1 Sauli kamulongela Yonasani mwanage hamwe na wasang'hani wake wose kuwa wolondeka wamkome Daudi. Mbali Yonasani kamulonda ng'hani Daudi. 2 Ivo kamulongela Daudi, "Tati yangu kolonda kukukoma. Ivo uiteganye, igolo imitondo ukale hanhu haholile na ukaifise. 3 Nizahita na kwima habehi na tati yangu kuna umgunda hanhu hondauwe weye. Baho nizalonga nayo kusonhela weye, chinhu chochose chondanihulike kusonhela weye, nizakulongela."

4 Yonasani kamtogoza Daudi kwa Sauli tati yake, kamulongela, "Weye mfalume, sekeumuhasanye Daudi msang'hani wako, kwaviya hakuhasanye na sang'hano zake zinoga kumwako. 5 Kwaviya viyamkomile Goliati keka ugima wake muna ihatali, nayo Mndewa Mulungu kaweng'ha Waisilaili uhumi mkulu. Weye viuwone viya kudeng'helela. Habali kolonda kumtendela mbuli zihile munhu yelibule ubananzi fana Daudi kwa kumkoma bila chinhu?" 6 Sauli kamtegeleza Yonasani, maabaho kailaha, "Noilaha fana Mndewa Mulungu yeli mgima kuwa Daudi hezakomigwa." 7 Ivo Yonasani kamtanga Daudi na kamulongela mbuli izo zose. Yonasani kamgala Daudi kwa Sauli, nayo kamsang'hanila fana ichanduso. 8 Maabaho kulawilila ng'hondo kaidi hagati ya Wafilisiti na Waisilaili. Daudi kahita kuitowa na Wafilisiti, kawakoma wengi na wamwenga wakimbila. 9 Siku dimwe muhe yehile kulawa kwa Mndewa Mulungu kamwizila Sauli. Kakala yakalile ukaye yake kuno kamha mgoha, nayo Daudi kakala yotowa bango. 10 Sauli kageza kumtowa Daudi kuna ing'huta kwa mgoha wake, mbali yeye kaukwepa mgoha wa Sauli, mgoha uwo uhoma ing'huta. Nayo Daudi kakimbila ichilo icho kakomboka. 11 Sauli katuma wanhu kuna ikaye ya Daudi muladi wakamsepe na kumkoma imitondo. Mikali muke wa Daudi kamulongela, "One hukimbile kuugombela ugima wako ichilo cha diyelo, igolo kwizakomigwa." 12 Mikali kamuhulumusa Daudi muna dizonzo, nayo kakimbila na kahonyoka. 13 Mikali kasola nyang'hiti ya mulungu, kaitambalisa muna dikomwa na kaikila mazoya ya luti mditwi jake, maabaho kaigubika na walo. 14 Sauli viyatumile wanhu wakamgwile Daudi, Mikali kalonga, "Daudi kolumwa." 15 Maabaho Sauli kawatuma kaidi wanhu wakamulole Daudi, kawalongela, "Mgaleni hamwangu ivo viyeli muna dikomwa muladi nimkome." 16 Mbali wanhu viwahitile wafika nyang'hiti muna dikomwa na mazoya ya luti mditwi jake. 17 Sauli kamuuza Mikali, "Habali kunivwizila vino na kumuleka mwihi wangu yanibange?" Mikali kamwidika, "Kanilongela nizakukoma one hunitazile kuibanga."

18 Daudi kakimbila na kahonyoka, kamuhitila Samweli uko kuna dibululu da Lama na kamulongela chila chinhu chiyamtendele Sauli. Ivo Daudi na Samweli wahita kukala Nayosi. 19 Sauli kalongeligwa kuwa Daudi kauko Nayosi muna dibululu da Lama. 20 Sauli kawatuma wanhu muladi wakamgwile Daudi, mbali viwawonile bumbila da walotezi wolotela na Samweli kema fana mulangulizi wawo, Muhe wa Mulungu uwezila wanhu wa Sauli, nawo iviya walotela. 21 Sauli viyalongeligwe, kawatuma wanhu wamwenga, nawo iviya walotela. Sauli kawatuma wanhu wamwenga mwanza weketatu, nawo iviya walotela. 22 Maabaho yeye mwenyewo kahita Lama, kafika kuna ichisima chikulu chili uko Seku. Kawauza wanhu, "Samweli na Daudi wakulihi?"

Wamwidika, "Wauko Nayosi muna dibululu da Lama."

23 Ivo Sauli kahita uko Nayosi muna dibulu da Lama. Mbali muinzila Muhe wa Mulungu kamwizila, yeye iviya kandusa kolotela mbaka kafika Nayosi. 24 Kahambula mawalo yake ya chifalume, nayo iviya kalotela haulongozi wa Samweli na kagona ukengele imisi na ichilo. Ivo wanhu walonga, "Vino Sauli nayo ni imwe wa walotezi?"