1 Samweli kadanganika. Waisilaili wose waiting'hana hamwe, wamulilila na wamuwanda ukaye yake uko Lama. Maabaho Daudi kahita kuna ichuwala cha Palani.

2 Kukala na munhu imwe uko Maoni yakalile na sang'hano uko Kalimeli. Munhu iyo kakala na vinhu vingi ng'hani, kakala na ng'hondolo 3,000 na luti 1,000. Kakala kowakanha mazoya ng'hondolo wake uko Kalimeli. 3 Munhu iyo katangigwa Nabali na muke wake katangigwa Abigaili. Imuke kakala na ubala na lumondo, mbali mulumake kakala yokalika na yotenda yehile, iviya kakala wa lukolo lwa Kalebu.

4 Daudi viyakalile kuchuwala, kahulika kuwa Nabali kakala kowakanha mazoya ng'hondolo wake. 5 Daudi katuma wabwanga longo, kawalongela, "Hiteni kwa Nabali uko Kalimeli muladi kumulamsa kwa zina jangu. 6 Mulongeleni, ‘Tindiwalo diwe kumwako na muna ikaye yako na kwa vinhu vose viuli navo!

7 " ‘Nihulika kuwa kuna wanhu wokanha mazoya ng'hondolo wako. Wadimi wako wakala hamwe na cheye na cheye hachiwatendele yehile. Lusita lose wakala uko Kalimeli mbali habule chinhu chawo chochose chagile. 8 Wauze wasang'hani wako nawo wezakulongela. Ivo wabwanga wano watogoleke haulongozi wako kwaviya chiza siku ya dugila. Nokulamba uweng'he wasang'hani wako na niye mwanago Daudi chochose chouli nacho.’ "

9 Ivo wabwanga wa Daudi viwafikile, wamulongela Nabali mbuli zose fana viwalongeligwe na Daudi, maabaho wagozela.

10 Nabali kawedika wasang'hani wa Daudi, kalonga, "Daudi niiyo yelihi? Mwana wa Yese niiyo yelihi? Siku zino kuna wasang'hani wengi wowabanga wenevale wawo. 11 Habali nisole ndiya yangu na mazi yangu na nyama iniwachinjile wakanha mazoya wangu na kuweng'ha wanhu weli siwamanyile walawa kulihi?"

12 Wabwanga wa Daudi wahindula wasegela. Viwafikile wamulongela Daudi mbuli zose. 13 Daudi kawalongela wanhu wake, "Haya, chila munhu yasole panga jake." Nawo wasola chila munhu panga jake na Daudi iviya kasola panga jake. Wanhu fana magana mane wakwela hamwe na Daudi na wanhu magana maidi wasigala na mbahasha.

14 Mbali msang'hani imwe wa Nabali kamulongela Abigaili yeli muke wa Nabali, "Vino kuhulika? Daudi katuma wasenga kulawa kuchuwala weze kumulamsa mwenevale wetu, mbali yeye kawaliga. 15 Mbali wanhu wano wachitendela yanogile ng'hani, hachipatile dihile jojose hebu hachagiligwe na chinhu chochose vichikalile hamwe nawo kuna umgunda. 16 Wawo wakala fana mhongono kumwetu kwa kuchikaliza ichilo na imisi, chikala hamwe nawo lusita lose vichikalile chodima ng'hondolo. 17 Lelo geseni na muvimanye mwizatenda choni kwa mbuli ino, kwaviya mwenevale wetu kalungiligwa yehile hamwe na kaye yake yose. Yeye mtatali na habule munhu yodaha kulonga nayo."

18 Abigaili hakalame bule. Kasola magate magana maidi na viya vidi va divai na ng'hondolo watano wachinjigwe na chilo longo na saba za uhishi na vipambo gana va zabibu zinyalile na vibuluga magana maidi va nhini, kawapapiza vihongwe. 19 Maabaho Abigaili kawalongela wasang'hani wake, "Longoleni niye nahachisogo chenu." Mbali hamulongele Nabali mulumake.

20 Viyakwelile chihongwe wake na kuhulumuka kuna dikolongo da mulima, Daudi na wanhu wake wahumuluka na waiting'hana nayo. 21 Daudi kalonga, "Nikaliza vinhu vose va Nabali kuchuwala na sing'higwe chochose, habule chinhu chake chochose chagile. Niye nimtendela yanogile mbali yeye kaniliha yehile. 22 Mndewa Mulungu yanitendele niye na kongezeka, one ifikile imitondo sigambeyasigale hata mulume imwe muna ikaye ya Nabali."

