1 Daudi kasegela Gasi na kakimbilila kuna dituka da Adulamu. Ndugu zake wose na wanhu wose weli muna ikaye ya tati yake viwahulike, wamsondelela uko. 2 Wanhu wose wakalile muna yamagayo na wakalile na madeni hebu waja wakalile na usungu muna imizoyo yawo, waiduganya kwa Daudi, nayo kawa mulangulizi wawo. Wanhu wose wakala fana magana mane.

3 Kulawa uko Daudi kahita Misipa uko Moabu, Daudi kamulongela mfalume wa Moabu, "Nokulamba watogolele tati yangu na mami yangu weze wakale na weye mbaka vondanivimanye chondayanitendele Mulungu." 4 Ivo kawagala tati yake na mami yake kwa mfalume wa Moabu, wakala hamwe nayo lusita Daudi viyakalile kaifisa muna imhongono.

5 Maabaho mulotezi Gadi kamulongela Daudi, "Sekeukale hano hana ichifiso. Hita kuna iisi ya Yuda." Ivo Daudi kasegela kahita kukala kuna imbago ya Helesi.

6 Sauli kahulika kuwa Daudi na wanhu wake wawoneka. Sauli kamhisa mgoha muna umkono, hasi ya mbiki wa mkwazu kuna ichilima uko Gibea na kuno wasang'hani wake wose wema kumzunguluka. 7 Sauli kawalongela wasang'hani wake, "Tegelezeni mweye wanhu wa Benyamini! Vino mwana wa Yese kezamwing'hani mweye wose masokola na migunda ya mizabibu? Kezamtendani muwe walangulizi wa watowang'hondo magana hebu watowang'hondo maelufu? 8 Vino lekamana muitogolela kunitendela mbuli zihile? Habule hata imwe wenu yanilongele kuwa mwanangu keka lagano na mwana wa Yese. Habule hata imwe wenu yonitaza hebu kunilongela kuwa mwanangu niiyo yamsongeze msang'hani wangu Daudi yanisepe fana viyotenda diyelo."

9 Mbali Doegi Mwedomu yemile hamwe na wasang'hani wa Sauli kedika, "Nimuwona mwana wa Yese kohita uko Nobu kwa Ahimeleki mwana wa Ahitubu. 10 Ahimeleki kampula Mndewa Mulungu kwa ichimu cha Daudi na kamwing'ha ndiya na diya dipanga da Goliati Mfilisiti."

11 Mfalume katuma usenga kuwatanga Ahimeleki mwana wa Ahitubu mkulu wa nhambiko na wanhu weli muna ulukolo lwa tati yake wakalile wakulu wa nhambiko uko Nobu. Wawo wose weza kwa mfalume. 12 Sauli kalonga, "Uhulike sambi weye mwana wa Ahitubu."

Nayo kedika, "Nabahano mwenevale wangu."

13 Sauli kamuuza, "Habali munitendela mbuli ihile weye na mwana wa Yese? Habali kumwing'ha ndiya na panga na kumpulila kwa Mulungu, muladi yanileke na kunisepa fana viyotenda diyelo?"

14 Ahimeleki kamwidika mfalume, "Vino yelihi imwe wa wasang'hani wako wose yeli mwaminika fana Daudi, mkoi wa mfalume, mulangulizi wa watowang'hondo wako yohishimika ng'hani muna ikaye yako? 15 Vino niye nyandusa diyelo kumpulila Daudi kwa Mulungu? Siivo bule! Mfalume sekeunigese vihile niye hebu kaye ya tati yangu. Kwaviya niye msang'hani wako simanyile mbuli yoyose."

16 Mbali mfalume Sauli kamulongela Ahimeleki, "Kweli kwizadanganika weye na kaye ya tati yako."

17 Maabaho mfalume kawalongela wakalizi wakalile habehi nayo, "Wakomeni wakulu wa nhambiko wa Mndewa Mulungu, kwaviya nawo wailumba na Daudi. Wakala wovimanya kuwa Daudi kakala yokimbila na hawanilongele."

Mbali wakalizi wa mfalume hawatogole kugolosa makono kuwakoma wakulu wa nhambiko wa Mndewa Mulungu.

18 Maabaho mfalume kamulagiliza Doegi, "Wakome wakulu wa nhambiko." Ivo Doegi Mwedomu kawakoma. Siku iyo kawakoma wakulu wa nhambiko malongo manane na watano woyawala vizibawo va chitani. 19 Iviya Sauli kaditowa Nobu bululu da wakulu wa nhambiko kwa panga, kawakoma walume na wanaake na wana na wana wokong'ha na ng'ombe na vihongwe na ng'hondolo.

20 Abiasali mwana wa chilume wa Ahimeleki mwana wa Ahitubu, kaibanga na kahita kwiilumba na Daudi. 21 Abiasali kamulongela Daudi, "Sauli kawakoma wakulu wa nhambiko wa Mndewa Mulungu." 22 Maabaho Daudi kamulongela Abiasali, "Siku ija viyakalile Doegi Mwedomu nivimanya kezamulongela Sauli. Niye icho ichimu cha kukomigwa kwa wanhu wose weli muna ikaye ya tati yako. 23 Kala hano sekeudumbe, kwaviya munhu yolonda kukukoma weye niiyo yolonda kunikoma niye. Uhawa hamwe na niye kwizakuwa mgima."