyo. 7 Waisilaili wamsang'hanila Mndewa Mulungu siku zose za ugima wa Yoshua na siku zose za walala waja wakalile wagima viifosile ifa ya Yoshua, waja wawonile sang'hano ng'hulu Mulungu ziyawatendele Waisilaili.

8 Yoshua mwana wa Nuni, yeli msang'hani wa Mndewa Mulungu kadanganika na miyaka gana na longo. 9 Kawandigwa muna iisi iyeng'higwe itangigwa Timinasi Helesi, kuna iisi ya vilima va Efulaimu, kasikazi ya mulima wa Gaashi.

10 Wanhu wose wa ulelo uwo iviya wadanganika. Ulelo usondelele haummanyile Mndewa Mulungu hebu sang'hano ziyawatendele Waisilaili.

11 Maabaho Waisilaili watenda mbuli zihile haulongozi wa Mndewa Mulungu na wandusa kuisang'hanila milungu itangigwa Mabaali. 12 Wamuleka Mndewa Mulungu, Mulungu wa wasaho zawo, ija yawalavile muna iisi ya Misili. Waisondelela na kuitambikila milungu imwenga, milungu yoitambikiligwe na wanhu wakalile mumgwazo yawo. Waitumbalila mavindi milungu iyo na wamtenda Mndewa Mulungu yawone ludoko. 13 Wamuleka Mndewa Mulungu na waisang'hanila nyang'hiti za milungu ya Mabaali na Maashitalosi. 14 Mndewa Mulungu kawawonela ludoko Waisilaili, ivo kawaleka wahokaji wawahoke vinhu vawo. Kaweka muna yamakono ya wehi wawo, mbaka hawadahile kaidi kuigombela. 15 Chila viwahitile kuitowa, mkono wa Mndewa Mulungu uwakwenhukila muladi kuwahuma fana viyalongile na kuilaha. Nawo wawa na usungu mkulu.

16 Maabaho Mndewa Mulungu kawasagula wasemi wowawakombole kulawa muna yamakono ya wanhu wahokile vinhu vawo. 17 Mbali Waisilaili hawawategeleze wasemi wawo, kwaviya wasondelela milungu imwenga fana wagoni na kuitumbalila mavindi. Waleka kuwahiga wasaho zawo wowazindilile malagilizo ya Mndewa Mulungu, wawo hawazindilile malagilizo ya Mndewa Mulungu. 18 Mndewa Mulungu chila viyaweng'hile Waisilaili msemi, yeye mwenyewo kakala hamwe na msemi iyo na kawakombola wanhu kulawa muna yamakono ya wehi wawo siku zose za ugima wa msemi iyo. Mndewa Mulungu kawawonela ubazi kwaviya kahulika chililo chawo chochigaligwa na manhesa yawo na viya viwabamanyigwe. 19 Mbali msemi yahadanganika wabwelela ugenzi wawo wa umwaka, wakala vihile kufosa wasaho zawo. Waisondelela milungu imwenga na waisang'hanila na waitumbalila mavindi, hawalekile sang'hano zawo zihile hebu udala wawo. 20 Ivo Mndewa Mulungu kawehila Waisilaili, kalonga, "Kwaviya wanhu wano wabena lagano donitendile na wasaho zawo, waleka kutegeleza dizi jangu, 21 sizayawinga wanhu wamwenga yawasigazile Yoshua viyadanganike. 22 Nizawasang'hanila wanhu wawo kuwageza Waisilaili nilole fana wezaibwelela nzila yangu fana wasaho zawo hebu hawezaibwelela." 23 Ivo Mndewa Mulungu kawaleka wanhu wa zisi izo, hawawingile hebu hawagumile muna yamakono ya Yoshua.