1 Sanduku da lagano da Mndewa Mulungu vidikalile kuna iisi ya Wafilisiti kwa miyezi saba, 2 Wafilisiti wawatanga wakulu wa nhambiko wa Dagoni na walaguzi, wawalongela, "Chiditendeze sanduku da lagano da Mndewa Mulungu? Chilongeleni chidibweleze hanhu hake na chinhu chilihi?"

3 Wamwidika, "One mwahadibweleza sanduku ijo da Mulungu wa Isilaili, sekemudibweleze bila chinhu, mbali mumgalile nhambiko za ubananzi, ivo mwizahona. Iviya mwizavimanya chimu chimtendile Mulungu yamgazeni."

4 Wafilisiti wauza, "Chimgalile choni chiwe nhambiko ya ubananzi?"

Wawedika, "Maihu ya zahabu matano na ngoso wa zahabu watano, ihu dimwe na ngoso imwe kwa chila mulangulizi Mfilisiti, kwaviya mahulo yampatani mweye na walangulizi wenu. 5 Ivo mwizatenda nyang'hiti za maihu yenu na nyang'hiti za ngoso wenu woibananga isi, muladi mweye mumtogoze Mulungu wa Isilaili. Yodahika kezamuhunguzilani magayo mweye na milungu yenu na isi yenu. 6 Habali moitenda mizoyo yenu kuwa midala fana viwatendile Wamisili na mfalume wa Misili? Mulungu viyawatendele Wamisili kwa kukalika, Wamisili walondeka wawaleke Waisilaili wasegele, kweli wasegela. 7 Lelo itendeleni tololi da sambi, soleni na ng'ombe waidi wokamigwa weli hawanafungigwa nila mukawafunge muna ditololi na kuyasegeza madang'ang'a yawo na kuyaguma muna dibumba. 8 Soleni sanduku da lagano da Mndewa Mulungu mudike muna ditololi, vinhu va zahabu vondamumgalile kuwa nhambiko zenu za ubananzi muvike muna disanduku dimwenga hamgwazo yake. Maabaho dilekeni ditololi dihite. 9 Maabaho muulole, one uhahita muna inzila ya kuhita kuna iisi ya Isilaili bululu da Besi Shemesi, chizavimanya Mndewa Mulungu niiyo yachigalile magayo. Mbali one hauhita, chizavimanya kuwa Mndewa Mulungu hachigalile magayo mbali chipatigwa na setani."

10 Watenda fana viwalongeligwe. Wasola ng'ombe waidi wokong'heza na wawafunga muna ditololi, madang'ang'a yawo wayafunga muna dibumba. 11 Wadika sanduku da lagano da Mndewa Mulungu muna ditololi, hamwe na sanduku dili na nyang'hiti za ngoso wa zahabu na nyang'hiti za maihu ya zahabu. 12 Ng'ombe wawo wahita dimwe kwa dimwe mbaka Besi Shemeshi, wasondelela inzila kuno wolila, mbali hawabaguke kulume hebu kumoso. Walangulizi wa Wafilisiti wawasondelela mbaka wafika kuna imhaka ya Besi Shemeshi.

13 Wanhu wa Besi Shemeshi wakala wohuna ngano yawo kudibawe, viwalolile na kuwona sanduku da lagano, wadeng'helela. 14 Tololi diya dingila muna umgunda wa Yoshua wa Besi Shemeshi na wima habehi na luwe lukulu. Wanhu watula imibiki ya ditololi na wawalava ng'ombe waja kuwa nhambiko ya kutimbula kwa Mndewa Mulungu. 15 Walawi wadihumulusa sanduku da lagano da Mndewa Mulungu, hamwe na diya disanduku dimwenga dikalile na vinhu va zahabu, wavika uchanyha ya luwe lukulu, wanhu wa Besi Shemeshi walava nhambiko za kutimbula na kuchinja nhambiko siku iyo iyo kwa Mndewa Mulungu. 16 Walangulizi watano wa Wafilisiti viwawonile mbuli iyo, wabwela Ekiloni siku iyo iyo.

17 Zino izo nyang'hiti za maihu ya zahabu zowagalile Wafilisiti ziwe nhambiko za ubananzi kwa Mndewa Mulungu, ihu dimwe kwa chila bululu, Ashidodi na Gaza na Ashikeloni na Gasi na Ekiloni. 18 Iviya wagala ngoso wa zahabu kwa kusondelela mabululu yose ya Wafilisiti yaja yalangulizigwe na wafalume watano, mabululu yeli na mhongono na vibululu. Luwe luja lowekile sanduku da lagano da Mndewa Mulungu uchanyha yake, lwauko mbaka diyelo kuna umgunda wa Yoshua wa Besi Shemesi fana ukalangama kwa mbuli ziya zilawilile.

19 Mndewa Mulungu kawakoma walume wamwenga malongo saba wa Besi Shemesi kwaviya wasungulila muna disanduku da lagano. Wanhu waomboleza kwa ichimu cha hulo kulu kulawa kwa Mndewa Mulungu.

20 Ivo wanhu wa Besi Shemeshi walonga, "Yelihi yodaha kwima haulongozi wa Mndewa Mulungu, Mulungu ino yelile? Kulawa hano sanduku da lagano dizahita kwa yelihi?" 21 Wawatuma wasenga kwa wanhu wa Kiliasi Yealimu wakalonge, "Wafilisiti wadibweleza sanduku da lagano da Mndewa Mulungu. Izoni mudisole."