1 Vizifosile mbuli izo, mfalume Nahasi wa Waamoni kadanganika na mwanage yoyatangigwe Hanuni kawa mfalume. 2 Mfalume Daudi kalonga, "Nizamulagusa ulondo wa kufunya umoyo Hanuni mwana wa Nahashi fana viya viyanitendele tati yake." Ivo Daudi katuma wasenga kumuliza Hanuni kusonhela tati yake.

Wasenga wa Daudi viwafikile muna iisi ya Waamoni, 3 wakulu wa Waamoni wamulongela Hanuni mwenevale wawo, "Kogesa kuwa Daudi kamuhishimu tati yako kwa kuchigalila wanhu wakulize? Vino Daudi hawatumile wanhu wano bule kumwako muladi kudipekula na kudipelemba bululu na kudinanga?"

4 Ivo Hanuni kawasola wasenga wawo wa Daudi, kawawegula chila imwe banzi ya ndevu zake, kayadeka mawalo yawo hagati mbaka muna yamadako, maabaho kawalekelela wahite. 5 Daudi viyalongeligwe mbuli ino kawatuma wasenga kuhita kuwahokela, kwaviya wakala wagumigwa chinyala. Mfalume kalonga, "Kaleni uko Yeliko mbaka ndevu zenu vondazote, maabaho mubwele ukaye."

6 Waamoni viwawonile kuwa wamguma ludoko Daudi, wagoneka watowang'hondo wogenda na migulu Washami 20,000 kulawa Besi Lehobu na Soba, iviya mfalume wa Maaka hamwe na watowang'hondo 1,000 na iviya watowang'hondo 12,000 kulawa Tobu. 7 Daudi kahulika mbuli izo na kamtuma Yoabu hamwe na magalu wose wa watowang'hondo. 8 Waamoni walawa na waipanga kwa ng'hondo hana ulwivi mkulu wa bululu jawo na Washami wa Soba na Lehobu na wanhu kulawa Tobu na Maaka wakala waidumwe kuichuwala.

9 Yoabu viyawone kuja kuwa waipanga misitali kuulongozi wake na kuchisogo, kabagula wamwenga wa watowang'hondo magalu ng'hani wa Isilaili, kawapanga kuitowa na Washami. 10 Wasigale kaweka hasi ya ulolesi wa ndugu yake Abishai, nayo kawalagiliza waitowe na Waamoni. 11 Yoabu kamulongela Abishai, "One nahawona Washami wana nguvu kufosa niye kwizanitaza. Na one Waamoni wana nguvu kufosa weye nizakwiza kukutaza. 12 Mbali igangamize chiitowe chilume kwa ichimu cha wanhu wetu na kwa ichimu cha mabululu ya Mulungu wetu. Mndewa Mulungu kezatenda chiya chinogile kumwake."

13 Baho Yoabu na wanhu wake wakwenhukila kwiitowa na Washami na Washami wakimbila. 14 Waamoni viwawone kuwa Washami wakimbila, nawo wamkimbila Abishai na kwingila kudibululu. Baho Yoabu kabwela kulawa kuna ing'hondo na Waamoni na kufika Yelusalemu.

15 Mbali Washami viwawone wahumigwa na Waisilaili, waiduganya mabumbila hamwe. 16 Mfalume Hadadezeli kalagiliza Washami wose wokalile umwambu wa lwanda lwa Efulate, wahite bululu da Helamu. Shobaki, mkulu wa watowang'hondo wa Hadadezeli, kawalanguliza. 17 Daudi viyalongeligwe mbuli izo, kawaduganya hamwe Waisilaili wose, waloka lwanda lwa Yoludani na kuhita mbaka Helamu. Washami wapanga mabumbila yawo ya ng'hondo na kuitowa nayo Daudi. 18 Mbali Waisilaili wawawinga Washami. Daudi na watowang'hondo wake wawakoma wanhu 700 wa mituka ya kubululigwa na falasi na wakwelafalasi 40,000. Iviya kamtowa Shobaki mkulu wawo watowang'hondo, nayo kadanganikila uko. 19 Baho wafalume wose wamsang'hanile Hadadezeli viwawone wahumigwa na Waisilaili, wailumba na Daudi kwa tindiwalo na watogola kutawaligwa nayo.

Ivo Washami wadumba kuwataza Waamoni kaidi.