1 Samweli viyawile mulala, kawatenda wanage wawe wasemi wa isi ya Isilaili. 2 Mwanage wa udele katangigwa Yoeli na mwanage wekaidi katangigwa Abiya, wawo wakala wasemi uko Belisheba. 3 Mbali wanage hawatendile fana viyatendile tati yawo, watenda ivo muladi wapate faida. Wahokela limangwe na wahumiza havilondeka.

4 Ivo walangulizi wose wa Isilaili waiting'hana hamwe na wahita uko Lama kwa Samweli. 5 Wamulongela, "Lola, weye kulala na wanago hawatenda fana viutendile weye. Chisagulile mfalume yachilangulize fana zisi zose zimwenga." 6 Mbali mbuli iyo imwihila Samweli, viwalongile, "Ching'he mfalume yachilangulize." Samweli kampula Mndewa Mulungu. 7 Mndewa Mulungu kamulongela Samweli, "Tegeleza chila chinhu chowokulongela wanhu, kwaviya hawakulemile weye, mbali wanilema niye sekeniwe mfalume wawo. 8 Fana viya viwatendile kwandusila siku ija viniwalavile muna iisi ya Misili mbaka diyelo, wanileka na kutambikila milungu imwenga. Sambi wokutendela weye. 9 Lelo wategeleze, mbali uwazume na uwalongele viya mfalume vondayawalangulize."

10 Samweli kawalongela mbuli zose za Mndewa Mulungu wanhu walondile mfalume. 11 Kawalongela, "Vino niivo vondayatende mfalume yondayamulangulizeni. Kezawasola wanenu wa chilume na kuwatenda wasang'hani muna yamatololi yake yobululigwa na falasi na kuwa wakwelafalasi na kudilongolela tololi jake da kubululigwa na falasi. 12 Wamwenga kezawatenda wawe wemilizi wa watowang'hondo maelufu na wamwenga wemilizi wa watowang'hondo malongo matano. Wanenu wa chilume wezalima mgunda wake na kugobola mavuno yake, iviya wezamtendela vinhu vake va ng'hondo na va matololi yake ya kubululigwa na falasi. 13 Kezawatenda wandele wenu kuwa wengaji wa mavuta yonung'ha goya na wambikaji na wokaji wa magate. 14 Kezasola migunda yenu inogile, migunda ya mizabibu na migunda ya mizaituni, muladi yaweng'he wasang'hani wake. 15 Iviya kezasola chibugulu chimwe chila muna vibugulu longo va mavuno yenu ya mizabibu na ya mhule, muladi yaweng'he wakulu wake na wasang'hani wake. 16 Mfalume kezasola wasang'hani wenu wa chilume na wachike na wabwanga wenu wanogile na vihongwe wenu na kuwatenda wamsang'hanile. 17 Kezasola mnyama imwe chila muna iwanyama wenu. Mweye wenyewo mwizakuwa watumwa wake. 18 Lusita ulo mwizamulamba Mulungu kwa ichimu cha mfalume wenu imumsagule wenyewo, mbali Mndewa Mulungu hezamwidikani siku iyo."

19 Mbali wanhu walema kumtegeleza Samweli, walonga, "Aka! Cholonda mfalume wa kuchilanguliza, 20 muladi chiwe fana zisi zimwenga zose, chiwe na mfalume wa kuchilanguliza na kuchilongolela kuna ing'hondo na kuchigombela." 21 Samweli viyahulike mbuli zose ziwalongile wanhu, kabwela kuzilonga kwa Mndewa Mulungu. 22 Mndewa Mulungu kamulongela Samweli, "Wategeleze na uweng'he mfalume."

Maabaho Samweli kawalongela wanhu wa Isilaili, "Chila munhu yabwele kuna dibululu jake."