1 Samweli kawalongela Waisilaili wose, "Nimwing'hani mfalume fana vimunipulile. 2 Lelo muna mfalume wa kumulangulizani. Niye mulala na nina uhenga na wanangu wahamwe na mweye. Nimulangulizani kwandusila vinikalile mbwanga mbaka diyelo. 3 Nabaha. Nilongelezeni haulongozi wa Mndewa Mulungu na yoyasaguligwe na Mulungu kuwa mfalume. Nisola ng'ombe wa yelihi? Hebu nisola chihongwe wa yelihi? Hebu nimbamanya yelihi? Hebu nimuwonela yelihi? Hebu kwa mkono wa yelihi nihokela lushwa initule yameso? Nizambwelezelani."

4 Waisilaili wedika, "Huchibamanye na huchiwonele na husolile chochose kulawa muna umkono wa munhu yoyose."

5 Samweli kawalongela, "Mndewa Mulungu na munhu yamsagule kuwa mfalume ni wakalangama wenu diyelo kwa chiya chimulongile." Wawo wamwidika, "Mndewa Mulungu iyo mkalangama."

6 Maabaho Samweli kawalongela, "Niiyo Mndewa Mulungu kawasagula Musa na Haluni kuwa walangulizi wenu na kuwalava wasaho zenu muna iisi ya Misili. 7 Lelo imeni hano, muladi nimulongelezeni haulongozi wa Mndewa Mulungu kwa kutambula sang'hano zose zinogile za Mndewa Mulungu zoyawatendele mweye na wasaho zenu. 8 Yakobo viyahitile Misili, wasaho zenu wamulilila Mndewa Mulungu yawataze, nayo kawatuma Musa na Haluni. Wawalava wasaho zenu muna iisi ya Misili na wawagala kukala muna iisi ino. 9 Mbali wasaho zenu wamzimiza Mndewa Mulungu, ivo kawaleka wahumigwe na Wafilisiti na mfalume wa Moabu na Sisela yakalile mulangulizi wa watowang'hondo wa Hazoli. 10 Iviya wasaho zenu wamulilila Mndewa Mulungu yawataze. Walonga, ‘Chitenda uhasanyi! Chileka kukutambikila weye Mndewa Mulungu, chandusa kuwatambikila Mabaali na Maashitalosi. Mbali sambi one uhachilopola kulawa kwa wehi wetu, chizakutambikila weye.’ 11 Mndewa Mulungu kawatuma Yelubaali na Balaki na Yefita na Samweli, kamulopolani kulawa muna yamakono ya wehi wenu banzi zose, mweye mukala goya. 12 Vimumuwone Nahashi mfalume wa Waamoni keza kuitowa na mweye, munilongela, ‘Siivo, mbali mfalume kezachitawala,’ ingawa Mndewa Mulungu, Mulungu wenu kakala mfalume wenu.

13 "Lelo ino niiyo mfalume yomumsagule, munhu yomunipulile, Mndewa Mulungu kamwikilani mfalume yamtawaleni. 14 One muhamdumba Mndewa Mulungu na kumuhishimu na kumtambikila na kuzindilila malagilizo yake, one mweye na mfalume yomtawalani muhamsondelela Mndewa Mulungu, Mulungu wenu, mbuli zizakala goya. 15 Mbali one hamumtegeleza Mndewa Mulungu na one hamuzindilila malagilizo yake, kezamtagusani fana viikalile kwa wasaho zenu.

16 "Lelo imeni mulole mbuli ng'hulu yondayaitende Mndewa Mulungu kuulongozi wenu. 17 Vino diyelo siyo siku ya kuhuna ngano? Nizampula Mndewa Mulungu yagale mbumo na mvula. Muhawona ivo, mwizavimanya kuwa mumuhasanya Mndewa Mulungu vimumpulile yamwing'heni mfalume." 18 Ivo Samweli kampula Mndewa Mulungu, Mndewa Mulungu kagala mbumo na mvula siku iyo. Ivo wanhu wose wamdumba ng'hani Mndewa Mulungu na Samweli. 19 Wanhu wose wamulongela Samweli, "Chokulamba uchipulile kwa Mndewa Mulungu cheye wasang'hani wako muladi sekechidanganike, kwaviya chitenda uhasanyi na chongeza uhasanyi wetu kwa kulonda mfalume." 20 Samweli kawedika "Sekemudumbe, kweli mutenda wihi uno wose, mbali sekemuleke kumsondelela Mndewa Mulungu na msang'hanileni yeye kwa mizoyo yenu yose. 21 Sekemutambikile nyang'hiti za milungu zili hazifaya chochose! Izo zabule udahi wowose na hazidaha kumtazani hebu kumulopolani vomukuwa muna yamagayo. 22 Mndewa Mulungu hezawaleka wanhu wake muladi wanhu wose wadimanye zina jake kulu, kwaviya imnogela muwe wanhu wake. 23 Nizakuwa nimuhasanya Mndewa Mulungu one nihaleka kumpulilani! Nizamfunzani kukala vinogile na voilondeka. 24 Mbali mumdumbe Mndewa Mulungu na mumsang'hanile kwa waminika na kwa mizoyo yenu yose. Kumbukeni viyamtendeleni mbuli ng'hulu. 25 Mbali one muhagendelela kutenda mbuli zihile, mwizawingigwa mweye na mfalume wenu."