23 Viyamuwone Daudi, Abigaili kahulumuka hima muna ichihongwe wake na katumbala mavindi mbaka chihanga chake chidalisa hasi haulongozi wa Daudi. 24 Kaibwanha muna imigulu ya Daudi, kalonga, "Mwenevale wangu ubananzi uno na uwe kumwangu niye. Nokulamba unilekele niye msang'hani wako nilonge na weye, uhulike mbuli zonilonga. 25 Nokulamba mwenevale wangu, sekeumgese munhu ino yeli mtatali Nabali. Yeye kalinga fana zina jake, fambulo da zina jake ni mbozi na ubozi kanawo. Mbali kumwangu niye msang'hani wako, siwawonile wabwanga waja woyawatumile mwenevale wangu.

26 "Lelo Mndewa Mulungu kakugomesa weye mwenevale wangu, kukoma na kulihiliza kwa makono yako mwenyewo. Fana viya Mndewa Mulungu voyokala na weye voukala, wehi wako na wose womulungila yehile mwenevale wangu watagusigwe fana Nabali vondayatagusigwe. 27 Chitumetume chino msang'hani wako nikugalila weye mwenevale wangu, weng'he wabwanga wokusondelela. 28 Nokulamba unilekelele niye msang'hani wako ubananzi unitendile, kwaviya Mndewa Mulungu kezagangamiza ulangulizi wako na ulangulizi wa wanago, kwaviya weye mwenevale wangu koitowa ng'hondo ya Mndewa Mulungu. Sekeutende dihile jojose siku zose za ugima wako. 29 One kuhawa na munhu yolonda kukukoma, sekeutogole dihile jojose diwoneke kumwako siku zose za ugima wako. Mndewa Mulungu kezakukaliza goya mwenevale wangu fana munhu yokaliza mbahasha yake ya hela nyingi. Mbali ugima wa wehi wako wizapigisigwa fana viya mbwewe kulawa muna ing'humbwewe. 30 Mndewa Mulungu vondayamtendele mwenevale wangu chila chinhu chinogile chiyalongile kusonhela weye na kumwika kuwa mulangulizi wa Isilaili, 31 hwizakuwa na wihi hebu ubananzi wa umoyo hebu kwa kukoma hebu kwaviya mwenevale wangu kuilihiliza mwenyewo. Iviya Mndewa Mulungu vondayakutendele yanogile mwenevale wangu, umkumbuke msang'hani wako."

32 Daudi kamulongela Abigaili, "Mndewa Mulungu, Mulungu wa Isilaili yatogolwe, yakutumile uiting'hane na niye diyelo. 33 Utemeligwe mate ulamuzi wako unogile kwa kunikimilila sekenikome diyelo na kulihiliza kwa makono yangu. 34 Kwaviya fana voyokala Mndewa Mulungu, Mulungu wa Isilaili, kanigomesa sekenikukome. One hulopole kwiza kuiting'hana na niye, kweli igolo imitondo sigambeyasigale hata mulume imwe muna ikaye ya Nabali."

35 Daudi kahokela vinhu viyeng'higwe na Abigaili, kalonga, "Sekeudumbe, hita ukaye. Nizatenda fana viupulile."

36 Abigaili viyahitile kwa Nabali, kamfika Nabali muna ikaye kotenda dugila fana diya da mfalume. Kakala na deng'ho ng'hani na kakala yakoligwe. Ivo Abigaili hamulongele mbuli yoyose mbaka viuchile. 37 Viifikile imitondo, Nabali upele viukunguzuke, muke wake kamulongela mbuli izo zose, bahaja lukuli lwa Nabali lufa nene na kanyala mbamba. 38 Vizifosile siku longo, Mndewa Mulungu kamtenda Nabali yadanganika.

39 Daudi viyahulike kuwa Nabali kadanganika, kalonga, "Mndewa Mulungu Yatogogwe ija yamulihilizile Nabali kwa viyaniligile. Mndewa Mulungu kanikimilila niye msang'hani wake sekenitende mbuli zihile, kamulihilizila Nabali kwa wihi uyanitendele."

Maabaho Daudi katuma usenga kwa Abigaili kulonda yamsole yawe muke. 40 Wasang'hani wa Daudi wahita Kalimeli kwa Abigaili, wamulongela, "Daudi kachituma kumwako muladi chikusole uwe muke wake."

41 Abigaili katumbala mavindi mbaka chihanga chake chidalisa hasi, kalonga, "Nizakuwa msang'hani wa Daudi na kuwanava magulu wasang'hani wake." 42 Abigaili kenuka himahima na kakwela chihongwe wake hamwe na wasang'hani wake watano, kahita hamwe na wasenga wa Daudi na kawa muke wake. 43 Iviya Daudi kamsola Ahinoamu kulawa Yezileeli. Wose waidi wawa wake zake. 44 Mbali Sauli kamfungiza zengele Mikali mndele wake, yakalile muke wa Daudi kwa Paliti mwana wa Laishi munhu yakalile yolawa Galimu.