1 Wafilisiti waitowa ng'hondo na Isilaili, Waisilaili wawakimbila Wafilisiti, wengi wakomigwa kuna umulima wa Giliboa. 2 Wafilisiti wamsondelela ng'hani Sauli na wanage wa chilume, wawakoma Yonasani na Abinadabu na Malikishua weli wana wa Sauli. 3 Ng'hondo ikala ng'hulu ng'hani kwa Sauli, wapigisaji wa misale wamguma nhale Sauli na wamulumiza ng'hani.

4 Sauli kamulongela mpagazi ija wa via vake va ng'hondo, "Somola zele jako unikome, muladi sekenidunhunzigwe na sekenikomigwe na wanhu wano hawagumigwe ulungwana." Mbali munhu iyo kalema, kwaviya kadumba ng'hani. Ivo Sauli kadilava zele jake na kadigwila na dimkoma. 5 Munhu iyo viyawonile kuwa Sauli kadanganika, nayo iviya kadigwila zele jake na kaikoma hamwe na Sauli. 6 Ivo Sauli na wanage watatu na mpagazi wa via va ng'hondo na wanhu wake wose, wadanganika hamwe siku iyo iyo.

7 Waisilaili wakalile ubanzi umwenga wa bawe diya na kuumwambu wa Yoludani, viwawonile watowang'hondo wa Isilaili wakimbila na iviya Sauli na wanage wadanganika, wayaleka mabululu yawo na wakimbila. Wafilisiti wahita na wakala umo.

8 Igolo yake Wafilisiti viwahitile kuhoka mitufi ija, wamfika Sauli na wanage watatu wagwa muna umulima wa Giliboa. 9 Wamdumula Sauli iditwi na wamuhoka via vake va ng'hondo na watuma usenga muna iisi yose ya Wafilisiti kugong'onda mbuli iyo muna ikaye ya nyang'hiti za milungu na kwa wanhu. 10 Weka via va ng'hondo va Sauli muna ikaye ya milungu Maashitalosi na wautumbika mtufi wake muna ing'huta ya bululu da Besi Shani.

11 Wanhu wa Yabeshi Gileadi viwahulike chiya Wafilisiti chiwamtendele Sauli, 12 watowang'hondo magalu wose wahita ichilo chose mbaka Besi Shani. Waisola mtufi ya Sauli na mitufi ya wanage, waisegeza muna ing'huta ya bululu da Besi Shani na waigala Yabeshi, uko waitimbula. 13 Maabaho wasola mavuha yawo na wayawanda hasi ya mbiki wa mkwazu uko Yabeshi na hawadile kwa siku saba.