1 Kukala na munhu imwe yolawa Lama muna iisi ya vilima va Efulaimu, zina jake katangigwa Elikana kulawa kabila da Efulaimu lukolo lwa Sufu. Wasaho yake Sufu kamweleka Tohu na Tohu kamweleka Elihu na Elihu kamweleka Yelohamu yeli tati yake Elikana. 2 Elikana kakala na wake waidi. Imwe katangigwa Hana na imwenga katangigwa Penina. Penina kakala na wana, mbali Hana hakalile na wana.

3 Chila mwaka Elikana kakala yolawa muna dibululu jake kuhita kutambika na kumulavila nhambiko Mndewa Mulungu Yeli na Udahi uko Shilo. Hofini na Finehasi, wana wa Eli wakalile wakulu wa nhambiko wa Mndewa Mulungu, wakala uko.

4 Siku iyo Elikana viyahitile kulava nhambiko, kamwing'ha unde Penina muke wake. Iviya kaweng'ha wanage wose wa chilume na wa chike unde dimwedimwe. 5 Mbali kamwing'ha Hana maunde maidi kwaviya kanogelwa nayo, ingawa Mndewa Mulungu kamtenda yawe mgumba. 6 Mbali Penina komsovulaga ng'hani Hana muladi kumtenda yawone usungu, kwaviya Mndewa Mulungu kamtenda yawe mgumba. 7 Mbuli iyo itendeka chila mwaka. Hana viyahitile kuna ikaye ya Mndewa Mulungu, muke miyage kamsovula. Ivo Hana kalila na kalema kuja. 8 Elikana mulumake kamuuza, "Hana, habali kolila? Habali kolema kuja? Habali kuna usungu? Niye nokugesa ng'hani kufosa viya wahakugesile wanago wa chilume hata one wahawile longo."

9 Viwakomeleze kuja na kung'wa uko Shilo, Hana kenuka na kahita kupula. Uko mkulu wa nhambiko Eli kakala yakalile muna ichigoda chake habehi na hanhu ha kwingilila muna dihema da Mndewa Mulungu. 10 Hana kakala na usungu ng'hani muna umoyo wake, kampula Mndewa Mulungu na kalila ng'hani. 11 Hana kailaha, kalonga, "Mndewa Mulungu Uli na Udahi, uhalola magayo yangu msang'hani wako na kunikumbuka, sekeunizimize niye msang'hani wako. One uhaning'ha mwana wa chilume, mwana iyo nizamtula kumwako weye Mndewa Mulungu siku zose za ugima wake na hezaweguligwa ditwi jake."

12 Hana kagendelela kumpula Mndewa Mulungu, Eli kamulola mulomo wake. 13 Hana kakala kopula muna umoyo wake, mulomo wake ukala wogudemeka, mbali dizi jake hadihulikike. Eli kagesa kakala yakoligwe. 14 Ivo Eli kamulongela, "Vino kwizakung'wa upele mbaka zuwaki? Leka kung'wa upele!"

15 Hana kamwidika, "Siivo bule mwenevale wangu, kwaviya niye ni muke yeli na magayo makulu. Sing'wile upele hebu chinhu chochose chikola, mbali niulava muhe wangu kwa Mndewa Mulungu. 16 Nigaya ng'hani na kulongelela kwa Mndewa Mulungu mbaka sambi, ivo sekeugese kuwa niye msang'hani wako ni mwanamke hafaya chinhu."

17 Eli kamwidika, "Hita kwa tindiwalo, Mulungu wa Isilaili yakwing'he chiya chiumpulile."

18 Hana kalonga, "Niye msang'hani wako nitogoligwe na weye." Mwanamke iyo kasegela, kaja ndiya na hawile na usungu kaidi.

19 Igolo yake imitondo Elikana na wanhu wa muna ikaye yake waidawa na wamtambikila Mndewa Mulungu, maabaho wahita ukaye yawo uko Lama. Elikana kambandama Hana muke wake na Mndewa Mulungu kamkumbuka muke iyo. 20 Ivo Hana kapata wimo na keleka mwana wa chilume mwanduso wa mwaka, kamtanga zina jake Samweli. Kalonga, "Nimpula kwa Mndewa Mulungu."

21 Elikana na wanhu wa muna ikaye yake wahita Shilo kaidi kumulavila Mndewa Mulungu nhambiko ya chila mwaka na kufikiza chilaho chake, 22 mbali Hana hahitile. Kamulongela mulumake, "Mwanangu yahaleka tombo nizamtula kwa Mndewa Mulungu na kezakala uko siku zose."

23 Elikana kamwidika, "Tenda vovose vouwona vofaya. Kala hakaye mbaka vondaumulekeze imwana kong'ha. Mndewa Mulungu yafikize mbuli yake muhala." Ivo Hana kasigala ukaye na kamong'heza mwanage mbaka viyamulekeze tombo.

24 Viyamulekeze tombo, kamsola imwana hamwe na ng'ombe lume da miyaka mitatu na chilo longo za usage na chiya cha divai, kamgala imwana muna dihema da Mndewa Mulungu uko Shilo, ija imwana kakala mdodo. 25 Viwakomeleze kumchinja ng'ombe iyo, wamgala imwana kwa Eli. 26 Hana kamulongela Eli, "Weye mwenevale wangu, kweli niye niiyo muke nimile habehi yako nompula Mndewa Mulungu. 27 Nipula ning'higwe mwana ino. Mndewa Mulungu kaning'ha chiya chinimpulile. 28 Lelo nomtula mwana ino kwa Mndewa Mulungu, nayo kezamsang'hanila Mndewa Mulungu siku zose za ugima wake." Maabaho kamtambikila Mndewa Mulungu hanhu haja.