1 Viifosile ifa ya Abimeleki, Tola mwana wa Pua, mwana wa Dodo wa kabila da Isakali keza kuwakombola Waisilaili. Tola kakala uko Shamili muna iisi ya vilima va Efulaimu. 2 Kakala msemi wa Isilaili kwa miyaka malongo maidi na mitatu. Maabaho kadanganika na kawandigwa uko Shamili.

3 Viyafosile Tola keza Yaili kulawa Gileadi. Kawalanguliza Waisilaili kwa miyaka malongo maidi na midi. 4 Kakala na wana wa chilume malongo matatu wowakwelile vihongwe malongo matatu na wakala na mabululu malongo matatu muna iisi ya Gileadi, mbaka sambi yotangigwa Hawosi Yaili. 5 Yaili kadanganika na kawandigwa uko Kamoni.

6 Kaidi Waisilaili wamuhasanya Mndewa Mulungu kwa kuwatambikila Mabaali na Maashitalosi na milungu ya Shamu na ya Sidoni na ya Moabu na ya Amoni na ya Filisiti. Wamuleka Mndewa Mulungu na waleka kumtambikila. 7 Ivo Mndewa Mulungu kawehila Waisilaili, kawaguma muna yamakono ya Wafilisiti na Waamoni. 8 Kwa miyaka longo na minane wawagaza na wawananga Waisilaili wowokala uko Gileadi muna iisi ya Waamoli ubanzi wa ulawilo wa zuwa wa lwanda lwa Yoludani. 9 Waamoni waloka ulwanda lwa Yoludani muladi kuitowa na makabila ya Yuda na Benyamini na Efulaimu. Waisilaili wagaya ng'hani. 10 Maabaho Waisilaili wamulilila Mndewa Mulungu, walonga, "Chikuhasanya, kwaviya chikuleka weye Mulungu wetu na kuwatambikila Mabaali."

11 Mndewa Mulungu kawedika, "Vino niye simkomboleni kulawa kwa Wamisili na Waamoli na Waamoni na Wafilisiti? 12 Iviya Wasidoni na Waamaleki na Wamaoni umwaka wamgezani na mweye munililila muladi nimtazeni, nimkombolani kulawa muna yamakono yawo. 13 Mbali munileka na motambikila milungu imwenga, ivo sizamkombolani kaidi. 14 Hiteni mukaililile milungu yomuisagule. Ilekeni imkomboleni vomukuwa muna yamagayo."

15 Mbali Waisilaili wamulongela Mndewa Mulungu, "Chihasanya. Tenda vovose viulonda, mbali chokulamba diyelo uchikombole." 16 Ivo waisegeza milungu ya isi zimwenga na wamtambikila Mndewa Mulungu. Nayo Mndewa Mulungu hagendelele kufunyila umoyo magayo ya Waisilaili.

17 Maabaho watowang'hondo da Waamoni waisasala kwa ng'hondo na weka lago uko Gileadi. Waisilaili waiting'hana na weka lago uko Misipa. 18 Uko walangulizi wa wanhu wa Gileadi wailongela, "Vino yelihi yondayanduse kuitowa na Waamoni? Yondayatende ivo niiyo yondayawe mulangulizi wa wanhu wose wokala Gileadi."