1 Boazi kahita kuna ulwivi lukulu lwa bululu hana ihanhu ha kuiting'hanila, kakala uko. Ndolezi ija iyamtambule Boazi keza habehi. Ivo Boazi kalonga, "Izo habehi ndugu yangu, kala hano." Munhu iyo keza na kakala hasi. 2 Maabaho Boazi kawatanga walala longo wa bululu, nawo iviya kawalongela, "Kaleni hasi," nawo wakala. 3 Boazi kamulongela ija ndugu yake, "Naomi yabwelile kulawa Moabu, kolonda kuchuuza mgunda ukalile wa ndugu yetu Elimeleki. 4 Niona vinoga nikulongele mbuli ino. One uhalonda kuukombola mgunda uwo, ukombole haulongozi wa walala wa wanhu wangu. Ulonge one koulonda hebu huulonda, kwaviya munhu wa mwanduso kukombola weye na wekaidi iyo niye."

Nayo kamwidika, "Nizaukombola."

5 Maabaho Boazi kalonga, "Siku yondaugule mgunda kwa Naomi, iviya kwizalondeka kumsola Lusu yeli Mmoabu, muke wa mwenekwaga, muladi mgunda uwo usigale kwa ndugu wa mwenekwaga na kugendeleza lukolo."

6 Ivo ija ndolezi yakalile wa habehi kalonga, "Sidaha kuukombola niye mwenyewo, muladi sekeniubanange uhazi wa wanangu. Haki yangu ya kuukombola isole weye, kwaviya niye sidaha kuukombola." 7 Siku ziya muna iisi ya Isilaili wanhu wahalonda kukombola hebu kugula chinhu, chikala chihendo kwa munhu kulagusa chilaguso cha kuvula chilatu chake na kumwing'ha imwenga. Kwa chilaguso icho Waisilaili walagusa kuitogolela muumwingi.

8 Ivo munhu ija kamulongela Boazi, "Gula weye." Maabaho kavula chilatu chake.

9 Boazi kawalongela walala na wanhu wose, "Mweye wakalangama diyelo kuwa nigula kwa Naomi vinhu vose va Elimeleki na Kilioni na Mahiloni. 10 Iviya nimsola Lusu yeli Mmoabu, mgane wa Mahiloni, yawe muke wangu, muladi kuditenda zina da mwenekwaga kugendelela hamwe na vinhu vake, ivo zina jake sekejage mwa ndugu zake hebu muna dibululu jake. Diyelo mwawakalangama!"

11 Maabaho wanhu wose wakalile hana ulwivi na walala, walonga, "Cheye wakalangama. Mndewa Mulungu yamtende mwanamke ino yokwingila muna ikaye yako yawe fana Laheli na Leya, wose waidi waizenga kaye ya Isilaili. Na weye ukale goya mwa wanhu wa Efulasi na uwe na nhogolwa uko Beselehemu. 12 Kwa welesi wondayakwing'he Mndewa Mulungu kufosela muke iyo, kaye yako ilinge fana kaye ya Pelesi, ija Tamali iyamwelekele Yuda."

13 Ivo Boazi kamsola Lusu kawa muke wake. Viyambandame, Mndewa Mulungu kamtenda yapate wimo na kavumbula mwana wa chilume. 14 Wanaake wamulongela Naomi, "Yatogozigwe Mndewa Mulungu kwaviya hakulekile diyelo upuwe mzukulu wa kukulola goya. Zina jake dimanyike ng'hani muna iisi ya Isilaili. 15 Kezakubwelezela ugima wako na kukulola goya muna uulala wako. Kwaviya mkoi wako yokulonda ng'hani na yokufaya ng'hani kufosa wana wa chilume saba, kavumbula mwana wa chilume."

16 Naomi kamsola mwana iyo kamwika muna imhambaga yake na kumulela.

17 Wanaake wa habehi wamtanga mwana iyo Obedi na walonga, "Naomi kapata mwana wa chilume." Obedi viyakulile mkulu kamweleka Yese tati yake Daudi.

18 Uno uwo welesi wa Pelesi. Pelesi kamweleka Hesiloni, 19 Hesiloni kamweleka Lamu, Lamu kamweleka Aminadabu, 20 Aminadabu kamweleka Nashoni, Nashoni kamweleka Salimoni, 21 Salimoni kamweleka Boazi, Boazi kamweleka Obedi, 22 Obedi kamweleka Yese, Yese kamweleka Daudi.