1 Viifosile ifa ya Sauli, Daudi kabwela kulawa kuwakoma Waamaleki na kakala Sikilagi siku mbili. 2 Siku yeketatu, munhu imwe keza kulawa kuna dilago da Sauli, kuno viwalo vake videgeka na kana matimbwisi muna iditwi jake kulagusa kana usungu. Viyafikile kwa Daudi, kaibwanha hasi haulongozi wake kwa hishima. 3 Daudi kamuuza, "Weye kulawa kulihi?"

Munhu iyo kamwidika, "Nikimbila muna dilago da Waisilaili."

4 Daudi kamuuza, "Lelo nilongele uko kulawilila choni?"

Kamwidika, "Wanhu wakimbila ng'hondo. Wanhu wengi wadanganika. Iviya Sauli na Yonasani mwanage wadanganika."

5 Maabaho Daudi kamuuza mbwanga ija yezile kumulongela, "Kuvimanyaze kuwa Sauli na Yonasani mwanage wadanganika?"

6 Mbwanga ija kamwidika, "Nikala kuna umulima wa Giliboa, uko Sauli kakala kasigamila mgoha wake na matololi ya kubululigwa na falasi na wakwelafalasi ya wehi wake ikala yomuwinga. 7 Viyahinduke kuchisogo, kaniwona na kanitanga. Nimwidika, ‘Nabaha!’ 8 Nayo kaniuza, ‘Weye iyo yelihi?’

"Nimwidika, ‘Niye Mwamaleki.’

9 "Maabaho kanilongela, ‘Kwenhuka hano unikome, kwaviya nina mawine ng'hani, mbali ning'hali mgima.’

10 "Ivo nimkwenhukila habehi na nimkoma, kwaviya nivimanya kuwa yahagwa hadaha kuwa mgima. Maabaho nisola kombelo dikalile muna iditwi jake na kung'hu dikalile muna umkono wake, vose nikugalila weye, mwenevale wangu."

11 Daudi kavidega viwalo vake kwa usungu, iviya walume wose wakalile hamwe nayo kawatendela ivo. 12 Walila na wafunga kuja mbaka ichigulogulo kwa ichimu cha Sauli na Yonasani, na kwa ichimu cha watowang'hondo wa Mndewa Mulungu na wanhu wa Isilaili, kwaviya wengi wawo wakomigwa kuna ing'hondo.

13 Daudi kamuuza mbwanga ija yezile kumulongela mbuli izo, "Weye kolawa kulihi?"

Nayo kamwidika, "Niye Mwamaleki, mbali nokala muna isi yako fana mkaya."

14 Daudi kamuuza, "Iwaze hudumbile kumkoma munhu yasaguligwe na Mndewa Mulungu?"

15 Maabaho Daudi kamtanga imwe wa wabwanga wake, kamulongela, "Hita ukamkome iyo!" Ivo kamkanha na panga na kadanganika. 16 Viyakalile kodanganika, Daudi kamulongela Mwamaleki iyo, "Ifa yako iwe kumwako weye mwenyewo, kwaviya kuilongeleza mwenyewo, kulonga, ‘Nimkoma munhu yasaguligwe na Mndewa Mulungu.’ "

17 Daudi kamulilila Sauli na Yonasani mwanage, kemba vino, 18 na kalonga kuwa yolondeka wanhu wa Yuda wafunzigwe kwimba Wila wa Upinde. Yandikigwa muna ichitabu cha Yashali, kalonga,

19 "Ukulu wako weye Isilaili,

ukomigwa kuna imilima.

Magalu wagwa!

20 "Sekemuzilonge mbuli zino uko Gasi,

sekemuzigong'onde muna zinzila za Ashikeloni,

muladi wandele wa Wafilisiti sekewadeng'helele,

wandele wa waja hawagumigwe ulungwana sekewatowe ng'henze.

21 "Milima ya Giliboa,

sekeiwe na nhungwe hebu mvula,

na migunda sekeime mhule za nhosa,

kwaviya uko niuko kozasigwe ngao za wene nguvu,

ngao ya Sauli, haibobodigwe mavuta kaidi.

22 Upinde wa Yonasani ukala na nguvu,

panga da Sauli difikizigwa,

ziwakoma wehi wawo,

ziwakoma magalu.

23 "Sauli na Yonasani walondigwa na wanhu na wanogeza,

hawabaguligwe viwakalile wagima hebu viwadanganike.

Wakala wahuha kufosa masumula,

wakala na nguvu kufosa simba.

24 "Mweye wanaake wa Isilaili mulilileni Sauli,

yoyamvazileni mawalo madung'hu yanogile,

na kayahamba zahabu mawalo yenu.

25 "Magalu wagwa kuna ing'hondo!

Yonasani kakomigwa kuna imilima.

26 Niwona usungu kwa ichimu chako, ndugu yangu Yonasani,

kukala mbwiyangu ng'hani.

Ulondo wako kumwangu ukala wa mwazanyo,

kufosa ulondo wa wanaake.

27 "Magalu wagwa,

via vawo va ng'hondo vaga!"